தூக்கில் தொங்கிய ஆடு - சிறுவர் கதை

by **ayyasamy ram** Sun 2 Dec 2018 - 17:15

ஓநாய் ஒன்று ஆட்டுத் தோலைத் தன் மீது போர்த்திக்
கொண்டது. ஆடு போலவே நடந்த அது ஆட்டு
மந்தையில் சேர்ந்து கொண்டது.

யாரும் அதன் மீது ஐயப்படவில்லை. தனியாகத்
தன்னிடம் சிக்கும் ஆடுகளை வாய்ப்புக் கிடைக்கும்
போதெல்லாம் கொன்று தின்று வந்தது அது.

ஆடுகள் குறைவதைக் கண்ட மேய்ப்பவன் தன் ஆட்டு
மந்தையைக் கண்காணிக்கத் தொடங்கினான்.
ஆட்டுத் தோல் போர்த்திய ஓநாய்தான் காரணம் என்பது
அவனுக்குத் தெரிந்தது.

ஓநாய் ஏமாந்திருந்த சமயம் பார்த்து அதன் கழுத்தில்
கயிற்றை மாட்டினான். அருகில் இருந்த மரத்தில்
அதைக் தொங்கவிட்டான்.

அந்த வழியாக வந்த சிலர் ஆடு தூக்கில் தொங்குவதைக்
கண்டு வியப்பு அடைந்தார்கள். "ஏனப்பா ஆட்டை
இப்படித் தொங்க விட்டிருக்கிறாய்?" என்று கேட்டார்கள்.

உடனே அவன் அந்த ஓநாயின் மேலிருந்த ஆட்டுத் தோலை
நீக்கினான். ஓநாயைக் கண்ட அவர்கள் "உன்னை ஏமாற்ற
முயன்ற ஓநாயைச் சூழ்ச்சி செய்து கொன்று விட்டாயே"
என்று அவனைப் பாராட்டினார்கள்.
-
--------------------------------
நன்றி
thinakaran.lk