டி20 தொடர் நாளை தொடக்கம்: வலிமையான மே.இ.தீவுகளை சமாளிக்குமா இந்தியா?

-
india-team-practice1
----------------
டி20 ஆட்டத்தில் உலக சாம்பியன் ஆன வலிமை மிக்க மே.இ.தீவுகளை வெற்றிகொள்ளுமா இந்தியா என எதிர்பார்ப்பு எழுந்துள்ளது.

மே.இ.தீவுகள்-இந்திய அணிகளுக்கு இடையிலான 3 ஆட்டங்கள் கொண்ட டி20 தொடர் ஞாயிற்றுக்கிழமை கொல்கத்தாவில் தொடங்குகிறது.

இந்தியாவில் சுற்றுப்பயணம் செய்து வரும் மே.இ.தீவுகள் அணி டெஸ்ட் தொடரை 2-0 எனவும், ஒரு நாள் தொடரை 3-1 எனவும் இழந்தது.

தற்போது இறுதிக் கட்டமாக 3 ஆட்டங்கள் கொண்ட டி 20 தொடரில் விளையாட உள்ளது. டி20 நடப்பு உலக சாம்பியனாக மே.இ.தீவுகள் உள்ள நிலையில் அந்த அணி ஞாயிற்றுக்கிழமை கொல்கத்தாவில் நடைபெறும் முதல் ஆட்டத்தில் இந்தியாவுடன் மோதுகிறது.

இரண்டு தொடர்களை இழந்த நிலையில் டி20 தொடரையாவது கைப்பற்றி ஆறுதல் வெற்றியுடன் திரும்பும் முனைப்பில் உள்ளது மே.இ.தீவுகள்.
ஒரு நாள் ஆட்டத் தொடரில் அந்த அணி இரண்டு ஆட்டங்களில் தனது திறனை நிரூபித்தாலும், ஏனைய ஆட்டங்களில் சோபிக்கவில்லை.

நான்காவது மற்றும் இறுதி ஆட்டத்துக்கு மூத்த பெளலர்கள் புவனேஸ்வர், பும்ரா ஆகியோர் அணியில் சேர்க்கப்பட்டனர். இது தொடரின் போக்கை மாற்றியது. இந்திய பந்துவீச்சை அந்த அணியால் சமாளிக்க முடியாமல் தோல்வியுற்றது.
தோனி நீக்கம்

அதே நேரத்தில் இரண்டாவது ஒரு நாள் ஆட்டம்நடைபெற்ற போதே, டி20 தொடருக்கான இந்திய அணியை பிசிசிஐ தேர்வுக்குழு அறிவித்தது. எதிர்பாராதவிதமாக விக்கெட் கீப்பர் தோனி அணியில் சேர்க்கப்படவில்லை. இது நாடு முழுவதும் ரசிகர்கள் மத்தியில் அதிர்ச்சியை ஏற்படுத்தியது.

இளம் வீரர் ரிஷப் பந்த்துக்கு வழிவிடும் வகையில் தோனியே டி20 ஆட்டங்களில் இருந்து விலகுவதாக முடிவு செய்தார் என கேப்டன் கோலி தெரிவித்திருந்தார்.

கோலிக்கு ஓய்வு

கேப்டன் கோலிக்கு ஏற்கெனவே தீவிர ஆட்டச்சுமை காரணமாக
இங்கிலாந்து தொடருக்கு பின் ஆசியக் கோப்பையில் ஓய்வு தரப்பட்டது.
பின்னர் மே.இ.தீவுகளுடன் டெஸ்ட் மற்றும் ஒரு நாள் தொடரில்
விளையாடினார்.

தற்போது டி20 தொடரில் ஓய்வு தரப்பட்டுள்ளது.
அவருக்கு பதிலாக ரோஹித் சர்மா கேப்டனாக பொறுப்பு வகிப்பார்.

வலுவான மே.இ.தீவுகள் அணி

டி20 ஆட்டத்தில் சிறப்பான அணியாக உள்ள மே.இ.தீவுகள் இருமுறை உலக சாம்பியன் பட்டம் வென்றுள்ளது. பொல்லார்ட், பிரவோ, ஹோல்டர், பிராத்வொயிட், ரஸ்ஸல், ராம்தின், ஷிம்ரன் ஹெட்மயர் ஆகியோரால் இந்த அணி வலிமையானதாக உள்ளது. மேலும் அந்த அணி வீரர்கள் ஏராளமானோர் ஐபிஎல் போட்டியில் அதிகளவில் ஆடிய அனுபவம் உடையவர்கள்.

முந்தைய உலகக் கோப்பையில் தொடர்ந்து 4 சிக்ஸர் அடித்து தனது அணிக்கு கோப்பையை பெற்றுத் தந்தவர் கேப்டன் காரல் பிராத்வொயிட்.
முன்பு 4 முறை இரு அணிகளும் மோதியதில் மே.இ.தீவுகள் 3 முறை வென்றது.

இந்திய அணியில் ஹார்திக் பாண்டியா, தோனி இல்லாமை போன்றவை சிக்கலை உண்டாகும். இந்த ஆட்ட முறையில் மே.இ.தீவுகளே வலிமையாக உள்ளது குறிப்பிடத்தக்கது.

அணி விவரம்
ரோஹித் சர்மா (கேப்டன்), ஷிகர் தவன், லோகேஷ் ராகுல், தினேஷ் கார்த்திக், மணிஷ் பாண்டே, ஷிரேயஸ் ஐயர், ரிஷப் பந்த், க்ருணால் பாண்டியா, வாஷிங்டன் சுந்தர், சஹால், குல்தீப் யாதவ், புவனேஸ்வர் குமார், பும்ரா, கலீல் அகமது, உமேஷ் யாதவ், ஷபாஸ் நதீம்.
டெஸ்ட், ஒரு நாள் தொடரை வென்ற நிலையில், டி20 தொடரையும் கைப்பற்ற இந்தியா தீவிரமாக முயற்சிக்கும் எனத் தெரிகிறது.

பேட்டிங்கில் கேப்டன் ரோஹித் சர்மா சிறப்பான பார்மில் உள்ளார். ஷிகர் தவன் தடுமாற்றத்துடன் ஆடி வருகிறார். லோகேஷ் ராகுல், ஐபிஎல் போட்டிகளில் ஆடிய மணிஷ் பாண்டே, ஷிரேயஸ் ஐயர், ரிஷப் பந்த் உள்ளிட்டோர் அணிக்கு பலம் சேர்ப்பர்.
-
தினமணி