24 மணிநேரம் கெடு: ரூ.100 கோடி டெபாசிட் செய்ய வோக்ஸ்வேகன் நிறுவனத்துக்கு தேசிய பசுமைத் தீர்ப்பாயம் உத்தரவு

இந்தியாவில் சுற்றுப்புறச் சூழல் மாசு ஏற்படுத்தியதற்காக விதிக்கப்பட்ட அபராதத்தைச் செலுத்தாமல் தாமதித்து வந்த நிலையில், அடுத்து 24 மணிநேரத்தில் ரூ.100 கோடியை டெபாசிட் செய்ய வேண்டும் என்று வோக்ஸ்வேகன் நிறுவனத்துக்கு தேசிய பசுமைத் தீர்ப்பாயம் உத்தரவிட்டுள்ளது.

கடந்த 2015-ம் ஆண்டு டிசம்பர் மாதம் ஜெர்மனியைச் சேர்ந்த வோக்ஸ்வேகன் இந்தியா கார் நிறுவனம், தான் தயாரித்த 3 லட்சத்து 23,700 கார்களை திரும்பப் பெறுவதாக அறிவித்தது. ஆட்டோமொபைல் ஒழுங்குமுறை ஆணையம் நடத்திய ஆய்வில், இந்திய விதிமுறைகளுக்கு மாறாக, நைட்ரஜன் ஆக்ஸைடு வாயுக்களை 2.6 மடங்கு அதிகமாக வெளியேற்றியதும், அதை மறைக்க சில மென்பொருட்களையும் வோக்ஸ்வேகன் பயன்படுத்தியதும் தெரியவந்தது.

இதையடுத்து தேசிய பசுமைத் தீர்ப்பாயத்தில் வோக்ஸ்வேகன் இந்தியா நிறுவனத்தின் மீது தொடரப்பட்ட வழக்கில் தேசிய பசுமைத் தீர்ப்பாயம் தீர்ப்பளித்தது. அதில் மத்திய மாசுக் கட்டுப்பாடு வாரியத்தில் வோக்ஸ்வேகன் இந்தியா நிறுவனம் ரூ.100 கோடி டெபாசிட் செய்ய வேண்டும் என்று கடந்த ஆண்டு நவம்பர் 16-ம் தேதி உத்தரவிட்டது.

ஆனால், இந்த உத்தரவு பிறப்பித்து 2 மாதங்கள் ஆகியும் வோக்ஸ்வேகன் நிறுவனம் அந்தப் பணத்தை மத்திய மாசுக்கட்டுப்பாடு வாரியத்தில் டெபாசிட் செய்யவில்லை.


இதையடுத்து, தேசிய பசுமைத் தீர்ப்பாயத்தின் தலைவர் ஆதர்ஷ் குமார் கோயல் தலைமையிலான அமர்வு முன் இந்த வழக்கு இன்று விசாரணைக்கு வந்தது. அப்போது, வோக்ஸ்வேகன் நிறுவனத்தைக் கண்டித்த தீர்ப்பாயத்தின் தலைவர், தங்கள் உத்தரவுகளுக்கு கீழ்ப்படியாததை சுட்டிக்காட்டி கண்டனம் தெரிவித்தார்.

நீதிபதி எஸ்.பி.வாங்டி காட்டமாகக் கூறுகையில், ''எங்களின் உத்தரவுக்கு எந்தவிதமான தடையும் யாரும் விதிக்காத நிலையில், ஏன் உத்தரவுகளுக்குப் பணியாமல், மதிப்பளிக்காமல் இருக்கிறீர்கள். இனிமேல் உங்களுக்கு நாங்கள் அவகாசம் அளிக்க முடியாது. இன்னும் 24 மணி நேரத்துக்குள் ரூ.100 கோடியை மத்திய மாசுக்கட்டுப்பாட்டுவாரியத்தில் டெபாசிட் செய்து, அதற்கான பிரமாணப் பத்திரத்தை தாக்கல் செய்ய வேண்டும்'' என்று உத்தரவிட்டார்.

முன்னதாக, டெல்லியில் வோக்ஸ்வேகன் கார்கள் மூலம் ஏற்பட்ட மாசுகளின் அளவை ஆய்வு செய்ய தேசிய பசுமைத் தீர்ப்பாயம் 4 பேர் கொண்ட குழு அமைத்திருந்தது. அந்தக் குழு ஆய்வு செய்ததில் ஏறக்குறைய டெல்லியில் மட்டும் வோக்ஸ்வேகன் நிறுவனம் கடந்த 2016-ம் ஆண்டில் 48.678 டன் நைட்ரஜன் ஆக்ஸைடு வெளியிட்டுள்ளது கண்டுபிடிக்கப்பட்டது.

இதையடுத்து, கடந்த வாரம் தீர்ப்பாயம் பிறப்பித்த உத்தரவில், டெல்லியில் மாசு ஏற்படுத்தியதற்காக ரூ.171.34 கோடி செலுத்த உத்தரவிட்டு இருந்தனர் என்பது குறிப்பிடத்தக்கது.

தேசிய பசுமைத் தீர்ப்பாயம் அமைத்த இந்தக் குழுவில் ஏஆர்ஏஐ இயக்குநர் ராஷ்மி உர்த்வார்ஷி, டாக்டர், ஆராய்ச்சியாளருமான நிதின் லப்செட்வர், மத்திய கனரக அமைச்சகத்தின் இயக்குநர் ராம்காந்த் சிங், மத்திய மாசுக்கட்டுப்பாடு வாரியத்தின் செயலர் பிரசாந்த் பார்கவா ஆகியோர் இடம் பெற்றிருந்தனர்.

இந்து தமிழ் திசை