வேப்பமரங்களில் மாற்றம்! கிராம மக்களுக்கு ஆச்சரியம்

**T.N.Balasubramanian** · **T.N.Balasubramanian** Tue 27 Nov 2018 - 22:46

மடத்துக்குளம்:வேம்பு மரங்களின், நுண்ணிய குழாய்கள் உடைந்து, வெள்ளை நிற திரவம் வெளியேறுவது கிராம மக்களுக்கு ஆச்சரிய நிகழ்வாக மாறுகிறது.மடத்துக்குளம் அருகே அமராவதி கூட்டுறவு சர்க்கரை ஆலை குடியிருப்பு உள்ளது. இங்கு, 200க்கும் மேற்பட்ட மக்கள் வசிக்கின்றனர்.
இதற்கு அருகில் உள்ள மரங்கள் நிறைந்த நிலத்துக்கு, சிலர் விறகு சேகரிக்க செல்வார்கள். நேற்று காலை 11:00 மணிக்கு சென்ற போது, அங்குள்ள ஒரு வேப்ப மரத்தின் உச்சியில், பால் நிறத்தில், திரவம் சுரந்து, கிளைகளின் வழியாக தரை வரை வடிந்தது. இதை, பார்த்தவர்கள் மரத்தில் பால்வடிவதாக பலருக்கும் தெரிவித்தனர். அங்கு வந்த மக்கள் மரத்தை வழிபட்டனர்.
பொதுமக்கள் கூறுகையில், 'வேப்ப மரத்தில் பால் வடிவது அதிசயமானது; தெய்வ செயலாக நினைத்து வணங்குகிறோம். சில ஆண்டுகளுக்கு முன்பு, ராமேகவுண்டன்புதுாரில் இதே போல், நடந்தது,' என்றனர்.
தோட்டக்கலைத்துறையினர் கூறுகையில், 'மரத்தினுள் சைலம், புளோயம் என இரண்டு மிக மெல்லிய குழாய்கள் உண்டு. இவை நிலத்திலிருந்து நீரையும், சத்துக்களையும் எடுத்து சென்று மரத்தின் வளர்ச்சிக்கு உதவுகின்றன. ஏதாவது காரணத்தால் குழாய் உடையும் போது, உள்ளிருக்கும் வெள்ளை நிறதிரவம் மரத்தில் வடியும்,' என்றனர்.

நன்றி தினமலர் நவம்பர் 25

ரமணியன்