அமமுக பொதுச் செயலாளரானார் டிடிவி தினகரன்: கட்சியாக பதிவு செய்ய நடவடிக்கை

அம்மா மக்கள் முன்னேற்றக் கழகத்தை அரசியல் கட்சியாக பதிவு செய்யும் நடவடிக்கைகளை அந்தக் கட்சி தொடங்கியுள்ளது. இதற்காக கட்சியின் பொதுச் செயலாளராக டிடிவி தினகரன் வெள்ளிக்கிழமை தேர்வு செய்யப்பட்டார்.

அம்மா மக்கள் முன்னேற்றக் கழகத்தின் நிர்வாகிகள் கூட்டம் சென்னை அசோக் நகரிலுள்ள அந்தக் கட்சியின் அலுவலகத்தில் வெள்ளிக்கிழமை காலை நடைபெற்றது. இந்தக் கூட்டத்தில் சில முக்கிய முடிவுகள் எடுக்கப்பட்டன. அதுகுறித்து, கட்சியின் செய்தித் தொடர்பாளர் சி.ஆர்.சரஸ்வதி செய்தியாளர்களுக்கு அளித்த பேட்டி:-
அம்மா மக்கள் முன்னேற்றக் கழகத்தை கட்சியாக பதிவு செய்யும் நடவடிக்கைகளைத் தொடங்கியுள்ளோம்.

கட்சியின் தலைவராக வி.கே.சசிகலா சென்னை வந்தவுடன் பணியாற்றுவார். அதேசமயம், அதிமுக தொடர்பான வழக்கை சசிகலா தொடர்வார். அமமுகவின் பொதுச் செயலாளராக டிடிவி தினகரன் செயல்படுவார். இதன்மூலம், அமைப்பாக இருந்த நாங்கள் கட்சியாக மாற உள்ளோம்.

அதிமுக விவகாரம்: அதிமுக பொதுச் செயலாளராக சசிகலா ஏற்கெனவே முறைப்படி தேர்ந்தெடுக்கப்பட்டார். இதன்பின்பு, கட்சி, சின்னம் தொடர்பான வழக்கு விவகாரத்தில் இரண்டையும் தேர்தல் ஆணையம் எங்களுக்கு வழங்கவில்லை. இந்த விவகாரத்தில் மேல்முறையீட்டை சசிகலா மேற்கொள்வார்.

அதிமுகவில் பொதுச் செயலாளருக்கே அதிகாரம் உள்ளது. ஒருங்கிணைப்பாளர், இணை ஒருங்கிணைப்பாளர் என்ற பதவிகளே கிடையாது. எங்களது அமமுக, ஜெயலலிதா பெயரிலேயே உள்ளது. இதுதான் உண்மையான அதிமுக. எங்களுடைய கட்சியைப் பொறுத்தவரை அதிமுகவின் பெயரை நாங்கள் மாற்றி அழைக்கிறோம்.

பாஜக மீது மிகப்பெரிய அளவுக்கு கோபம் உள்ளது. அந்த வகையில், அதிமுக-பாஜக என பொருந்தாத கூட்டணி அமைக்கப்பட்டுள்ளது. அதிமுகவில் இருக்கக் கூடிய சிறிய அளவிலான தொண்டர்களும் கூட கூட்டணியை விரும்பவில்லை. இதனை தேர்தல் முடிவுகள் நிச்சயம் காட்டும் என்றார் சி.ஆர்.சரஸ்வதி.

அமமுக எப்போது தொடக்கம்: ஆர்.கே.நகரில் கடந்த 2017-ஆம் ஆண்டு நடந்த சட்டப் பேரவை இடைத் தேர்தலில் சுயேச்சையாகப் போட்டியிட்டு வெற்றி பெற்றார், டிடிவி தினகரன்.

இதன்பின்பு கடந்த 2018-ஆம் ஆண்டு மார்ச் மாதம் அம்மா மக்கள் முன்னேற்றக் கழகம் எனும் புதிய அரசியல் அமைப்பை அவர் தொடங்கினார். அதிமுக மற்றும் இரட்டை இலைச் சின்னம் மீட்கப்படும் வரை தனக்கென ஒரு அடையாளம் வேண்டும் என்பதால் அமைப்பைத் தொடங்கியதாகக் கூறியிருந்தார்.

இந்த நிலையில், அமமுகவுக்கு சின்னம் பெறுவது தொடர்பான வழக்கு உச்ச நீதிமன்றத்தில் கடந்த மாதம் நடந்தது. அதில், அமமுகவை கட்சியாகப் பதிவு செய்யத் தயாராக இருப்பதாக டிடிவி தினகரன் தரப்பில் வாதிடப்பட்டது.

பல்வேறு தரப்பு வாதங்களைக் கேட்ட நீதிமன்றம், அமமுகவை சுயேச்சையாகக் கருதியும் அதேசமயம் பொதுச் சின்னம் வழங்கவும் உத்தரவிட்டது. மக்களவை, 18 சட்டப் பேரவைத் தொகுதிகளுக்கான தேர்தல் முடிவடைந்த நிலையில் அமமுகவை கட்சியாகப் பதிவு செய்ய முடிவு செய்யப்பட்டுள்ளது.

ஒரு மாதத்தில் சின்னம் கிடைக்குமா: கட்சியாகப் பதிவு செய்து ஒரு மாதம் கழித்த பிறகே பொதுவான சின்னம், நட்சத்திர பேச்சாளர்களுக்கு சலுகைகள் போன்றவை கிடைக்கப் பெறும். அந்த வகையில், உடனடியாக அமமுகவை கட்சியாகப் பதிவு செய்தாலும் நிரந்தர சின்னம் என்பது மே 19-ஆம் தேதிக்குப் பிறகே கிடைக்க வாய்ப்புகள் இருக்கின்றன.

திருப்பரங்குன்றம், சூலூர், அரவக்குறிச்சி, ஒட்டப்பிடாரம் ஆகிய தொகுதிகளுக்கு இடைத் தேர்தல் வரும் மே 19-இல் நடைபெறுகிறது. இந்தத் தேர்தலுக்கு முன்னதாக அமமுகவுக்கு பொதுச் சின்னம் கிடைக்குமா என்ற கேள்வி எழுந்துள்ளது. இல்லாவிட்டால் சின்னத்துக்காக மீண்டும் அமமுக நீதிமன்றத்தை நாடும் சூழ்நிலை எழும்.
-
தினமணி