மேட்டூர் அணை உபரி நீர் மூலம் ஏரிகளை நிரப்பும் திட்டம் விரைவில் தொடங்கப்படும்: முதல்வர் எடப்பாடி கே.பழனிசாமி தகவல்

மேட்டூர் அணை உபரி நீர் மூலம் மேட்டூர் உள்ளிட்ட நான்கு சட்டப்பேரவைத் தொகுதிகளில் உள்ள ஏரிகளில் தண்ணீர் நிரப்பும் திட்டம் விரைவில் தொடங்கப்படும் என்று முதல்வர் எடப்பாடி கே.பழனிசாமி கூறினார்.
சேலம் மாவட்டம், மேச்சேரியில் மேச்சேரி - நங்கவள்ளி ஊராட்சி ஒன்றியங்களுக்கு ரூ.158 கோடியே 64 லட்சம் மதிப்பிலான கூட்டுக் குடிநீர்த் திட்டத்தை முதல்வர் எடப்பாடி கே.பழனிசாமி சனிக்கிழமை தொடக்கி வைத்தார். இவ் விழாவில் 920 பயனாளிகளுக்கு ரூ. 2.12 கோடி மதிப்பிலான நலத் திட்ட உதவிகளை வழங்கி முதல்வர் பேசியது:
காவிரி - கோதாவரி இணைப்புத் திட்டத்தின் மூலம் தமிழகத்துக்கு 125 டி.எம்.சி. தண்ணீரை வழங்க மத்திய அமைச்சர் நிதின் கட்கரி என்னிடம் உறுதி அளித்துள்ளார்.

நன்றி
தினமணி

மேட்டூர் அணை உபரிநீரை கொண்டு மேட்டூர், ஓமலூர், எடப்பாடி மற்றும் சங்ககிரி சட்டப்பேரவைத் தொகுதிகளில் உள்ள ஏரிகளில் நீர் நிரப்பும் திட்டம் விரைவில் செயல்படுத்தப்படும். இத் திட்டம் குறித்து ஆய்வு மேற்கொள்ளப்பட்டு வருகிறது. சேலம் மாவட்டத்தில் உள்ள மக்களுக்கு பாதுகாக்கப்பட்ட குடிநீர் கிடைக்கும் வகையில் 7 குடிநீர்த் திட்டங்கள் செயல்படுத்தப்படவுள்ளன. மேச்சேரி மற்றும் ஓமலூர் பகுதி விவசாயிகள், பொதுமக்கள் ஒருசேர பயனடையும் வகையில் மிகப் பெரிய காய்கறிகள் சந்தை அமைக்கப்படவுள்ளது. இந்தச் சந்தையில் விவசாயிகள் தங்குமிடம், குளிர்பதனக் கிடங்கு, பயிற்சி மையம் மற்றும் மின்னணு வர்த்தக மையம் அமைக்கப்படும். தக்காளி மற்றும் காய்கறிகள் விலை சரியும் போது அதனை விவசாயிகள் இருப்பு வைத்து விலை உயர்வு கிடைத்த பிறகு கூடுதல் விலைக்கு விற்பதற்காக குளிர்பதன கிடங்கு அமைக்கப்படும். இதற்கு கட்டணம் கிடையாது. விவசாயிகளின் வாழ்வாதாரத்தைப் பாதுகாத்திட தடுப்பணைகள் அமைக்க ரூ.1,000 கோடி ஒதுக்கீடு செய்யப்பட்டுள்ளது. குடிமராமத்துத் திட்டத்தின் கீழ் 1,511 ஏரிகள் தூர்வாரப்பட்டுள்ளன. தொப்பூர் -மேட்டூர், மேட்டூர்- பவானி சாலை நான்குவழிச் சாலையாக மாற்றப்படும். மேச்சேரி - ஓமலூர் சாலை விரிவாக்கம் செய்யப்படும், மேச்சேரியில் புறவழிச் சாலை அமைக்கப்படும். குட்டப்பட்டி, முத்துநாய்க்கன் பட்டி, தொளசம்பட்டி பகுதிகளில் ரயில்வே மேம்பாலங்கள் அமைக்கப்படும். கடந்த 7 ஆண்டுகளில் 4 லட்சம் குடியிருப்புகளுக்கு பாதுகாக்கப்பட்ட குடிநீர் புதிதாக வழங்கப்பட்டுள்ளது என்றார்.
வனவாசியில் நடைபெற்ற விழாவில் முதல்வர் பேசியது:
நங்கவள்ளி பகுதி மக்களின் நீண்ட நாள் கோரிக்கையான பாலிடெக்னிக் கல்லூரி தொடங்கப்பட்டுள்ளது. இதன் மூலம் ஏழை, எளிய மாணவர்கள் உயர்கல்வி பெறும் நிலை உருவாகி உள்ளது. சாலை வசதி, போக்குவரத்து வசதி என்று மக்கள் கோரிக்கைகள் உடனடியாக நிறைவேற்றப்பட்டு வருகின்றன என்றார்.
இந்த நிகழ்ச்சியில், மாவட்ட ஆட்சியர் ரோகிணி ராம்தாஸ், மேச்சேரி ஊராட்சி ஒன்றியக் குழு முன்னாள் தலைவர் சந்திரசேகரன் மற்றும் எம்.பி.க்கள், எம்.எல்.ஏ.க்கள் பங்கேற்றனர்.