மலேசியா: களவுபோன ஜெட் இயந்திரங்கள் அர்ஜெண்டினாவில்?

ஆகாயப்படைத் தளத்திலிருந்து காணாமல்போன, ரிம100 மில்லியன் பெறுமதியுள்ள இரண்டு ஜெட் போர்விமான இயந்திரங்களும் அர்ஜெண்டினா கொண்டு செல்லப்பட்டதை போலீஸ் கண்டுபிடித்துள்ளது.

இதனை இன்று தெரிவித்த போலீஸ் தலைவர் மூசா ஹசன், அவை இரண்டும் அங்குதான் இன்னமும் உள்ளனவா என்பதைக் கண்டறிந்து கூறுமாறு பியுனஸ் அயர்ஸ் போலீசாரைக் கேட்டுக்கொண்டிருப்பதாகக் சொன்னார்.

“களவுபோன இயந்திரங்கள் அர்ஜெண்டினா கொண்டு செல்லப்பட்டிருப்பதாக அறிகிறோம். அவை இன்னும் அங்குதான் உள்ளனவா என்பதை இப்போது ஆராய்ந்து வருகிறோம்”, என்று அவர் ஏஎப்பி-இடம் தெரிவித்தார்.

களவுபோன இயந்திரங்கள் தொடர்பில் ஜெனரல்கள் உள்பட ஆகாயப்படை உயர் அதிகாரிகள் பலர் விசாரிக்கப்படுவர் என்று மூசா ஸ்டார் நாளேட்டிடம் கூறியுள்ளார்.

இதுவரை கீழ்நிலை அதிகாரிகள் மூவர் உள்பட, நால்வர் கைது செய்யப்பட்டு பிணையில் விடுவிக்கப்பட்டிருப்பதாகவும் அவர் கூறினார்.

“அனுமதியும் முறையான ஆவணங்களும் இன்றி அந்த இயந்திரங்களை வெளியில் கொண்டு சென்றிருக்க முடியாது என்பதால் அவர்கள் அனைவரையும் விசாரிக்க வேண்டியுள்ளது”, என்றாரவர்.

இயந்திரங்கள் களவு போனது தெரிய வந்ததை அடுத்து அரசாங்கம் கடுமையான குறைகூறலுக்கு இலக்காகி வருகிறது.

அமெரிக்காவில் தயாரிக்கப்பட்ட அந்த F-5E ஜெட் இயந்திரங்கள், ஆகாயப் படைத்தளத்திலிருந்து களவாடப்பட்டு தென் அமெரிக்க நிறுவனமொன்றுக்கு கள்ளச் சந்தையில் விற்கப்பட்டுள்ளன.

இவ்விவகாரம் ஒரு பனிப்பாறையின் நுனிப்பகுதி மட்டுமே என்று ஆயுதப்படைகளின் தலைவர் அசிசான் அரிப்பின் கூறினார். புதிதாக மேற்கொள்ளப்பட்ட கணக்கெடுப்பு ஒன்றில் பல மில்லியன் ரிங்கிட் பெறுமதியுள்ள தளவாடங்கள் காணாமல் போயிருப்பது தெரிய வந்திருப்பதாக அவர் சொன்னார்.

இயந்திரங்கள் தவிர்த்து, ஜெட் போர் விமானத்தின் உபரி பாகங்கள் உள்பட படைக்கருவிகள் பல காணாமல் போயுள்ளன.

அமெரிக்காவின் ஆயுதத்தடைக்கு உட்பட்ட நாடுகளில் சில காலவதியாகிப்போன இந்த வகை இயந்திரங்களைப் பயன்படுத்தும் போர் விமானங்களை இன்னமும் பயன்படுத்தி வருகின்றன.

F-5 ஜெட் போர் விமானங்கள் 1963-இல், பறந்து கொண்டிருந்தன. இப்போது பறப்பதில்லை. 1989-இல் அவற்றின் தயாரிப்பை நோர்த்ரோப் நிறுவனம் நிறுத்திக்கொண்டது.

“ஊழலை ஒழிக்க முடியவில்லை என்பதை அரசாங்கம் ஒத்துக்கொள்ள வேண்டும். தோல்விகண்ட சிம்பாப்வே போன்ற நாடுகள் சென்ற திசையில் நாடு சென்று கொண்டிருக்கிறது”, என்று மாற்றுக்கட்சி நாடாளுமன்ற உறுப்பினர் தியான் சுவா ஏஎப்பி-இடம் கூறினார்.

“மேலதிகாரிகளுக்குத் தெரியாமல் களவு நிகழ்ந்திருக்க முடியாது”, என்றாரவர்.

நஜிப்பின் தலைமத்துவத்தில் தேசிய வளம் கொள்ளைபோவதாக தியான் குறிப்பீட்டார். “அரசாங்கத்திற்கு நெருக்கமானவர்கள் கமிஷன் பெறுவதற்கு தற்காப்புச் செலவினம் பயன்படுகிறது”, என்றாரவர்.

“அதற்குக் கைம்மாறாக அவர்கள், ஆட்சி செய்வோர் தொடர்ந்து ஆட்சியில் இருப்பதற்கு நிதியுதவி செய்கின்றனர்.”

பிரான்ஸில் உருவாக்கப்பட்ட இரண்டு நீர்மூழ்கிக்கப்பல்களை வாங்கியதில் நஜிப்புக்கு நெருக்கமான ஒருவர், சட்டத்துக்குப் புறம்பான முறையில் ரிம540 மில்லியன் கமிஷன் பெற்றார் என்று மாற்றுக்கட்சிகள் கூறிவருகின்றன.

2002-இல், தாம் தற்காப்பு அமைச்சராக இருந்தபோது நிகழ்ந்த அக்கொள்முதலில் தவறு எதுவும் இல்லை என்று பிரதமர் மறுக்கிறார்.

நஜிப்பைப் பொருத்தவரை “எல்லாம் வழக்கம்போல் நடக்கிறது”, அதற்கு அண்மைய விவகாரம் ஓர் எடுத்துக்காட்டு என்று பாஸ் நாடாளுமன்ற உறுப்பினர்களில் ஒருவரான காலிட் சமட் கூறினார்.

“விமான இயந்திரங்களை நாட்டைவிட்டுக் கொண்டு செல்வதில் பல தரப்புகள் சம்பந்தப்பட்டிருக்கும். நினைத்தாலே நடுக்கமாக இருக்கிறது”, என்றவர் சொன்னார்