சிபிஐக்கு சுப்ரீம் கோர்ட் கண்டனம்: நாகேஸ்வர ராவ் ஆஜராக உத்தரவு

புதுடில்லி:
பீஹாரின் முசாபர்புர் காப்பகத்தில் சிறுமி பலாத்காரம்
செய்யப்பட்ட வழக்கை விசாரித்த அதிகாரியை அனுமதி
இல்லாமல் இடமாற்றம் செய்ததற்கு கண்டனம்
தெரிவித்துள்ள சுப்ரீம் கோர்ட், இது தொடர்பாக சிபிஐ
இடைக்கால இயக்குனராக இருந்த நாகேஸ்வர ராவ்,
வரும் 12ம் தேதி ஆஜராக உத்தரவு பிறப்பித்து உள்ளது.

இடமாற்றம்

பீஹாரின் முசாபர்புரில் இயங்கி வந்த காப்பகத்தில்,
ங்கியிருந்த சிறுமிகள் பலாத்காரம் செய்யப்பட்டனர்.
இது தொடர்பாக, 10 பேர் கைதாகியுள்ளனர். வழக்கை
சிபிஐ அதிகாரிகள் விசாரணை நடத்தி வருகின்றனர்.

இந்நிலையில், சிபிஐ இடைக்கால இயக்குனராக,
நாகேஸ்வர ராவ் பதவி வகித்த போது, சில அதிகாரிகளை
இடமாற்றம் செய்தார். இதில், பலாத்கார வழக்கை
விசாரித்த ஏகே சர்மாவும் அடங்குவார். இடமாற்றத்தை
எதிர்த்து சுப்ரீம் கோர்ட்டில் வழக்கு தொடரப்பட்டது.

உத்தரவு மீறல்

இதனை விசாரித்த தலைமை நீதிபதி ரஞ்சன் கோகோய்
தலைமையிலான அமர்வு, விசாரணை அதிகாரியான
ஏகே சர்மாவை இடமாற்றம் செய்தது ஏன்? இது குறித்து,
சுப்ரீம் கோர்ட்டிற்கு தகவல் தெரிவிக்கப்பட்டதா?

பீஹார் தலைமை செயலர் இங்கு ஆஜராக உத்தரவிட
நேரிடும். இடமாற்றம் செய்யக்கூடாது என்ற உத்தரவை
மீறி, அதிகாரி மாற்றப்பட்டது குறித்து சிபிஐ விளக்க
வேண்டும்.

கோர்ட்டுடன் ஆலோசனை நடத்தாமல், ஏகே சர்மா
இடமாற்றம் செய்யப்பட்டு உள்ளார். இதன் மூலம் கோர்ட்
அவமதிப்பில் நாகேஸ்வர ராவ் ஈடுபட்டதற்கான
முகாந்திரம் உள்ளது.

நாகேஸ்வர ராவ், வரும் 12ம் தேதி நேரில் ஆஜராக
வேண்டும். அதிகாரி இடமாற்றம் செய்த விவகாரத்தை
நாங்கள் தீவிரமாக எடுத்து கொண்டு உள்ளோம்.

நீங்கள் கோர்ட் உத்தரவுடன் விளையாடி உள்ளீர்கள்.
உங்களை கடவுள் தான் காப்பாற்ற வேண்டும். யாரும்
சுப்ரீம் கோர்ட் உத்தரவுடன் விளையாடக் கூடாது
எனக்கூறினர்.

டில்லிக்கு மாற்றம்

இதனிடையே, பாட்னா சிறப்பு கோர்ட்டில் நடந்த
வழக்கு விசாரணையை டில்லி கோர்ட்டிற்கு மாற்றி
சுப்ரீம் கோர்ட் உத்தரவிட்டது. மேலும், 2 வாரத்தில்
விசாரணையை துவங்கி 6 மாதத்திற்குள் முடிக்க
வேண்டும் எனவும் உத்தரவு பிறப்பித்து உள்ளது.
-
----------------------------
தினமலர்