79 ஆண்டுகளாக மின்சாரம் இன்றி வாழும் டாக்டர் பட்டம் பெற்ற பேராசிரியை – சுவாரஸ்ய தகவல்

-


மகாராஷ்டிரா மாநிலத்தின் பூனே பகுதியில் வாழும்
79 ஆண்டுகளாக பேராசிரியை ஒருவர் மின்சாரம் இன்றி
வாழ்ந்து வருகிறார். இவர் குறித்த சுவாரஸ்ய தகவலை
பார்ப்போம்.

பூனே:

கோடை காலங்களில் ஃபேன் இல்லாமல் வீட்டில் நம்மால் சமாளிக்க முடியுமா? ஒரு நாளில் ஒரு மணி நேரம் மின்சாரம் இன்றி நம்மால் இருக்க முடியுமா? அப்படி இருந்தாலும் ஸ்னிக்கர்ஸ் விளம்பரங்களில் வருவது போல, ‘மின்சாரம் இல்லை என்றால், நாம் நாமாகவே இருக்க முடியாது’ என்ற சொல் தான் பொருந்தும்.

ஆனால் இந்தியாவின் தொழிற்நுட்ப வளர்ச்சி கண்ட பகுதிகளில் முக்கியமான நகரம் பூனே ஆகும். இந்த பூனேவின் புத்வார் பெத் பகுதியில் வசிப்பவர் டாக்டர்.ஹேமா சேனி(79). இவர் சாவித்ரிபாய் முலே பல்கலைக்கழகத்தில் தாவரவியல் பிரிவில் டாக்டர் பட்டம் பெற்றவர். மேலும் பூனேவில் உள்ள கர்பானே கல்லூரியில் பேராசிரியராக பணிப்புரிந்து ஓய்வுப்பெற்றவர் ஆவார்.

ஒரு பேராசிரியை வீடு என்றால் என்னவெல்லாம் இருக்கும்? ஃபேன் மட்டுமா? ஏசி, ஏர்கூலர் என அத்தனை வசதிகளும் இருக்கும் என எண்ணுவோம். ஆனால் ஹேமாவிற்கு வீட்டில் மின்சாரம் பயன்படுத்திய அனுபவமும் இல்லை. பயன்படுத்த அவர் விரும்பியதும் இல்லை.

ஏழ்மையான குடும்பத்தில் பிறந்த ஹேமா, சிறு வயது முதலே மின்சார இணைப்பு இன்றி வளர்ந்துள்ளார். அதன் பின்னரே அப்பகுதிக்கு மின்சார இணைப்பு வழங்கப்பட்டுள்ளது. இருப்பினும் அவர் அதனை விரும்பவில்லை.


இவர் எவ்வித ஆடம்பரமும் இன்றி சிறிய குடிசையில் சுற்றி மரங்களும், பறவைகளும் இருக்கும் பகுதியில் வசிக்கிறார். பறவைகளின் சத்தத்துடனும், இயற்கையின் எழிலுடனும் வாழ்வதை வரமாக கருதுகிறார். மேலும் தாவரவியல் குறித்த பல்வேறு தகவல்களை ஆராய்ந்து புத்தகங்கள் எழுதியுள்ளார். பறவைகளே தனிமையில் இனிமை தரும் மருந்தாக அமைகிறது எனவும் குறிப்பிடுகிறார்.

அவரது வாழ்க்கை குறித்து ஹேமா கூறுகையில், ‘உணவு, உடை இருப்பிடம் இவையே முக்கிய தேவை. ஒரு காலத்தில் மின்சாரம் இன்றி வாழ்ந்தேன். அதுவே பழகியது. தேவைப்படுவதாகவும் நினைக்கவில்லை.

நான் மின்சாரம் இன்றி இருப்பதால் அருகில் இருப்பவர்கள், என்னை முட்டாள் என கூறுவார்கள். ஆனால் நான் கண்டுகொள்வதில்லை. நான் யாருக்கும் பாடம் புகட்ட எண்ணியதும் இல்லை.

ஆனால் நான் புத்தரின் பொன்மொழியான
‘உங்கள் பதையை நீங்கள் தான் தேர்வு செய்ய வேண்டும்’
என்பதை பின்பற்றி வாழ்கிறேன்.

எனக்கு பிறகு நான் வசித்த இடம் பறவைகளுக்கே
சொந்தமாகும்’ என கூறினார்.

நன்றி-மாலைமலர்