தமிழகத்தில் 12 அரசு மருத்துவமனைகளில் தலா ரூ.9.5 கோடியில் "கேத் லேப்'

-

தமிழகத்தில் 12 அரசு மருத்துவமனைகளில் தலா
ரூ.9.5 கோடியில் கேத் லேப் அமைக்கப்படும் என
மாநில மக்கள் நல்வாழ்வுத் துறை அமைச்சர்
மருத்துவர் சி. விஜயபாஸ்கர்.திருச்சி மகாத்மா காந்தி
நினைவு அரசு மருத்துவமனையில் ஞாயிற்றுக்கிழமை
பல்வேறு சிகிச்சை பிரிவுகளை திறந்து வைத்து அவர்
செய்தியாளர்களிடம் கூறியது:

தமிழ்நாடு மருத்துவச் சேவைக் கழகம் மூலமாக
1.5 டெஸ்லா வசதி கொண்ட எம்.ஆர்.ஐ. ஸ்கேன் மையம்
திறக்கப்பட்டுள்ளது.

இதன் மூலம் முழு உடலையும் குறைந்த நேரத்தில்
துல்லியமாக ஸ்கேன் எடுக்க முடியும். தமிழகத்தில்
இதுபோன்று 18 இடங்களில் அதிநவீன வசதிகள்
கொண்ட எம்.ஆர்.ஐ. ஸ்கேன் மையம் அமைக்கப்
பட்டுள்ளது.

இவை தவிர, மாநிலம் முழுவதும் 34 சி.டி. ஸ்கேன்
மையங்களும் அமைக்கப்பட்டுள்ளன.

அரசு மருத்துவமனைகளில் கேத் லேப் வசதி அளிக்கும்
வகையிலான பணிகள் மேற்கொள்ளப்பட்டுள்ளன.
திருச்சி உள்பட 12 அரசு மருத்துவமனைகளில்
ரூ.3.5 கோடியில் கேத்லேப்பும், ரூ.6 கோடியில் உதவி
சாதனங்களும் என தலா ரூ.9.5 கோடியில்
கேத் லேப் மையங்கள் அமைக்கப்படும்.

இதன் மூலம் ஆஞ்சியோ பிளாஸ்ட் போன்ற இருதய
அறுவைச் சிகிச்சைகள் மேற்கொள்ளப்படும்.

தமிழ்நாடு விபத்து மற்றும் அவசர சிகிச்சை வார்டு
(தாய் திட்டம்) உருவாக்கப்பட்டிருக்கிறது. சென்னை
மருத்துவமனையில் இந்த வார்டு தொடங்கப்பட்டிருக்கும்
நிலையில், கடந்த 3 மாதங்களில் விபத்தினால் ஏற்படும்
இறப்பு 15 சதவிகிதம் குறைந்துள்ளது.

தமிழகத்தில் ஒரே ஆண்டில் அரசு மருத்துவமனைகளில்
18 இருதய சிகிச்சைப் பிரிவு தொடங்கப்பட்டிருக்கிறது.

அண்டை மாநிலங்களிலும், வடமாநிலங்களிலும்
பன்றிக் காய்ச்சல் பாதிப்பு உள்ள நிலையில், தமிழகத்தில்
பாளையங்கோட்டையில் 4 பேருக்கு இக்காய்ச்சல்
இருப்பதாகக் கண்டறியப்பட்டு உறுதி செய்யப்பட்டுள்ளது.

பன்றிக் காய்ச்சல் தடுப்புக்குத் தேவைப்படும் மாத்திரைகள்
12 லட்சம் எண்ணிக்கையில் கையிருப்பில் உள்ளன.

தமிழகத்தில் எய்ம்ஸ் மருத்துவமனைக்கான அடிக்கல்
நாட்டு விழா விரைவில் நடைபெறும். பிரதமரும், முதல்
அமைச்சரும் இணைந்து இதற்கான அடிக்கல்லை நாட்டுவர்.

108 ஆம்புலன்ஸ் மூலம் அரசு மருத்துவமனைக்கு
சிகிச்சைக்கு கொண்டு செல்லப்படும் நேரம்
குறைத்திருக்கிறோம். உலக சுகாதார நிறுவன
வழிகாட்டியின்படி இந்த நேரத்தை மேலும் குறைக்க
நடவடிக்கைகள் எடுக்கப்பட்டு வருகின்றனர்.

தமிழ்நாடு மருத்துவப் பணியாளர் தேர்வு வாரியம் மூலம்
21,000 பேர் நியமனம் செய்யப்பட்டுள்ளனர்.
1,800 மருத்துவர்கள் நியமிக்கப்பட்ட நிலையில்,
4,000 செவிலியர்கள் தேர்வு செய்யப்பட உள்ளனர்.

இதில் 700 பேருக்கு பணி வழங்கப்பட்டுள்ளது.
விரைவில் 720 ஆய்வக உதவியாளர்களும், 1000 சுகாதார
ஆய்வாளர்களும் நியமிக்கப்பட உள்ளனர் என்றார்
அமைச்சர் விஜயபாஸ்கர்.
-
----------------------------------------
தினமணி