பெண்மை போற்று!

-
இயற்கையிடம் இல்லாத தாய்மை குணம், பெண்ணிடம் உள்ளது. தண்ணீருக்கும், பூமிக்கும், பெண்மை தன்மை தந்து, வணங்குகிறோம்; பெண்மையால், ஆணின் வாழ்க்கை மேன்மை அடைகிறது.

மார்ச், 8 மகளிர் தினம்

சபாஷ் ஷர்மிளா!
திருநங்கைகள், ஒவ்வொரு துறையிலும் தடம் பதித்து வருகின்றனர். ராமநாதபுரத்தை சேர்ந்த திருநங்கை, சத்யாஸ்ரீ ஷர்மிளா, 'பார் கவுன்சில்' உறுப்பினராக பதிவு செய்துள்ளார். இந்தியாவின் முதல் திருநங்கை வழக்கறிஞர் என்ற பெருமையைப் பெற்றுள்ளார். சபாஷ் ஷர்மிளா.

பறக்கும் பந்து
கடந்த, 2018ன் இறுதியில், தங்கத்தை வசப்படுத்தி வெற்றி கொண்டாட்டத்தில் இருந்தார், சிந்து. சீனாவில் நடந்த உலக, 'டூர் பேட்மிண்டன்' இறுதித் தொடரில் உலக சாம்பியன் பட்டம் வென்ற முதல் இந்திய பெண் என்ற வரலாற்று சாதனையை படைத்தார். இந்தியாவின் பெருமையை, மேலும் ஒருபடி உயர்த்தியுள்ளார்!

குத்துச்சண்டை!
பெண்கள் மென்மையானவர்கள்... குத்துச்சண்டையில் அவர்கள் ஜொலிக்க வாய்ப்பே இல்லை, என்ற நிலையை மாற்றியவர் மேரிகோம். இந்தியாவில் மகளிர் குத்துச்சண்டை என்ற பேச்செடுத்தாலே, மேரிகோம் தான் நினைவுக்கு வருவார். டில்லியில் நடந்த, சர்வதேச மகளிர் குத்துச்சண்டை சாம்பியன்ஷிப் போட்டியில், மேரிகோம், ஆறாவது முறையாக, தங்கப்பதக்கம் வென்று, புதிய சாதனை படைத்துள்ளார்.

சறுக்கலில் சிறப்பு!
இந்தியாவின் பெருமை, சறுக்கலிலும் சிறக்கிறது. பனிக் கட்டியில் சறுக்கி சாதித்துள்ளார், ஆஞ்சல் தாகூர். இந்தியாவை உயரத்தில் நிறுத்தியுள்ளார். துருக்கியில் நடைபெற்ற பனிச்சறுக்கு போட்டியில், வெண்கலப் பதக்கம் வென்று பெருமை சேர்த்துள்ளார். சர்வதேசப் பனிச்சறுக்கு போட்டியில், இந்தியாவுக்கு கிடைத்துள்ள முதல் பதக்கம் இது.

உறுதிமொழி!
வெற்றி பெற்ற ஆணின் பின்னால், பெண் இருக்கிறாள்; அவள் தான், அந்த வெற்றியின் மூலதனம். ஆனால், பெண்ணின் வெற்றிக்கு பின்னால், ஆண் இருக்கிறான் என, உறுதியாக சொல்ல முடியாது. அங்கும், பெண் போராடுகிறாள். பெண் முன்னேற, ஆண் துணையாக இருக்க வேண்டும். இதை சபதமாக ஏற்க வேண்டும். இதுவே, மகளிர் தின உறுதிமொழி.

பெண் போர் விமானி!
ஆச்சரியமும், ஆனந்தமும் கலந்து ஆகாயத்தில் பறக்கத் தோன்றுகிறதா... இதோ, நிஜமாகவே பறக்கிறார், 24 வயதான, அவானி சதுர்வேதி; இந்தியாவின் முதல் பெண் போர் விமானி என்ற சிறப்பை பெற்றுள்ளார்.
இவருடன், மோகனா சிங், பாவனா காந்த் ஆகியோரும் விமானப்படையில் சேர்க்கப்பட்டுள்ளனர். போர் விமானங்களை இயக்க, சவால் நிறைந்த, சிறப்பு பயிற்சிகள் அளிக்கப்பட்டுள்ளது.
முதன் முறையாக, 'மிக்-21' ரக போர் விமானத்தை தனியாக இயக்கி, சாதித்துள்ளார் அவானி சதுர்வேதி. முதல் பெண் போர் விமானி என்ற பெருமையையும், தட்டிச் சென்றுள்ளார்.

கண் கலெக்டர்!
கலெக்டர் ஆவது சாதாரண விஷயமில்லை! உடலில் எந்த குறையும் இல்லாதவர்களாலே எளிதில் அடைய முடியாத அசாத்திய கனவு பதவி இது.
இரண்டு வயதில், பார்வையை இழந்த பிரஞ்ஜால் பட்டீல், கலெக்டராகியுள்ளார். கர்நாடகாவைச் சேர்ந்தவர். மன உறுதியால், விடாமுயற்சியுடன் போராடி, குடிமைப்பணி தேர்வில் வென்றார்.
பார்வையற்ற முதல் பெண் கலெக்டர் என்ற பெருமையைத் தட்டிச் சென்றுள்ளார். கேரள மாநிலம், எர்ணாகுளம் மாவட்ட ஆட்சியர் அலுவலகத்தில், பயிற்சி பெற்று வருகிறார்.

குவியும் பதக்கங்கள்!
ஆஸ்திரோலியாவில், கடந்த ஆண்டு நடந்த காமென்வெல்த் போட்டியில், இந்தியா, 26 தங்கப் பதக்கங்களை அள்ளியது. மொத்தம், 66 பதக்கங்கள் வென்று, சர்வதேச அளவில், மூன்றாவது இடத்தை பிடித்தது.
பெண்களுக்கான பளு துாக்கும் போட்டியில், மீராபாய் சாய்கோம் சானு, முதல் தங்கம் வென்றார். மல்யுத்தத்தில், வீராங்கனை சாக் ஷி மாலிக், குத்துச் சண்டையில், மேரிகோம், துப்பாக்கி சுடும் போட்டியில், ஹீணா சித்து, 69 கிலோ எடைப் பிரிவில், பூனம்யாதவ் ஆகியோர் தங்கம் வென்றார்.
பேட்மிண்டன் ஒற்றையர் பிரிவில் சாய்னா நேவால் தங்கமும், பி.வி.சிந்து வெள்ளி பதக்கமும் வென்றனர்.
ஸ்குவாஷ் போட்டியில் சென்னையை சேர்ந்த, தீபிகா பல்லிகல் - ஜோஸ்னா ஜோடி வெள்ளிப் பதக்கம் வென்றது.
-
நன்றி-சிறுவர் மலர்