ரூ.2 கோடி எப்ப தருவீங்க? அரசுக்கு வீராங்கனை கேள்வி

சண்டிகர்,:

துப்பாக்கி சுடுதல் போட்டியில், தங்கப் பதக்கம் வென்ற
வீராங்கனை, மனு பகேர், 'ஹரியானா மாநில அமைச்சர்
அறிவித்த, 2 கோடி ரூபாய் பரிசு உண்மையில் கிடைக்குமா?'
என, 'டுவிட்டர்' சமூக தளத்தில் கேள்வி எழுப்பியதால்
சர்ச்சை எழுந்துள்ளது.

ஹரியானா மாநிலத்தில், முதல்வர் மனோகர் லால் கட்டார்
தலைமை யில், பா.ஜ., ஆட்சி நடக்கிறது. இந்த மாநிலத்தைச்
சேர்ந்தவர், மனு பகேர், 16;

துப்பாக்கி சுடுதல் வீராங்கனை.இவர், காமன்வெல்த்,
இளைஞர் ஒலிம்பிக் உள்ளிட்ட போட்டிகளில், துப்பாக்கி
சுடுதல் பிரிவில், இந்தியா சார்பில் பங்கேற்று, தங்கப்
பதக்கங்களை வென்றுஉள்ளார்.

கடந்த, 2018 அக்டோபரில் நடந்த இளைஞர் ஒலிம்பிக்கில்,
துப்பாக்கி சுடுதல் போட்டியில், மனு பகேர் தங்கப் பதக்கம்
வென்றார்.இதையடுத்து, 'மனு பகேரை கவுரவிக்கும் வகையில்,
ஹரியானா மாநில அரசு சார்பில், 2 கோடி ரூபாய் பரிசு
வழங்கப்படும்' என, பா.ஜ.,வைச் சேர்ந்த, அம்மாநில
விளையாட்டுத் துறை அமைச்சர், அனில் விஜ் தெரிவித்தார்.

ஆனால் இதுவரை, மனு பகேருக்கு பரிசு வழங்கப்படவில்லை.
இந்நிலையில் நேற்று, மாநில அமைச்சர் அனில் விஜ்
வெளியிட்ட அறிவிப்பை மேற்கோள் காட்டி, டுவிட்டரில்,
வீராங்கனை மனு பகேர், 'சார், நீங்கள் கூறியது உண்மைதானா;
எனக்கு, 2 கோடி ரூபாய் பரிசு உண்மையிலேயே கிடைக்குமா?'
என, பதிவிட்டார்.

இதற்கு, அமைச்சர் அனில் விஜ், 'டுவிட்டர்' சமூக தளத்தில்
கூறியதாவது:பொது வெளியில் இத்தகைய கருத்தை
தெரிவிப்பதற்கு முன், மாநில விளையாட்டுத் துறை
அமைச்சகத்தை, மனு பகேர் அணுகி இருக்க வேண்டும்.

அதை விடுத்து, மாநில அரசை விமர்சித்து இருப்பது
முறையன்று.இந்த மாத இறுதிக்குள், உங்களுக்கு, மாநில அரசு
அறிவித்த, 2 கோடி ரூபாய் பரிசு வழங்கப்படும்.இவ்வாறு அவர்
பதிலளித்தார்.
-
-------------------------------------------
தினமலர்