71 லோக்சபா தொகுதிகளில் இன்று தேர்தல்

புதுடில்லி:
லோக்சபா தேர்தலுக்கான, நான்காம் கட்ட ஓட்டுப்பதிவு,
ஒன்பது மாநிலங்களில் உள்ள, 71 தொகுதிகளில் இன்று நடக்க
உள்ளது. இதற்கான விரிவான ஏற்பாடுகளை, தேர்தல் ஆணையம்
செய்துள்ளது.

'லோக்சபாவில் உள்ள, 543 தொகுதிகளுக்கான தேர்தல்,
ஏழு கட்டங்களாக நடக்கும்' என, அறிவிக்கப்பட்டுள்ளது.
இதுவரை நடந்த, மூன்று கட்டங்களில், 302 தொகுதிகளுக்கான
ஓட்டுப்பதிவு முடிந்துள்ளது.

வாக்காளர்களுக்கு பணம் தர முயன்றதால், தமிழகத்தின் வேலுார்
தொகுதிக்கான தேர்தல் ஒத்தி வைக்கப்பட்டு உள்ளது.

இந்நிலையில், நான்காம் கட்ட ஓட்டுப்பதிவு, ஒன்பது
மாநிலங்களில் உள்ள, 71 தொகுதிகளில் இன்று நடக்க உள்ளது.
இதற்கான விரிவான ஏற்பாடுகளை, தேர்தல் ஆணையம்
செய்துள்ளது.

நான்கு கட்டங்களாக தேர்தலை சந்தித்த, மஹாராஷ்டிரா
மற்றும் ஒடிசாவில், இன்றுடன் தேர்தல் முடிகிறது. உத்தர பிரதேசம்,
பீஹார், மேற்கு வங்கம் ஆகிய பெரிய மாநிலங்களில்,
ஏழு கட்டங்களிலும் தேர்தல் நடக்கிறது. அரசியல் முக்கியத்துவம்
உள்ள மத்திய பிரதேசத்தின், 29 தொகுதிகளுக்கு, நான்கு
கட்டங்களாக தேர்தல், இன்று துவங்குகிறது.

அதேபோல், இரண்டு கட்டங்களாக தேர்தலை சந்திக்கும்
ராஜஸ்தானில், இன்று தேர்தல் துவங்குகிறது.

கடந்த ஆண்டு இறுதியில் நடந்த சட்டசபை தேர்தல்களில்,
மத்திய பிரதேசம், ராஜஸ்தான் மாநிலங்களில், பா.ஜ., ஆட்சியை
இழந்தது; காங்., ஆட்சியைப் பிடித்தது

.கடந்த லோக்சபா தேர்தலில், இந்த மாநிலங்களில்,
பா.ஜ., பெரும் வெற்றியை பெற்றிருந்தது. தற்போது,
இங்கு பலத்த போட்டி நிலவி உள்ளது.

இதுவரை, 302 தொகுதி களுக்கு தேர்தல் முடிந்தாலும்,
ம.பி.,யில் உள்ள, 29; ராஜஸ்தானில் உள்ள, 25 தொகுதிகளின்
வெற்றி, இரு கட்சிகளுக்கும் மிகவும் முக்கியமாகும்.

அதனால், நான்காவது கட்டத் தேர்தல் பெரும் எதிர்பார்ப்பை
ஏற்படுத்தி உள்ளது.ஐந்தாம் கட்டத் தேர்தல், மே, 6ல் நடக்கிறது.
அதைத் தொடர்ந்து, மே, 12 மற்றும் 19ல், அதற்கடுத்த கட்ட ஓ
ட்டுப்பதிவு நடக்கின்றன;

மே, 23ல், ஓட்டு எண்ணிக்கை நடக்கிறது.

-

முக்கிய வேட்பாளர்கள்

பீஹாரின் பேகுசராய் தொகுதியில், டில்லி ஜவஹர்லால் நேரு
பல்கலை முன்னாள் மாணவர் சங்கத் தலைவரான,
கன்ஹையா குமார், இந்திய கம்யூனிஸ்ட் வேட்பாளராக
களமிறங்கியுள்ளார்.

இந்தத் தொகுதியில், பா.ஜ.,வின் மத்திய அமைச்சர்,
கிரிராஜ் சிங்குக்கு பலத்த போட்டி ஏற்பட்டுள்ளது.

மத்திய பிரதேசத்தில், காங்.,கைச் சேர்ந்த முதல்வர்,
கமல்நாத்தின் மகன் நகுல் நாத், சிந்த்வாரா தொகுதியில்
போட்டியிடுகிறார். இந்தத் தொகுதியில், கமல்நாத், ஒன்பது
முறை வென்றவர் என்பது, கவனிக்கத்தக்கது.

உத்தர பிரதேசத்தின் கன்னோஜ் தொகுதியில், கட்சித் தலைவர்,
அகிலேஷ் யாதவின் மனைவி டிம்பிள் யாதவ், மீண்டும் போட்டியிடுகிறார்.

மஹாராஷ்டிராவின் வடக்கு மும்பை தொகுதியில், காங்., சார்பில்,
பிரபல பாலிவுட் நடிகை, ஊர்மிளா களமிறக்கப்பட்டுள்ளார்.

பணக்காரர்கள் அதிகம் உள்ள மும்பை தெற்கு தொகுதியில்,
காங்.,கின், மிலிந்த் தியோரா போட்டியிடுகிறார்.பா.ஜ., மூத்த தலைவர்,
முரளி மனோகர் ஜோஷியின் கோட்டையான, உத்தர பிரதேச மாநிலம்,
கான்பூர் தொகுதியும் எதிர்பார்ப்பை ஏற்படுத்தி உள்ளது.

முன்னாள், எம்.பி.,யான, ஸ்ரீபிரகாஷ் ஜெய்ல்வாலை,
காங்., களமிறக்கி உள்ளது. பா.ஜ., சார்பில், சத்தியதேவ் பச்சோரி
நிறுத்தப்பட்டுள்ளார்.
-
-------------------------------------
தினமலர்