சொத்து விவரங்களை தாக்கல் செய்யாத 343 ஐஏஎஸ் அதிகாரிகள்

ias-ips
நாடு முழுவதும் 343 ஐஏஎஸ் அதிகாரிகள் சொத்து விவரங்களை
மத்திய அரசிடம் இன்னமும் தாக்கல் செய்யாமல் உள்ளனர்.
அவர்களில் தமிழகத்தைச் சேர்ந்த 5 ஐஏஎஸ் அதிகாரிகளும்
அடங்குவர்.

மத்திய அரசின் விதிகள்படி, ஐஏஎஸ் அதிகாரிகள் தங்களது
சொத்து விவரங்களை ஆண்டுதோறும் அரசிடம் தாக்கல் செய்ய
வேண்டும். அதேபோல், ரூ.5,000-க்கும் அதிக மதிப்புடைய பரிசுகளை
பெறும்போது, அதற்கு மத்திய அரசின் முன் அனுமதியை பெற
வேண்டும்.

உறவினர்களிடம் இருந்து ரூ.25,000-க்கும் அதிக மதிப்பில் பரிசுகள்
வாங்கினாலும், அதை மத்திய அரசுக்கு தெரியப்படுத்த வேண்டும்.

இதனிடையே, கடந்த 2016ஆம் ஆண்டு இணையதளம் மூலம் சொத்து
விவரங்களை ஐஏஎஸ் அதிகாரிகள் தாக்கல் செய்யும் புதிய
நடைமுறையை மத்திய அரசு அமல்படுத்தியது. சொத்து விவரங்களை
தாக்கல் செய்வதை எளிமைப்படுத்தவும், அதிகாரிகள் தாக்கல் செய்யும்
ஆவணங்கள் காணாமல் போவதை தவிர்க்கவும் இந்த ஏற்பாடு
செய்யப்பட்டது.

இதன்படி, ஐஏஎஸ் அதிகாரிகள் தாக்கல் செய்யும் விவரங்கள்,
ஆவணங்கள் அவர்களின் மேலதிகாரிகளுக்கு முதலில் செல்லும்.
பிறகு அந்த விவரங்கள், மேலதிகாரிகளால் மத்திய பணியாளர்
நலன் மற்றும் பயிற்சித்துறை அமைச்சகத்துக்கு அனுப்பி வைக்கப்படும்.

இந்த புதிய முறையின்கீழ், ஐஏஎஸ் அதிகாரிகள் தங்களது சொத்து
விவரங்களை தாக்கல் செய்து வருகின்றனர். இந்நிலையில், கடந்த
2018ம் ஆண்டுக்கான சொத்து விவரங்களை ஐஏஎஸ் அதிகாரிகள்
தாக்கல் செய்வதற்கு ஜனவரி மாதம் 31ஆம் தேதி வரை காலக்கெடு
விதிக்கப்பட்டிருந்தது. இந்த காலக்கெடு முடிந்து, 20க்கும் மேற்பட்ட
நாள்கள் கடந்து விட்டன.

இருப்பினும், நாடு முழுவதும் 343 ஐஏஎஸ் அதிகாரிகள், 2018ஆம்
ஆண்டுக்கான சொத்து விவரங்கள், ஆவணங்களை தாக்கல் செய்யாதது
தெரிய வந்துள்ளது. இதில் அதிகப்பட்சமாக உத்தரப் பிரதேசத்தை
சேர்ந்த ஐஏஎஸ் அதிகாரிகள் 78 பேர் சொத்து விவரங்களை தாக்கல்
செய்யவில்லை.

இதையடுத்து, ஆந்திரம் 22, ஜம்மு-காஷ்மீர் 21, அஸ்ஸாம், மேகாலயா 20,
அருணாசலப் பிரதேசம், கோவா, மிúஸாரம், யூனியன் பிரதேச கேடர்
ஐஏஎஸ் அதிகாரிகள் 18, ராஜஸ்தான் 18, மேற்குவங்கம் 17, தமிழகம் 5,
தெலங்கானா 6, கர்நாடகம் 8 உள்ளிட்ட ஐஏஎஸ் அதிகாரிகளும் த
ங்களது சொத்து விவரங்களை தாக்கல் செய்யவில்லை.

மத்திய பணியாளர் நலன் மற்றும் பயிற்சித் துறை அமைச்சகத்திடம்
இருக்கும் புள்ளிவிவரங்களில் மேற்கண்ட தகவல் தெரிவிக்கப்பட்டுள்ளது.

இதனைத் தொடர்ந்து, சொத்து விவரங்களை தாக்கல் செய்யாத
ஐஏஎஸ் அதிகாரிகளுக்கு மத்திய பணியாளர் நலன் மற்றும் பயிற்சித்
துறை அமைச்சகத்திடம் இருந்து பலமுறை நினைவூட்டல் குறிப்புகள்
அனுப்பப்பட்டுள்ளன.

கடைசியாக கடந்த 7ஆம் தேதியும் நினைவூட்டல் குறிப்பு
அனுப்பப்பட்டுள்ளது. அதில், சொத்து விவரங்களை தாக்கல்
செய்யவில்லையெனில், கடுமையான விளைவுகளை சந்திக்க
வேண்டியிருக்கும் என்று ஐஏஎஸ் அதிகாரிகளுக்கு எச்சரிக்கை
விடுக்கப்பட்டுள்ளது.
-
----------------------------------------
தினமணி