குதிரை சவாரி செய்து தேர்வெழுதிய மாணவி

திருச்சூர் :
கேரளாவில், பள்ளி செல்ல தாமதமானதால், குதிரையில் சென்று, தேர்வு எழுதிய மாணவியின், 'வீடியோ' காட்சி, சமூக வலைதளங்களில் வேகமாக பரவி வருகிறது.

கேரளாவில், திருச்சூரைச் சேர்ந்த, 'அரக்கு காபி' நிறுவனரான, மனோஜ் குமார், சமூக வலைதளத்தில், சமீபத்தில், ஒரு வீடியோவை வெளியிட்டார். அதில், குதிரை சவாரி செய்து, 10ம் வகுப்பு தேர்வெழுத செல்லும் மாணவி கிருஷ்ணாவின் ஆர்வத்தை, அவர் பாராட்டியிருந்தார். உடனே, இந்த வீடியோ வை, சமூக வலைதளங்களில் ஏராளமானோர் பகிர்ந்தனர்.

மகிந்திரா ஆட்டோமொபைல்ஸ் குழுமத்தின் தலைவர், ஆனந்த் மகிந்திரா, அந்த வீடியோவை, தன், 'டுவிட்டரில்' வெளியிட்டு, 'பெண் கல்வியின் முக்கியத்துவத்தை வலியுறுத்தும் இந்த வீடியோ, உலகம் முழுவதும் பரவ வேண்டும்;இதுவும், 'இந்தியா ஒளிர்கிறது' என்பதற்கான அடையாளம்' என, குறிப்பிட்டு இருந்தார்.

அடுத்த பதிவில், 'திருச்சூரில் அந்த மாணவி பற்றி தெரிந்தவர்கள், புகைப்படம் அனுப்பலாம்; அந்த மாணவியின் படத்தை, மொபைல்போனில், 'ஸ்க்ரீன்சேவர்' ஆக வைத்துக் கொள்வேன்' என, கூறிஇருந்தார்.

இதைப் பார்த்த, ரேடியோ ஜாக்கியான, லிஷ்னா, 'மாணவி பெயர் கிருஷ்ணா; வளர்ப்பு குதிரையின் பெயர், ராமகிருஷ்ணா' என கூறி, விரைவில், அந்த மாணவியை பேட்டி காண உள்ளதாக, 'டுவிட்டரில்' பதிவிட்டார். இதைத் தொடர்ந்து, மாணவியின் படம், சமூக வலைதளங்களில் வேகமாக பரவி வருகிறது.அதேசமயம், சாலையில் குதிரை ஓட்டுவது ஆபத்தானது என்றும், இது ஒரு, 'ஸ்டன்ட்' என்றும், பலர் விமர்சித்து உள்ளனர்.

கடந்த ஆண்டு, கல்விச் செலவை சமாளிக்க, மீன் விற்ற, கேரள மாணவி, ஹனன் ஹமிதி பற்றி, பரபரப்பாக பேசப்பட்டது. இதையடுத்து, அந்த மாணவிக்கு, வாகனம் வழங்கி உதவியவர், ஆனந்த் மகிந்திரா. இவர், கிருஷ்ணாவிற்கு எந்தவகையில் உதவுவார் என, தெரியவில்லை.
-
தினமலர்

இவ்வளவு விலையுயர்ந்த குதிரை வைத்து இருந்தால் வசதியான குடும்பத்தில் பிறந்தவராக தான் இருக்க முடியும்.