நிலைத்து நிற்க போகிறது சரணாலயம்!

காஞ்சிபுரம் மாவட்டம் உத்திரமேரூரில், பறவைகளுக்காக,
பலவித பழ மரங்களை வளர்த்து வரும், லட்சுமணன்:

வேடபாளையம் கிராமத்தை சேர்ந்த எனக்கு, சிறு வயதில்
இருந்தே, பறவைகள் மேல் ஆசை அதிகம். அய்யப்ப பக்தராக,
25 ஆண்டுகளுக்கு முன் குருசாமியாகி, பலருக்கு இருமுடி
கட்டிஉள்ளேன்.

அதில் கிடைத்த பணம், சில பக்தர்கள், தானமாக கொடுத்த
நிலம், சம்பளத்தில் வாங்கியது என, மொத்தம், 25 ஏக்கர் நிலம்
சேர்ந்தது.நிலம் முழுக்க, சீமைக் கருவேலம் மண்டிக் கிடந்தது.

இந்த இடத்தில் பறவைகள் சரணாலயம் அமைக்க
ஆசைப்பட்டு, ஏழு ஆண்டுக்கு முன், நிலத்தை சீர்படுத்தி,
5 ஏக்கரில் ஒரு குளம், இரண்டு கிணறுகளை வெட்டினேன்.

மழை பெய்து குளம் நிரம்பியவுடன், மீன்களை விட்டதில்,
அதுவும் பெருகியது.மண் சரியில்லாத இடங்களில்
செம்மண்ணை நிரப்பி, பல பழ கன்றுகளை நட்டேன்.

மரங்கள் வளர்ந்து, பழம் கிடைத்ததால், கொஞ்சம்
கொஞ்சமாக பறவைகள் வர ஆரம்பித்தன. மேலும், பயிர்
செய்த நெல், கம்பு ஆகிய பயிர்களை, பறவைகள் சாப்பிட்டது
போக, மீதியை அறுவடை செய்வோம்.

ஆண்டு முழுவதும் இரை கிடைப்பதால், ஆயிரக்கணக்கான
பறவைகள், நிரந்தரமாக கூடு கட்டி தங்கின.மாலை நேரத்தில்
பறவைகளின் சத்தம், அதிகமாக இருக்கும்.

அப்போது இங்கு வந்து, அமர்ந்து விடுவேன். குடிநீர் வடிகால்
வாரியத்தில் பணியாற்றி, ஓய்வு பெற்ற எனக்கு, இந்த
சந்தோஷத்துக்கு, ஈடு இணை கிடையாது.

சரணாலயத்தைப் பார்த்து கொள்வதற்காக, ஒரு குடும்பத்தை
தங்க வைத்து, அவர்களுக்கு சம்பளமும் கொடுத்து வருகிறேன்.
அவர்கள் தங்கியிருக்கும் வீட்டில் அமைத்துள்ள, 63 கூடுகளிலும்
குருவிகள் உள்ளன.

அதே போல், 5,000 புறாக் கூடுகளும், 3,000 கிளிக் கூடுகளும்
அமைக்க உள்ளோம். ஒரு தியான மண்டபத்தையும் இங்கு
கட்ட, முடிவு செய்து உள்ளேன்.

என் வருமானம் முழுவதையும், இதற்காக செலவிட்டுள்ள நான்,
இந்த இடத்தை, தலைமுறை தலைமுறையாகப் பாதுகாக்க,
சில முடிவுகளை எடுத்துள்ளேன். என் குடும்பத்தினரும்
முழு ஒத்துழைப்பு கொடுத்து வருகின்றனர்

.‘லட்சுமணக் குருசாமி அறக்கட்டளை‘யை அமைத்து,
சரணாலயத்தை அதற்குள் கொண்டு வந்துள்ளேன்.
அதனால், எனக்கு பின் யாரும், இந்த நிலத்தை விற்பனை செய்ய
முடியாது; இங்கு இருக்கும் மரத்தைக்கூட வெட்ட முடியாது.

ஆண்டாண்டு காலத்துக்கு இந்த சரணாலயம் நிலைத்து நிற்கும்.
–
————————————–நன்றி- தினமலர் -சொல்கிறார்கள்)