தங்கம் வென்ற தன்னம்பிக்கை வீரர்!

ராணுவத்தில் பணிபுரியும் ஜவானான கு.ஆனந்தன்,
சில ஆண்டுகளுக்கு முன் ஜம்மு காஷ்மீர், குப்பவாரா
மாவட்டத்தில் தும்பா எனும் ஊரில் நடைபெற்ற போரில்
கன்னிவெடி தாக்குதலில் தனது இடது காலை இழந்தார்.

அதன் பின் இந்திய இராணுவத்தில் அவருடன் பணியில்
இருந்த சில நல் இதயங்களின் உதவியின் மூலம் கிடைத்த
செயற்கை காலுடன் தடகளப் பயிற்சி பெற்று பின்னர்,
இவர், சர்வதேச பாரா வீரர்கள் கலந்து கொள்ள
ஆரம்பித்தார்.

தடகள போட்டிகளில் இந்திய ராணுவத்தின் சார்பில்
100 மீட்டர், 200 மீட்டர் மற்றும் 400 மீட்டர் ஓட்டபந்தயங்களில்
செயற்கை காலுடன் கலந்து கொண்டு, இதுவரை 13 தங்க
பதக்கங்களையும், 9 வெள்ளி பதக்கங்களையும்
பெற்றுள்ளார்.

2015 -ஆம் ஆண்டு கொரியாவில் நடைபெற்ற பாரா
வீரர்கள் போட்டியில் உலகளவில் 184 நாடுகளிலிருந்து
ராணுவ வீரர்கள் கலந்து கொண்ட னர்.

அதில், இந்தியாவிலிருந்து கலந்து கொண்ட 142 வீரர்களில்
இவரும் ஒருவராக கலந்து கொண்டார். 200 மீட்டர் தூரத்தை
24.04 விநாடியில் கடந்து ஆசிய விளையாட்டில் புதிய
சாதனை படைத்து முதல் பரிசான தங்கப்பதக்கத்தையும்,
100மீட்டர் ஓட்டப்பந்தயத்தில் இரண்டாவது பரிசான வெள்ளி
பதக்கத்தையும் வென்றார்.

மேலும் ஆசியாவிலேயே முதல் முறையாக இச்சாதனை
படைத்தவர் இவர்தான் என்பது குறிப்பிடத்தக்கது.

உலக அளவில் பாரா வீரர்கள் பங்கேற்கும் 10-ஆவது
பாஷா உலக கிராண்ட் பிரிக்ஸ்-2018 போட்டி துபாயில்
நடைபெற்றது. அதில் இந்தியா, பாகிஸ்தான், அமெரிக்கா
உள்ளிட்ட 21 உலக நாடுகளை சேர்ந்த பாரா வீரர்கள்
பங்கேற்றனர். இதில் 400 மீட்டர் மற்றும் 200 மீட்டர் ஓட்டப்
பந்தயத்தில் இவர், தங்கம் மற்றும் வெள்ளி பதக்கத்தை
வென்றார்.

சார்ஜாவில் நடைபெற்ற உலக தடகள போட்டிகள் 2018-இல்
2 தங்கம் மற்றும் 1 வெள்ளி பதக்கத்தை வென்றார்.
இதில் இவர் 400 மீட்டர் ஓட்டத்தில் அசுர வேகத்தில் இலக்கை
அடைந்தார்.

ஆனால், 200 மீட்டர் பந்தயத்தில் மயிரிழையில் தங்கத்தை
தவறவிட்டாலும் வெள்ளி வென்றார் என்பதும், இதுவரை
சர்வதேச அளவில் கலந்துகொண்ட பாரா வீரர்களுக்கான
தடகள போட்டிகளில் 9 தங்கம் , 6 வெள்ளி பதக்கங்களும்
மற்றும் தேசிய அளவில் நடைபெற்ற போட்டிகளில்
6 தங்கம், 4 வெள்ளி மற்றும் 2 வெங்கல பதக்கங்களும்
பெற்றுள்ளார்.

நான்கு ஆண்டுகளுக்கு ஒரு முறை நடத்தப்படும் ஆசிய
விளையாட்டு போட்டிகள் இந்தோனேஷியா தலைநகர்
ஜகார்தாவில் கடந்த ஆகஸ்ட் மாதம் தொடங்கியது.

அதில் இந்திய ராணுவத்தின் சார்பில்; பாரா தடகள
போட்டியில் கலந்து கொண்டு வெற்றி பதக்கங்களை பெற்ற
ஒரே பாரா வீரர் இவர் தான்.

இவர் கலந்துகொண்ட தடகள போட்டிகளான 200 மீட்டரில்
வெண்கல பதக்கமும் மற்றும் 400 மீட்டரில் வெள்ளி பதக்கமும்
பெற்றுள்ளார். ஆசிய போட்டிகளில் வெற்றி பெற்றதனை
தொடர்ந்து பிரதமர் நரேந்திர மோடி ஆனந்தனை நேரில்
அழைத்து பாராட்டு தெரிவித்துள்ளார்.

சாதனைகள் புரிந்து வரும் ஆனந்தனின் தந்தை ஓர் ஆட்டோ
ஓட்டுநர், பெற்றோர், மனைவி மற்றும் குழந்தைகள் யாவரும்
கும்பகோணத்தில் வசிக்கின்றனர்.
-
-----------------------------
- குடந்தை ப.சரவணன்
தினமணி