உங்களை முழுமைப் படுத்துங்கள்!

"சிறப்பாக நிர்வாகம் நடத்தி சாதிப்பேன்'' என சபதம் ஏற்று செயல்படுபவரா நீங்கள்? உங்களுக்கான பல்வேறு நிர்வாக மேலாண்மைப் பண்புகளை தொகுத்து வழங்கும் பகுதி இது.

இதுவரை நிர்வாகம், நிர்வாகி, பொறுப்பாளர், ஊழியர், வாடிக்கையாளர் ஆகியவை பற்றியும், பணிச்சூழல், ஊழியர்- வாடிக்கையாளரை ஊக்குவித்தல், குறைகள்- தேவையை நிறைவேற்றுதல், எதிர்கால திட்டமிடல், உற்பத்தியின் தரம் என நிர்வாகத்தின் பல்வேறு தளங்களையும் அலசி ஆராய்ந்தோம். இறுதியாக நிர்வாகியிடம் இருக்க வேண்டிய பண்புகளையும், அவற்றை வளர்ப்பது பற்றியும் அறிந்து கொள்ளலாம்.

* நிர்வாகி என்பவர் திறந்த மனதுடன் இருக்க வேண்டும். பேச்சு, செயல் இரண்டும் வெளிப்படையாகவும், தெளிவாகவும் இருக்க வேண்டும்.

* முடிவு எடுக்கும்போது பின்புலங்களை நிர்வாகத்தில் உள்ள அனைவருக்கும் விளக்க வேண்டும். உதாரணமாக ஆட்குறைப்பு நடவடிக்கையில் ஈடுபட்டால் ஒவ்வொருவருக்கும் தெளிவாக விளக்கம் அளிப்பதோடு, அவர்களின் கருத்துக்களையும் பரிசீலிக்க தவறக்கூடாது.

* ஊழியர்களின் பணித்திறனை மதிப்பீடு செய்யும்போது, நேர்மையான அணுகுமுறையை கையாள வேண்டும். ஓரவஞ்சனையாக செயல்பட்டால், ஊழியர்களின் செயல்பாடு நிர்வாகத்தில் பின்னடைவை ஏற்படுத்தும்.

* அவ்வப்போது பணியாளர்களுடன் நிர்வாகம் குறித்த கருத்துக்களைப் பகிர்ந்து கொள்ள வேண்டும். இதனால் அவர்கள் நிர்வாகி தங்களின் தலைமையே தவிர அன்னியமானவர் அல்ல என்ற உணர்வுடன் சிறப்பாக பணியாற்றுவார்கள்.

* பிறரிடம் உழைப்பை வாங்கும் நிர்வாகியும், உண்மையையும், உழைப்பையும் கொடுக்க வேண்டும்.

* நிர்வாகியான நீங்கள் எடுக்கும் முடிவு உங்களின் நம்பிக்கையையும், மதிப்பீடு, செயல்பாடுகளையும் வெளிப்படுத்துவதாக, உறுதியாக அமைய வேண்டும்.

* உங்களின் வாக்குறுதிகளை நிறைவேற்ற வேண்டும். பொறுப்புணர்வுடன் செயல்பட வேண்டும்.

* நிர்வாகியிடம் நிர்வாகம் சம்பந்தப்பட்ட அனைத்து தரப்பு விஷயங்களும் வரும். அவற்றை ஒளிவுமறைவின்றி பரிசீலிக்க வேண்டும். இதில் ஊழியர்களின் புகார்களும் அடக்கம். புகாரை விசாரிக்கும்போது எவரையும் பகிரங்கமாக குற்றம்சாட்டாமல் குறையை நீக்க முயல வேண்டும்.

* பலதரப்பு விஷயங்களையும் சிந்திப்பதோடு, பலன் தரக்கூடிய முடிவுகளை ஆராய்ந்து உடனடியாக செயலுக்கு கொண்டு வரவேண்டும்.

* குறைகள் தென்படும்போதும், பின்னடைவு ஏற்படும்போதும் மெத்தனம் காட்டாமல் சரிசெய்துவிட வேண்டும்.

* அதிகாரியானாலும் சர்வாதிகாரம் செலுத்தக் கூடாது. ஆணையிட்டு பணி வாங்குவது சிறந்த ஆளுமைதான். ஆனால் அடக்கி ஆள நினைத்து செயல்பட்டால் முரண்பாடு ஏற்படும்.

* வளர்ச்சிக்குத் தேவையான பல விஷயங்களையும் அறிந்து வைத்திருக்க வேண்டும். அதற்காக எல்லா விதமான விஷயங்களையும் காதில் வாங்கிக் கொள்ள வேண்டும். கேட்கும் திறமையை வளர்த்துக் கொண்டால் பொறுமை வந்துவிடும். தொடர்ந்து ஆளுமையும் வந்துவிடும். பிறகு வெற்றியைத் தந்துவிடும்.


* கேட்கும் திறமையை வளர்க்க வேண்டுமானால், சொல்பவரின் முகம், கண்ணைப்பார்த்து கவனியுங்கள். இடையில் பேசாதீர்கள். தெளிவு பெற வேண்டிய விஷயத்தை மீண்டும் கேட்டு தெளிவு பெறுங்கள்.

* கேட்பது என்றால் எல்லாவற்றையும் அப்படியே நம்புவது இல்லை. வதந்தியாக வரும் தகவல்களையும் கவனிக்க வேண்டும். ஆனால் எளிதில் நம்பிவிடக் கூடாது.

* பணியாளர்களை பாராட்டி, ஊக்குவிக்கத் தவறக் கூடாது. சமீபகாலமாக பணியாளர்களையே பங்குதாரர்களாக ஆக்கும்படியான ஊக்குவிப்பு முறையும் பரவி வருகிறது. அது ஒரு வகையான யுக்தியே தவிர, நிர்வாகி நிர்வாகிதான்.

* பணியாளர்களுக்கு போதுமான வசதிகளையும், ஓய்வையும் ஏற்படுத்தித் தரவேண்டும். உங்கள் தரப்பில் இருந்து அவர்களுக்கு சென்றடைய வேண்டிய உதவிகள் எப்போதும் பாக்கி இருக்கக்கூடாது.

* இப்படி மேற்படி எல்லாம் சிறப்பாக செயல்பட்டாலும் நிறுவனம் ஏற்ற இறக்கங்களை காணும். உங்களைப்போல பலரும் செயல்படுவதால் மாறுதலையும் ஏற்றுக் கொள்ளும் மனப்பக்குவம் வேண்டும். அதில் மாறாமல் நிலைக்கவும் பல புதிய மாற்றங்களை புகுத்த வேண்டும்.

மேற்கண்ட பண்புகளில் உங்களில் இருக்கும் பண்புகள் எவை, வளர்க்க வேண்டிய பண்புகள் எவை என்பதை மதிப்பீடு செய்து உங்களை முழுமைப்படுத்திக் கொள்ளுங்கள். நீங்கள் செய்யும், தொடங்கும் நிர்வாகமும் முழுமை பெறும். வளர்ச்சி கூடும்.