எனக்குப் புரியும் மொழியில் பேசமுடியுமா?- மாநிலங்களவையில் துணை சபாநாயகரிடம் கனிமொழி காட்டம்

உயர் சாதி ஏழைகளுக்கு 10% இட ஒதுக்கீடு வழங்கும் சட்ட
மசோதாவைக் கண்டித்து மாநிலங்களவையில் திமுக
எம்.பி. கனிமொழி தனது கருத்துகளைப் பதிவு செய்தார்.

அரசு வேலை வாய்ப்பு மற்றும் உயர் கல்வி நிறுவன
சேர்க்கையில் உயர் சாதி ஏழைகளுக்கு (பொதுப் பிரிவினர்)
10 சதவீத இட ஒதுக்கீடு வழங்க வகை செய்யும் அரசியல்
சாசன (124-வது சட்டத் திருத்த) மசோதா மக்களவையில்
செவ்வாய்க்கிழமை அன்று நிறைவேற்றப்பட்டது.

மாநிலங்களவையில் இதுதொடர்பான விவாதம் நேற்று
நடந்தது. அதில் பேசிய திமுக எம்.பி. கனிமொழி,
''10 சதவீத இட ஒதுக்கீடை அளிக்க மத்திய அரசு எதனால்
முடிவெடுத்தது? எனக்குப் புரியவில்லை.

மக்களவைத் தேர்தலுக்கு இன்னும் 100 நாட்கள் மட்டுமே
இருக்கின்றன என்பது மட்டும் புரிகிறது.

அரசியல் சட்டத் திருத்த மசோதாவான இட ஒதுக்கீடு
மசோதாவை, தேர்வுக்குழுவுக்கோ, நிலைக்குழுவுக்கோ
அனுப்பப்படாமல் நிறைவேற்ற முயல்கின்றனர்.
இதுதான் இன்று அரசியலமைப்புக்கும் இந்தியாவுக்கும்
நிகழ்கிறது.

நான் இந்த மசோதாவை எதிர்க்கிறேன். நான் பெரியார்
மண்ணில் இருந்து வந்திருக்கிறேன். எங்கள் மண்ணுக்கு
100 ஆண்டுகளுக்கும் மேலாக சமூக நீதியை அளித்த
வரலாறு உண்டு.

பெண்களுக்கு வாக்குரிமை அளித்த முதல் மாநிலம்
தமிழ்நாடுதான். பிற்படுத்தப்பட்டோருக்கு இட ஒதுக்கீடு
அளிப்பது கருணை அடிப்படையில் அல்ல.

அது அவர்களின் உரிமை. பொருளாதார ரீதியில் நிகழும்
புறக்கணிப்பு என்பதை விட, சாதிய ரீதியிலான
புறக்கணிப்புகள் அதிகமாக இருக்கின்றன.
அவர்கள் மீதான அடக்குமுறைகள் வலுவாக உள்ளன.

உங்களால் மதம் மாற முடியும், பொருளாதாரத்தையும்
மாற்ற முடியும். ஆனால் சாதியை மாற்றிக் கொள்ள
முடியாது'' என்றார்.

இதுகுறித்து மேலும் பேசிய கனிமொழியிடம், நேரம்
முடிந்துவிட்டது என்று கூறிய துணை சபாநாயகர்,
விரைவில் உரையை முடிக்குமாறு இந்தியில் கூறினார்.

அதற்கு கனிமொழி, "எனக்குப் புரிகின்ற மொழியில்
பேசமுடியுமா?" என்று கேட்க,
பின்னர் துணை சபாநாயகர் ஆங்கிலத்தில் பேசினார்.

இதுதொடர்பான வீடியோ இணையத்தில் வைரலாகி
வருகிறது.
--
-------------------------------
இந்து தமிழ் திசை

துணிச்சலான பேச்சு , அரசியல் சதுரங்கத்தில் நுழைய விரும்பவில்லை.