பெங்களூருக்கு வெற்றி தேடி தந்த 'அந்த மூன்று ஓவர்கள்'

-

கிங்ஸ் லெவன் பஞ்சாப்புக்கு எதிரான போட்டியில்
ராயல் சேலஞ்சர்ஸ் பெங்களூரு அணி 17 ரன்கள்
வித்தியாசத்தில் வெற்றி பெற்றது.

ஐபிஎல்-இன் இன்றைய (புதன்கிழமை) போட்டியில்
ராயல் சேலஞ்சர்ஸ் பெங்களூரு, கிங்ஸ் லெவன் பஞ்சாப்
அணிகள் மோதின.

டாஸ் வென்ற பஞ்சாப் கேப்டன் அஸ்வின் முதலில்
பந்துவீச்சை தேர்வு செய்தார்.

அதன்படி, முதலில் பேட் செய்த பெங்களூரு அணி
நிர்ணயிக்கப்பட்ட 20 ஓவர்கள் முடிவில் 4 விக்கெட்டுகளை
இழந்து 202 ரன்கள் எடுத்தது.


203 ரன்கள் என்ற வெற்றி இலக்குடன் கிறிஸ் கெயில் மற்றும்
கேஎல் ராகுல் களமிறங்கினர். முதல் ஓவரிலேயே கெயில்
3 பவுண்டரிகளை அடித்து அதிரடி தொடக்கத்தை தந்தார்.

அதன்பிறகு, ராகுலும் பவுண்டரிகளாக அடித்தார்.
இந்த அதிரடி நீண்ட நேரம் தாக்குப்பிடிக்காத நிலையில்
கெயில் 10 பந்துகளில் 23 ரன்களுக்கு ஆட்டமிழந்தார்.

அதன்பிறகு ராகுலும், அகர்வாலும் அணியை கட்டமைத்தனர்.
பொறுப்பாக விளையாடிய இரண்டு இந்தியர்களும்
அவ்வப்போது பவுண்டரிகள் அடித்து நல்ல ஆட்டத்தை
வெளிப்படுத்தி வந்தனர்.
இதனால், வெற்றிக்கு தேவையான ரன் ரேட்டும்
கட்டுக்குள்ளேயே இருந்தது.

இந்த நிலையில், 35 ரன்கள் எடுத்திருந்த அகர்வால்
ஸ்டாய்னிஸ் பந்தில் ஆட்டமிழந்தார். அடுத்த ஓவரிலேயே
ராகுல் 42 ரன்கள் எடுத்திருந்த நிலையில் மொயீன் அலி
பந்தில் ஆட்டமிழந்தார். அடுத்தடுத்த ஓவரில் 2 நிலையான
பேட்ஸ்மேன்கள் ஆட்டமிழந்ததால் பஞ்சாப் அணி சற்று
நெருக்கடிக்குள்ளானது.

இதனால் மில்லரும், பூரனும் அடுத்த இரண்டு ஓவர்களில்
அடக்கி வாசித்தனர். இதையடுத்து, 14-வது ஓவரில் பூரன்
அதிரடியாக ரன் குவிக்க தொடங்கினார்.

வாஷிங்டன் சுந்தர் ஓவரில் பூரன் 3 சிக்ஸர் அடித்தார்.
இதையடுத்து, நவ்தீப் சைனி தனது ஓவரை சிறப்பாக வீசி
கட்டுப்படுத்தினார். ஆனால், மீண்டும் மொயீன் அலி ஓவரில்
2 சிக்ஸர் அடித்து பூரன் மிரட்டினார்.

தொடர்ந்து சௌத்தி ஓவரில் மில்லர் இரண்டு பவுண்டரி
அடிக்க வெற்றி பஞ்சாபை நெருங்கியது.

ஆனால், 18-வது ஓவரை உமேஷ் யாதவ் அற்புதமாக
வீசி வெறும் 6 ரன்கள் தான் விட்டுக்கொடுத்தார்.
தொடர்ந்து, அடுத்த ஓவரை நவ்தீப் சைனியும் சிறப்பாக
அந்த ஓவரில் பஞ்சாப் அணிக்கு வெறும் 3 ரன்கள் தான்
கிடைத்தது. குறிப்பாக முதல் பந்தில் மில்லரும், கடைசி
பந்தில் பூரனும் ஆட்டமிழந்தனர்.

இதனால், கடைசி ஓவரில் பஞ்சாப் அணியின் வெற்றிக்கு
27 ரன்கள் தேவைப்பட்டது. அந்த ஓவரை அஸ்வின் சிக்ஸர்
அடித்து தொடங்கினார். ஆனால், அடுத்த பந்திலேயே
அவர் ஆட்டம் இழந்தார். அடுத்து களமிறங்கிய
விஜோய்னும் முதல் பந்திலேயே ஆட்டமிழந்தார்.
இந்த ஓவரும் சிறப்பாக போக பெங்களூரு அணி வெற்றி
பெற்றது.

நிர்ணயிக்கப்பட்ட 20 ஓவர்கள் முடிவில் பஞ்சாப் அணி
7 விக்கெட்டுகளை இழந்து 185 ரன்கள் மட்டுமே எடுத்தது.
இதன்மூலம், ராயல் சேலஞ்சர்ஸ் பெங்களூரு அணி 17 ரன்கள்
வித்தியாசத்தில் வெற்றி பெற்றது.

பெங்களூரு அணி, பேட்டிங்கில் கடைசி 3 ஓவரில்
64 ரன்கள் குவித்தது. பந்துவீச்சில் கடைசி 3 ஓவரில்
36 ரன்கள் தேவைப்பட்ட நிலையில் சிறப்பாக பந்துவீசி
18 ரன்கள் மட்டுமே விட்டுக்கொடுத்தது.

இந்த இரண்டு கடைசி 3 ஓவர்களும் பெங்களூரு அணிக்கு
வெற்றி தேடி தந்தது.
-
-----------------------------------
தினமணி