ஹெலிகாப்டர் பேர வழக்கு: இந்தியாவுக்கு கொண்டுவரப்பட்டார் இடைத்தரகர் கிறிஸ்டியன் மிஷெல்

அகஸ்டா வெஸ்ட்லேண்ட் ஹெலிகாப்டர் பேர வழக்கில்
இடைத்தரகராக செயல்பட்டதாக கூறப்படும்
கிறிஸ்டியன் ஜேம்ஸ் மிஷெல், துபையிலிருந்து இந்தியாவுக்கு
செவ்வாய்க்கிழமை இரவு நாடு கடத்தி கொண்டுவரப்பட்டார்.

இந்தியாவில் குடியரசுத் தலைவர், பிரதமர் உள்ளிட்ட மிக மிக
முக்கியப் பிரமுகர்கள் பயணிப்பதற்காக, இத்தாலியைச்
சேர்ந்த ஃபின்மெக்கானிக்கா நிறுவனத்தின் துணை
நிறுவனமான அகஸ்டா வெஸ்ட்லேண்ட் நிறுவனத்திடம் இருந்து
ரூ.3,100 கோடி மதிப்பில் 12 ஹெலிகாப்டர்களை வாங்குவதற்கு
மத்திய அரசு கடந்த 2010-இல் ஒப்பந்தம் மேற்கொண்டது.

இந்த ஒப்பந்தத்துக்காக, அகஸ்டா வெஸ்ட்லேண்ட் நிறுவனம்
சார்பில் இந்திய தரப்புக்கு ரூ.423 கோடி வரை லஞ்சம்
அளிக்கப்பட்டதாக புகார் எழுந்தது. இதைத் தொடர்ந்து, கடந்த
2014-இல் இந்த ஒப்பந்தம் ரத்து செய்யப்பட்டது.

இந்த முறைகேடு புகார் தொடர்பாக சிபிஐ-யும், அமலாக்கத்
துறையும் விசாரணை மேற்கொண்டு வருகின்றன.

இடைத்தரகர்:

ஹெலிகாப்டர் ஒப்பந்த விவகாரத்தில் 3 இடைத்தரகர்களில்
முக்கிய நபராக குற்றம்சாட்டப்படுபவர் பிரிட்டனைச் சேர்ந்த
தொழிலதிபர் கிறிஸ்டியன் ஜேம்ஸ் மிஷெல் (57).

விமானப்படை முன்னாள் தலைமை தளபதி எஸ்.பி.தியாகி
உள்ளிட்டோருடன் சேர்ந்து குற்றச் சதியில் ஈடுபட்டதாக இவர்
மீது குற்றம்சாட்டு உள்ளது.

இந்தியாவில் விசாரணையை எதிர்கொள்வதை மிஷெல்
தவிர்த்து வந்ததைத் தொடர்ந்து, அவருக்கு எதிராக, பிணையில்
வெளிவர இயலாத பிடியாணையை தில்லி சிறப்பு நீதிமன்றம்
கடந்த 2015-இல் பிறப்பித்தது.

அதனடிப்படையில், சர்வதேச காவல்துறை மூலம் ரெட் கார்னர்
நோட்டீஸ் பிறப்பிக்கப்பட்டது.

இந்நிலையில், துபையில் கடந்த 2017, பிப்ரவரியில் மிஷெல்
கைது செய்யப்பட்டார். அவரை நாடு கடத்தி வருவதற்கான
முயற்சிகளை மத்திய அரசு மேற்கொண்டது.

இதுதொடர்பான வழக்கை விசாரித்த துபை நீதிமன்றம்,
மிஷெலை இந்திய அதிகாரிகளிடம் ஒப்படைப்பது குறித்து
பரிசீலிக்க அந்நாட்டு அதிகாரிகளுக்கு உத்தரவிட்டது.

இதையடுத்து, அந்நாட்டின் உயர்நீதிமன்றத்தில் மிஷெல்
தரப்பில் மேல்முறையீடு செய்யப்பட்டது. ஆனால், அவரது
மனுவை உயர்நீதிமன்றம் நிராகரித்துவிட்டது. இதையடுத்து,
அவரை இந்தியாவுக்கு நாடு கடத்துவதற்கு, ஐக்கிய அரபு அமீரக
அரசு ஒப்புதல் வழங்கியது.

நாடு கடத்தல்

தேசிய பாதுகாப்பு ஆலோசகர் அஜித் தோவல் வழிகாட்டுதலின்
அடிப்படையில், மிஷெலை நாடு கடத்துவதற்கான நடவடிக்கை
மேற்கொள்ளப்பட்டது.

சிபிஐ இடைக்கால இயக்குநர் எம்.நாகேஸ்வர ராவ் இந்த ந
டவடிக்கையை ஒருங்கிணைத்தார்.

சிபிஐ இணை இயக்குநர் சாய் மனோகர் தலைமையிலான
குழுவினரால், துபையில் இருந்து விமானம் மூலம் தில்லிக்கு
செவ்வாய்க்கிழமை இரவு 10.35 மணியளவில் மிஷெல்
கொண்டுவரப்பட்டார்.

அவரை நீதிமன்றத்தில் ஆஜர்படுத்துவதற்கான நடவடிக்கையை
சிபிஐ மேற்கொண்டுள்ளது. அவர் தில்லி விமான நிலையத்தில்
வந்திறங்கியதும், எய்ம்ஸ் மருத்துவமனைக்கு அழைத்துச்
செல்லப்பட்டு, அவருக்கு உடல்நிலை பரிசோதனை
மேற்கொள்ளப்பட்டது. புதன்கிழமை அவர் நீதிபதி முன்
ஆஜர்படுத்தப்படுவார் என்று எதிர்பார்க்கப்படுகிறது
-
----------------------
தினமணி