மறைந்த 5 ரூபாய் மருத்துவர் ஜெயச்சந்திரனுக்கு பிரதமர் மோடி இரங்கல்

-


வடசென்னை மக்களால் ஐந்து ரூபாய் மருத்துவர் என அன்புடன் அழைக்கப்பட்ட டாக்டர் எஸ்.ஜெயச்சந்திரன் (68) புதன்கிழமை காலமானார். அவரது மறைவுக்கு பிரதமர் மோடி இரங்கல் தெரிவித்துள்ளார்.

அவரது இறுதிச் சடங்குகள் சென்னையில் நேற்று நடைபெற்றது. அவரைப் பற்றிய செய்திகள் நேற்றும், இன்றும் பல உடகங்களில் வெளிவந்தது.

ஊடகங்களில் வெளியான செய்திகளின் மூலம் 5 ரூபாய் மருத்துவர் எஸ். ஜெயச்சந்திரன் பற்றி அறிந்த பிரதமர் நரேந்திர மோடி, அவரது மறைவுக்கு இரங்கல் தெரிவித்துள்ளார்.

மோடி தனது டிவிட்டர் பக்கத்தில் மருத்துவர் ஜெயச்சந்திரன் பற்றி குறிப்பிடுகையில், சென்னையைச் சேர்ந்த மருத்துவர் ஜெயச்சந்திரன் ஒரு கதாநாயகன். மற்றவர்களின் நலனுக்காகவே அவர் தனது வாழ்நாளை அர்ப்பணித்துள்ளார் என்று குறிப்பிட்டுள்ளார்.

சென்னை வண்ணாரப்பேட்டையைச் சேர்ந்தவர் ஜெயச்சந்திரன். சுமார் 45 ஆண்டுகளுக்கும் மேலாக ஏழை, எளிய மக்களுக்கு வெறும் ஐந்து ரூபாய் கட்டணத்தில் மருத்துவம் பார்த்து வந்தவர். கடந்த சில மாதங்களாக உடல்நிலை பாதிக்கப்பட்டு சிகிச்சை பெற்று வந்த நிலையில் புதன்கிழமை அதிகாலை மாரடைப்பால் அவர் உயிரிழந்தார்.

காஞ்சிபுரம் மாவட்டம், கல்பாக்கத்துக்கு அருகில் உள்ள கொடைப்பட்டினத்தை பூர்வீகமாகக் கொண்ட டாக்டர் ஜெயச்சந்திரன் சாதாரண விவசாயக் குடும்பத்தில் பிறந்தவர். சென்னை மண்ணடியில் பள்ளிப் படிப்பையும் லயோலா கல்லூரியில் பி.எஸ்சி., படிப்பையும் முடித்தார். இதைத் தொடர்ந்து சென்னை மருத்துவக் கல்லூரியில் அவர் எம்.பி.பி.எஸ். பட்டம் பெற்றார்.

45 ஆண்டுகால சேவையில் மக்கள் மருத்துவர்: மருத்துவம் படித்து முடித்தவுடன் 1971-ம் ஆண்டு வண்ணாரப்பேட்டையில் கிளினிக் ஒன்றை எளிமையான கட்டமைப்பில் தொடங்கினார். தொடக்கத்தில் இலவசமாகவே மருத்துவம் பார்க்கத் தொடங்கிய ஜெயச்சந்திரன் அதன் பின்னர் இரண்டு ரூபாய்க்கு சிகிச்சையளித்து வந்தார். காலப்போக்கில் அது ஐந்து ரூபாயாக மாறியது. சிச்சைக்காக வரும் நோயாளிகள் தாமாக முன்வந்து தந்தால்தான் அதையும் பெற்றுக் கொள்வார் எனக் கூறப்படுகிறது.

கைராசி மருத்துவர் என பெயர் பெற்ற ஜெயச்சந்திரன் பல கிராமங்களுக்குச் சென்று இரண்டாயிரத்திற்கும் மேற்பட்ட மருத்துவ முகாம்களை நடத்தியுள்ளார்.

மறைந்த ஜெயச்சந்திரனின் மனைவி டாக்டர் வேணி சென்னை மருத்துவக் கல்லூரி முதல்வராகப் பணியாற்றி ஓய்வு பெற்றவர். இவர்களுக்கு இரு மகன்கள், மகள் உள்ளனர். அவர்கள் அனைவருமே மருத்துவர்கள். அவரது இறுதிச் சடங்குகள் வியாழக்கிழமை பிற்பகலில் நடைபெற்றது.
-
தினமணி

Code:


45 ஆண்டுகால சேவையில் மக்கள் மருத்துவர்: மருத்துவம் படித்து முடித்தவுடன் 1971-ம் ஆண்டு வண்ணாரப்பேட்டையில் கிளினிக் ஒன்றை எளிமையான கட்டமைப்பில் தொடங்கினார். தொடக்கத்தில் இலவசமாகவே மருத்துவம் பார்க்கத் தொடங்கிய ஜெயச்சந்திரன் அதன் பின்னர் இரண்டு ரூபாய்க்கு சிகிச்சையளித்து வந்தார். காலப்போக்கில் அது ஐந்து ரூபாயாக மாறியது. சிச்சைக்காக வரும் நோயாளிகள் தாமாக முன்வந்து தந்தால்தான் அதையும் பெற்றுக் கொள்வார் எனக் கூறப்படுகிறது.



இப்படிப் பட்ட ஒரு நல்லதொரு மருத்துவரை இழந்து விட்டோம்.
மருத்துவர்களுக்கு ஒரு நல்லுதாரணம் அவர் குடும்பத்தாருக்கு
என் ஆழ்ந்த அனுதாபங்கள்.