மேற்கூரை சூரியசக்தி மின்சாரத்தை கணக்கிட, 'கிராஸ் மீட்டரிங்' முறை

தமிழகத்தில், வீடு உள்ளிட்ட கட்டுமானங்களில் அமைக்கப்படும்
மேற்கூரை சூரியசக்தி மின் நிலையங்களில், உற்பத்தியாகும்
மின்சாரத்தை, உரிமையாளர் பயன்படுத்தியது போக,
உபரியை, மின் வாரியத்திற்கு விற்கலாம்.

இதற்காக, அந்த இடங்களில், மின் வாரியம், 'நெட் மீட்டர்'
பொருத்துகிறது.அந்த மீட்டரில், சூரிய சக்தி மின் உற்பத்தி,
அதில் மின் வாரியத்திற்கு வழங்கியது, கட்டட உரிமையாளர்
பயன்படுத்திய மின்சாரம் போன்ற, விபரங்கள் பதிவாகின்றன.

இந்நிலையில், சூரியசக்தி மின் திட்டத்திற்கு சலுகைகள்
வழங்க, டெடா அமைப்பு,
சூரியசக்தி மின்சார கொள்கையை வெளியிட உள்ளது.

இதற்காக, அரசு அலுவலகங்களில், கட்டாய சூரியசக்தி
மின்சார பயன்பாடு உள்ளிட்ட அறிவிப்புகள் அடங்கிய,
வரைவு அறிக்கையை வெளியிட்டு, பலரிடமும் கருத்துகளை
கேட்டுள்ளது.

அதில், 'கிராஸ் மீட்டரிங்' என்ற, புதிய முறையை
அமல்படுத்துவது உள்ளிட்டவை தொடர்பாக, மின் வாரியம்,
கருத்து தெரிவிக்க உள்ளது.

இதுகுறித்து, மின் வாரிய அதிகாரி ஒருவர்கூறியதாவது:

நெட் மீட்டரில், மின் வாரியம், உற்பத்தியாளர் இடையே,
யூனிட் அடிப்படையில், மின்சார கணக்கீடு நடக்கிறது.
அதன்படி, உதாரணமாக ஒருவர், 100 யூனிட் சூரியசக்தி
மின்சாரத்தை, மின் வாரியத்திற்கு தருவதாகவும்,
அவர், 200 யூனிட், மின் வாரிய மின்சாரத்தை பயன்
படுத்துவதாகவும் வைத்து கொள்வோம்.

அவர், 100 யூனிட் சூரியசக்தி மின்சாரம் போக, மீதி
மின்சாரத்திற்கு கட்டணம் செலுத்தினால் போதும்.
இதற்கு மாற்றாக, புதிய முறை அமல்படுத்த, 2017ல்,
ஒழுங்குமுறை ஆணையத்திடம் அனுமதி கோரப்பட்டது.

அதில், சூரியசக்தி மின்சாரம் வாங்கியதற்கான
கட்டணத்தை, மின் வாரியம் முழுவதுமாக செலுத்தி விடும்.
அதே போல், வாரியத்திடம் வாங்கும் மின்சார கட்டணத்தை,
உற்பத்தியாளர் முழுவதுமாக செலுத்த வேண்டும்.

இதற்கு, இதுவரை அனுமதி கிடைக்கவில்லை.
தற்போது, சூரியசக்தி கொள்கையை,டெடா வெளியிட
உள்ளது. அதில், சூரியசக்தி மின்சாரத்தை கணக்கிட,
நெட் மீட்டருக்கு பதில், கிராஸ் மீட்டரிங் பொருத்துமாறு
கருத்து தெரிவிக்கப்பட உள்ளது.

இதன் வாயிலாக, சூரியசக்தி மின் நிலையம் உள்ள இடத்தில்,
இரு மீட்டர்கள் பொருத்தப்படும்.ஒன்றில், சூரியசக்தி
மின்சாரம், மற்றொன்றில், மின் வாரிய மின்சாரம் பதிவாகும்.

அதற்கு ஏற்ப, வாரியத்திற்கு, கட்டணம் செலுத்த வேண்டும்.
அதே போல், மின் வாரியமும், உற்பத்தியாளருக்கு பணம்
வழங்கும். வீடுகளில், 100 யூனிட் இலவசமாகவும், 500 யூனிட்
வரை, மானிய விலையிலும், மின்சாரம் வழங்கப்படுகிறது.

அந்த வீடுகளில், சூரிய சக்தி மின் நிலையம் அமைத்தால்,
ஏற்கனவே, மின்சார சலுகை கிடைப்பதுடன், அவர்களிடம்
வாங்கும் சூரியசக்தி மின்சாரத்திற்கு, மின் வாரியம் பணம்
செலுத்த வேண்டி வரும்.

இதனால், அதிக மின்சாரம் பயன்படுத்தும் வீடுகளில்
மட்டும், சூரியசக்தி மின் நிலையம் அமைக்க அனுமதி தர
வேண்டும் என்பது உள்ளிட்ட கருத்துகளும் தெரிவிக்கப்படும்.

இவற்றை, சூரியசக்தி மின்சார கொள்கை வெளியிடும்
போது, டெடா முழுவதுமாக ஏற்குமா என, தெரியவில்லை.
இவ்வாறு, அவர் கூறினார்.

தினமலர்