சகல ஆத்துமாக்கள் திருவிழா!

by **ayyasamy ram** Sat Nov 03, 2018 7:43 am

-

JESUS_CHRIST
-

மறுநொடி தாம் வாழ்வது நிலையல்ல என அறியாதவர்
எண்ணுகின்ற எண்ணங்கள் பல கோடி. தெய்வப் புலவர்
வள்ளுவர் இவ்வாறு நிலையாமையின் தத்துவத்தைப்
பற்றி உலகப் பொதுமறையாம் திருக்குறளில்
குறிப்பிடுகிறார்.

இதே கருத்தை இயேசு பெருமானும் தம் சீடர்களுக்கு
ஓர் உவமையின் மூலம் உணர்த்துவதாக பைபிளில்
கூறப்பட்டுள்ளது.

செல்வனாயிருந்த ஒருவனின் நிலம் நன்றாய் விளைந்தது.
" என் விளைபொருள்களைச் சேர்த்து வைக்க போதிய
இடமில்லையே. எனவே, என் களஞ்சியங்களை இடித்து
இன்னும் பெரிதாகக் கட்டுவேன்.

அங்கு, என் தானியத்தையும் பொருள்களையும் சேர்த்து
வைப்பேன்'. பின்பு, " என் நெஞ்சமே, உனக்குப் பல்லாண்டு
வேண்டிய பல வகைப் பொருள்கள் வைக்கப்பட்டுள்ளன.
நீ ஓய்வெடு; உனக்கு குடித்து மகிழ்ச்சியில் திளைத்திரு'
எனச் சொல்வேன் எனத் தனக்குள் கூறிக் கொண்டான்.

ஆனால் கடவுள் அவனிடம், " அறிவிலியே, இன்றிரவே
உன்உயிர் உன்னை விட்டுப் பிரிந்திடும். அப்போது
நீ சேர்ந்து வைத்தவை யாருடையவையாகும்?" எனக்
கேட்டார்.

ஆம், கடவுளை நினையாது தமக்காகவே செல்வம்
சேர்ப்போரின் கதி இதுதான். அழியாத ஆன்மாவைக்
கொண்டிருக்கும் நாம் இவ்வுலக வாழ்க்கைக்குப்பிறகு
மறுவுலகில் இறைவனோடு நீடித்த இன்பத்தை அனுபவிக்க
வேண்டும் என்ற எண்ணத்தோடு வாழ்ந்தால் இவ்வுலகில்
போட்டி ஏது? பொறாமை ஏது?

கோடி கோடியாச் சொத்து சேர்த்து வைக்கும் ஊழல்
பெருச்சாளிகள் ஒரு நொடியானது நிலையாமையை
பற்றி சிந்தித்தால், இவ்வுலகில் அநியாயங்களுக்கும்
அக்கிரமங்களுக்கும் இடமேயில்லாது போகும்.

ஆண்டிற்கு ஒரு முறையாவது நிலையாமையை பற்றி
சிந்தித்து, நம் வாழ்வை சீர்படுத்திக் கொள்ள வேண்டும்
என்ற எண்ணத்தோடுதான் கிறிஸ்துவர்கள்
சகல ஆத்துமாக்கள் திருவிழாவை நவம்பர் இரண்டாம்
நாள் கொண்டாடுகின்றனர்.

தம் உற்றார் உறவினர்களின் கல்லறைகளுக்குச் சென்று,
தீபம் ஏற்றி வழிபட்டு, இறைவனுக்கு அருகில் இருக்கும்
பேறு பெற்ற இறந்த ஆன்மாக்களை நோக்கி
மன்றாடுகிறார்கள்.

சுத்தம் செய்யப்பட்ட கல்லறைத் தோட்டத்திற்கு
குருவானவர் சென்று கல்லறைகளை மந்திரிக்கிறார்.
மக்கள் ஆயிரக் கணக்கில் திரிகளை ஏந்தி இறந்து
போன தமக்கு நெருங்கிய உறவினர்களுக்காக,
அவர்களின் ஆன்ம சாந்திக்காக மன்றாடும் காட்சியானது
கல் நெஞ்சினரையும் உருக வைக்கும்.

இவ்வுலக வாழ்க்கையை ஓர் ஓட்டப் பந்தயத்திற்கு
ஒப்பிடுகிறார் தூய பவுலடியார்.

நல்லபடியாக நேரிய வாழ்க்கை வாழும் ஆன்மாக்கள்
இந்த பந்தயத்தில் வெற்றி பெற்று, அவர்களுக்காக
இறைவன் அளிக்கும் வெற்றிவாகையாகிய
மோட்சபேரின்பத்தைத் தமதாக்கிக் கொள்வர்.

நாமும் மனந்தளராமல் வாழ்க்கைப் பந்தயத்தில் ஓடி
வெற்றி பெற எல்லாம் வல்ல இறைவனிடம்
மன்றாடுவோமாக.
-
-----------------------------------
- பிலோமினா சந்தியநாதன்