ஔஷதமும் நீயே !

by **krishnaamma** Tue Apr 09, 2019 11:02 pm

பெரியவா சரணம் !

ஔஷதமும் நீயே ! GriN89NmRpavzvJOfiQu+795ada294367543aa29e14bfbd4c4559

கரூர் பண்டிட் ராமசர்மா என்ற ஆயுர்வேத வைத்தியர். சக்தி விலாச வைத்திய சாலையை நிறுவி மருத்துவம் பார்த்தவர்.

ராமசர்மா மஹா பெரியவரின பக்தர். பெரியவா கரூர் வந்தால் அவர் இல்லத்தில் தான் தங்குவார்.

ஒரு முறை பெரியவா தனக்குக் காய்ச்சல் அறிகுறி இருப்பதாகவும், ராமசர்மாவைக் காஞ்சிபுரம் வருமாறும் சொல்லியனுப்பினார். ராமசர்மாவும் வந்தார்.

அவருடைய மருந்துப் பெட்டியைப் பார்த்து பெரியவா முகத்தில் புன்முறுவல்! "உன்னைத் தான் வரச் சொன்னனே தவிர, மருந்துப் பெட்டியோடு வான்னு சொல்லலியே!"என்றார். ராமசர்மா திகைத்தார்.

"உங்களுக்கு காய்ச்சல் என்று சொன்னதால், மருந்துப் பெட்டியோடு வந்தேன்! "என்றார்.

" உடல் என்றிருந்தால் எப்போதாவது காய்ச்சல் வருவது சகஜம் தான். காய்ச்சலே உடலைக் குணப்படுத்தத் தானே வருகிறது!அது சரி... நோயைக் குணப்படுத்த மருந்து எதற்கு? அதற்கு வேறொரு வித்தியாசமான மருந்து இருக்கிறது.அதைப் பிரயோகம் பண்ணத் தான் உன்னை வரச் சொன்னேன்.. "

ராமசர்மாவுக்குப் புரியவில்லை.அமைதி காத்தார். பெரியவா தொடர்ந்தார். " நீ குளிச்சுட்டுத் தான் வந்திருப்பாய்.. இரு... நான் இன்னொரு முறை குளிச்சுட்டு வந்துடறேன்! "

காய்ச்சல் இருக்கும் போதுகுளிக்கிறேன் என்கிறாரே! ராமசர்மாவின் மனம் பதறியது. ஆனால் மறுத்து எதுவும் சொல்லத் தோன்றவில்லை. பெரியவா வரும் வரை காத்திருந்தார்.

குளித்து விட்டு வந்த பெரியவா தன் உடல் உஷ்ணத்தை அளந்து பார்க்கச் சொன்னார். தெர்மாமீட்டர் மூலம் பார்த்ததில் காய்ச்சல் இருப்பது உறுதியானது.

"நல்லது... நாம் இருவரும் இப்போது விஷ்ணு சகஸ்ர நாமம் ஜெபிக்க போகிறோம்.. " என்றார் பெரியவா.

இருவரும் இணைந்து ஜெபித்தனர். பாராயணம் நிறைவடைந்ததும் பெரியவா உடல் வெப்பத்தை மறுபடி சோதிக்குமாறு கூறினார்.

என்ன ஆச்சரியம்! காய்ச்சல் முற்றிலும் குணமாகி இருந்தது. !

உடனே பெரியவா சர்மாவிடம்," விஷ்ணு சகஸ்ர நாம பாராயணம் செல்வத்தை மட்டுமல்ல, ஆரோக்கியம் உள்ளிட்ட எத்தனையோ பயன்களைத் தரக் கூடியது ன்னு ஓயாம சொல்றேன். ஜனங்களும் கேட்கறா. அவாளுக்கு அது உண்மை தான்னு நிரூபிச்சுக் காட்ட வேண்டாமோ? அதுக்குத் தான் இந்த சந்தர்ப்பத்தைப் பயன் படுத்திண்டேன்.

கடவுள் நாமம் பிறவிப் பிணியைத் தீர்க்கும்னு தமிழ் சொல்றது. பிறவிப் பிணியையே நீக்கும்ன்னா, பிறவியில் வர்ற பிணியை நீக்காதா? நோயாளிகளுக்கு நீ வழக்கம் போல மருந்து கொடு. வியாதி வந்தா மருந்து சாப்பிட வேண்டியது தான். ஆனால், கூடவே விஷ்ணு சகஸ்ர நாமம் ங்கிற மருந்தையும் சேர்த்துப் பயன்படுத்தலாமே?

உன்னைத் தேடி வர்றவா கிட்ட , நீ இதையும் உன் பிரிஸ்க்ரிப்ஷன்ல சேர்த்துக்கலாம் இல்லையா? அதுக்கு உனக்கு நம்பிக்கை வரத் தான், உன்னை வரச் சொன்னேன். காந்தி இயற்கை வைத்தியத்தைக் கொண்டாடினாருன்னு உனக்கு தெரியும்.

இயற்கை வைத்தியத்துல பிரார்த்தனைக்குத் தான் முதலிடம்.. " என சொல்லி விட்டு குழந்தை போல் சிரித்தார் பெரியவா...

ஔஷதமும் நீயே...... பெரியவா சரணம் !