சட்டப்பேரவைத் தேர்தலை சந்திக்கத் தயார்: நடிகர் ரஜினிகாந்த்

-

தமிழகத்தில் எப்போது சட்டப்பேரவைக்குத் தேர்தல் வந்தாலும்
அதை எதிர்கொள்ளத் தயாராக உள்ளேன் என நடிகர் ரஜினிகாந்த்
தெரிவித்தார்.

நடிகர் ரஜினிகாந்த் தனது தர்பார் திரைப்பட படப்பிடிப்புக்காக
மும்பை செல்லும் முன், சென்னை போயஸ் கார்டனில் உள்ள தனது
இல்லத்தில் செய்தியாளர்களை வெள்ளிக்கிழமை சந்தித்தார்.

அப்போது, தமிழகத்தில் இடைத் தேர்தல் முடிவுகள் வெளியான
பிறகு மாநிலத்தில் ஆட்சி மாற்றம் ஏற்பட வாய்ப்பு உள்ளதாகக்
கூறப்படுகிறது. அந்தச் சூழலில் மாநிலத்துக்கு சட்டப்பேரவைத்
தேர்தல் வந்தால் ரஜினி மக்கள் மன்றம் தேர்தலில் களம் இறங்குமா
என ரசிகர்கள் எதிர்பார்க்கின்றனர் என்பன உள்ளிட்ட செய்தியாளர்கள்
எழுப்பிய பல்வேறு கேள்விகளுக்கு ரஜினிகாந்த் அளித்த பதில்:

ரசிகர்களின் அரசியல் ஆர்வம் எனக்குப் புரிகிறது.
நிச்சயமாக அவர்களை ஏமாற்றமாட்டேன். தமிழகத்தில் எப்போது
சட்டப் பேரவைத் தேர்தல் வந்தாலும், அதை எதிர்கொள்ளத் தயார்.

மக்களவைத் தேர்தலில் 70 சதவீத வாக்குப்பதிவு என்பது
வரவேற்கத்தக்க ஒன்றுதான். இருந்தபோதும், சென்னையில் மட்டும்
ஒரு தொகுதியில் குறைந்தபட்சமாக 57 சதவீத வாக்குகள் பதிவு
ஆகியிருக்கிறது. அதுவும், நான்கு நாள்கள் தொடர்ச்சியாக விடுமுறை
வந்ததால், மக்கள் சென்னையிலிருந்து வெளியூர்களுக்குச்
சென்றிருக்கலாம் என்பதால் வாக்குப்பதிவு சதவீதம் குறைந்திருக்கிறது.

வரும் காலங்களில் வாக்குச் சாவடிகளின் எண்ணிக்கையை அதிகரிப்பது
தொடர்பாக தேர்தல் ஆணையம் பரிசீலிக்கவேண்டும். தேர்தலில்
பணப் பட்டுவாடா செய்யப்படுவதை தேர்தல் ஆணையம்தான் கட்டுப்படுத்த
வேண்டும் என்றார் அவர்.

மேலும், பிரதமராக மோடி நீடிப்பாரா?
என்ற கேள்விக்குப் பதிலளித்த ரஜினிகாந்த், மே 23-ஆம் தேதி தெரிந்துவிடும்
என்றார்.
-
------------------------------
தினமணி