சட்டசபை தேர்தலில் போட்டி : நடிகை கஸ்தூரி

-
''வரும் சட்டசபை தேர்தலில் போட்டியிடும் வகையில், தகுதியை வளர்த்துக் கொள்வேன்,'' என, நடிகை கஸ்துாரி தெரிவித்துள்ளார்.

இதுகுறித்து, அவர் அளித்த பேட்டி:நான், இதுவரை அரசியலுக்கு வரவேண்டும் என, நினைக்கவில்லை. லோக்சபா தேர்தலில் கூட, எனக்கு வாய்ப்பு வந்தது; மறுத்துவிட்டேன். சினிமாவில், பல நடிகர்களோடு என்னை சேர்த்து பேசினர்.

இப்போது, அரசியல் கட்சிகளுடன் சேர்த்து பேசுகின்றனர்; இது சகஜம்.நான் நினைத்த நல்லவர்கள் பலர், தமிழகத்தில் உள்ளனர்; ஆனால், அவர்களில் யாரும் அரசியலுக்கு வரவில்லை. தகுதியான பலர், அரசியலின் மீது, அவநம்பிக்கையில் உள்ளனர். லோக்சபா தேர்தலை பொறுத்தவரை எனக்கு ஏமாற்றம் தான்.

எந்த திருடனில், நல்ல திருடனை தேர்ந்தெடுக்கலாம் என்ற நிலை தான் இருந்தது. நல்ல வேட்பாளர்கள், மக்களுக்கு அறிமுகம் இல்லாதவர்கள் என்பதால், அவர்களுக்கு ஓரளவு தான் ஓட்டு கிடைக்கும்.அரசியலுக்கு வர, பணம், பக்கபலம் வேண்டும்.

அதே போல, வெட்கம், மானம், சூடு, சொரணை இருக்கக் கூடாது; ஞாபக சக்தி இருக்கவே கூடாது. இது, நான் கற்றுக் கொண்ட பாடம். அதனால் தான், நான் அரசியலுக்கு வரவில்லை.என்னை மாதிரி பிரபலமான முகம், அரசியலுக்கு வந்து, ஓரளவு ஆதரவு கிடைத்தால், என்னைப் போன்ற நல்லவர்களும், அரசியலுக்கு வர வாய்ப்புள்ளது. வரும் சட்டசபை தேர்தலில், நான் போட்டியிட வாய்ப்புள்ளது.

அதற்குள், எனக்கான தகுதியை வளர்த்துக் கொள்ள வேண்டும்.சினிமாவில் எனக்கு அறிமுகம் இருந்தாலும், தனிக்கட்சி மற்றும் சுயேச்சையாக நிற்க, நான் ஒன்றும், 'அப்பா டக்கர்' கிடையாது.

களப்பணிக்கு ஒரு கட்சி தேவை. சுயேச்சையை ஊக்கப்படுத்தும் அளவுக்கு, தமிழக மக்கள் தயாராக இல்லை.இவ்வாறு, கஸ்துாரி கூறினார்.

--- நமது நிருபர் -, தினமலர்