உப்பு நாய்கள் - லக்‌ஷ்மி சரவணகுமார்,

-
இந்த நூலைப்பற்றி சாரு நிவேதிதா எழுதியதில் இருந்து:
-
உலகத் தரமான ஒரு படைப்பு…
-
லக்‌ஷ்மி சரவணகுமாரை தமிழர்கள் கொண்டாடி இருக்க வேண்டும். கொண்டாட வேண்டும். காரணம், யோசாவைப் போலவே இவர் ஒரு ரிக்‌ஷாக்காரனுக்குக் கூட புரியும் படி எழுதியிருக்கிறார். வேசிகளும், பிக்பாக்கெட்டுகளும், கொலைகாரர்களும் நிரம்பியுள்ள இந்த நாவலை அந்த மனிதர்களுக்கே படித்துக் காண்பித்தாலும் அவர்களுக்கு விளங்கும்.

ஏன், இந்த நாவலை வாரந்தோறும் தினத்தந்தியில் தொடராகப் போடலாம். அதாவது, இதன் புரியக்கூடிய தன்மைக்காகச் சொல்கிறேன். ஆனால் அப்படியெல்லாம் எதுவும் இங்கே நடந்து விடாது. ஆபாச நாவல் என்று சொல்லி சனாதனிகள் ஒரே வாரத்தில் தொடரை நிறுத்தி விடுவார்கள். இவ்வளவுக்கும் நாவலில் ஒரு கெட்ட வார்த்தை இல்லை.

என்னுடைய ஒரே ஆச்சரியம், இத்தனை நாளாக ஏன் யாருமே என்னிடம் லக்‌ஷ்மி சரவணகுமார் பற்றிச் சொல்லவே இல்லை? நானே நண்பர்களுக்கு ஃபோன் போட்டுச் சொன்னாலும், அப்படியா, அவரா, பெயரைக் கேள்விப்பட்டிருக்கிறேன், நீங்கள் சொன்னதால படிக்கிறேன் சாரு என்று சொல்லி என்னை மன உளைச்சலுக்கு ஆளாக்குகிறார்கள்.

தாஸ்தயேவ்ஸ்கி, கஸான்ஸாகிஸ், மரியோ பர்கஸ் யோசா, ஓரான் பாமும் போன்றவர்களுக்கு நிகராக இங்கே ஒரு இளைஞர் எழுதி விட்டு அவர் பாட்டுக்கு அமைதியாக கோடம்பாக்கத்தில் துணை இயக்குனராக வேலை செய்து கொண்டிருக்கிறார்.
என்ன தேசம் இது என்று எண்ணத் தோன்றுகிறது. உலகின் மிகப் பெரிய கதைசொல்லியான யோசாவுக்கு நிகராகக் கதை சொல்லக் கூடிய ஒரே ஒரு ஆள் இங்கே உண்டா என்று நீண்ட காலமாகக் காத்துக் கொண்டிருந்தேன். இதோ இங்கே லக்‌ஷ்மி சரவணகுமார்.

லக்‌ஷ்மி, நான் எவ்வளவு உசத்தியாக எழுதினாலும் உன் எழுத்து அதை விட உயரத்தில் நிற்கிறது. உன்னை நினைத்துப் பெருமைப்படுகிறேன். விரைவில் நீ உலக அளவில் கொண்டாடப்படுவாய்
---
நன்றி-சாரு வலைதளம்

----
இலட்சுமி சரவணகுமார் (Lakshmi Saravanakumar)
ஒரு தமிழ் எழுத்தாளர் ஆவார்.

கதை கவிதை, கட்டுரை, விமர்சனம் என பன்முக படைப்புகளைத்
தருபவர். இவர் இதுவரை மூன்று நாவல்களையும், முப்பதுக்கும்
மேற்பட்ட சிறுகதைகளையும் எழுதியுள்ளார்.

திரைப்பட உதவி இயக்குநராக பணிபுரிகிறார்.

‘மயான காண்டம்' எனும் குறும்படம் மூலம் சர்வதேச அளவில்
பிரபலமான சரவணகுமார், 'கானகன்' என்ற நாவலுக்கு சாகித்ய
அகாடமியின் 'யுவ புரஸ்கார்' விருது வென்றவராக அறியப்
படுகிறார்.

இவர் எழுதிய உப்பு நாய்கள் என்ற புதினத்துக்காக
2012ஆம் ஆண்டுக்கான சுஜாதா நினைவு விருது பெற்றுள்ளார்
-
----------------------------
நன்றி
தமிழ் விக்கிபீடியா