ஆஸ்திரேலிய ஓபன் டென்னிஸ்: செரீனாவுக்கு அதிர்ச்சி அளித்தார், பிளிஸ்கோவா

-
மெல்போர்ன்,

‘கிராண்ட்ஸ்லாம்’ அந்தஸ்து பெற்ற ஆஸ்திரேலிய
ஓபன் டென்னிஸ் போட்டி மெல்போர்ன் நகரில் நடந்து
வருகிறது.

இதில் பெண்களுக்கான கால்இறுதியில் முன்னாள்
நம்பர் ஒன் வீராங்கனைகள் அமெரிக்காவின்
செரீனா வில்லியம்சும், செக்குடியரசின்
கரோலினா பிளிஸ்கோவாவும் நேற்று பலப்பரீட்சையில்
இறங்கினர்.

முதல் இரு செட்டுகளை இருவரும் தலா ஒன்று வீதம்
வசப்படுத்திய நிலையில் கடைசி செட்டில் அனல் பறந்தது.

23 கிராண்ட்ஸ்லாம் வென்ற அனுபவசாலியான
செரீனா வில்லியம்ஸ் கடைசி செட்டில் 5-1 என்ற கணக்கில்
முன்னிலை பெற்று வெற்றியின் விளிம்புக்கு வந்தார்.

அதன் பிறகு எழுச்சி பெற்ற பிளிஸ்கோவா வரிசையாக
புள்ளிகளை சேர்த்தார். 4 முறை எதிராளியின்
‘மேட்ச் பாயிண்ட்’ ஆபத்தில் இருந்து தப்பித்த
பிளிஸ்கோவா, முடிவில் செரீனாவுக்கு அதிர்ச்சி அளித்தார்.

2 மணி 10 நிமிடங்கள் நீடித்த இந்த மோதலில் பிளிஸ்கோவா
6-4, 4-6, 7-5 என்ற செட் கணக்கில் வெற்றி பெற்று,
ஆஸ்திரேலிய ஓபனில் முதல்முறையாக அரைஇறுதிக்கு
முன்னேறினார்.

சரிவில் இருந்து மீண்ட வகையில் தனது வாழ்க்கையில்
மிகச்சிறந்த ஆட்டம் இது தான் என்று பிளிஸ்கோவா
குறிப்பிட்டார். குழந்தை பெற்றுக்கொண்டு களம்
திரும்பிய பிறகு செரீனா எந்த கிராண்ட்ஸ்லாம் பட்டமும்
வெல்லவில்லை என்பது குறிப்பிடத்தக்கது.
-
-------------------------
தினத்தந்தி