நக்கீரன் கோபால் கைது: இந்தியக் கம்யூனிஸ்ட் கட்சி கடும் கண்டனம்

நக்கீரன் கோபால் கைது செய்யப்பட்டிருப்பது
வண்மையாகக் கண்டிக்கத்தக்கது என இந்தியக்
கம்யூனிஸ்ட் கட்சியின் தமிழ்நாடு மாநில செயலாளர்
இரா.முத்தரசன் தெரிவித்துள்ளார்.

இதுகுறித்து அவர் இன்று விடுத்துள்ள அறிக்கையில்,
மூத்த பத்திரிக்கையாளரும், நக்கீரன் இதழின்
ஆசிரியருமான நக்கீரன் கோபால் இன்று காலை
(09.10.2018) சென்னை விமான நிலையத்தில்
காவல்துறையினரால் கைது செய்யப்பட்டிருப்பதை
இந்தியக் கம்யூனிஸ்ட் கட்சியின் தமிழ்நாடு
மாநிலக்குழு மிக வன்மையாகக் கண்டிக்கின்றது.

ஆளுநர் மாளிகையின் உத்திரவின் பேரில் நக்கீரன்
கோபால் கைது செய்யப்பட்டிருப்பதாகத்
தெரிவிக்கப்படுகின்றது.

கல்லூரி மாணவிகளை தவறாக வழிநடத்தி பாலியல்
வன்முறைக்கு நிர்ப்பந்தம் செய்தார் என்ற குற்றச்
சாட்டில் கைது செய்யப்பட்ட பேராசிரியர்
நிர்மலா தேவி மீது விசாரணை நடைபெற்று
வருகின்றது.

பேராசிரியர் நிர்மலா தேவி யாருடைய தேவைக்காக,
அத்தகைய இழிவான செயலில் ஈடுபட்டார் என்பது
இன்றும் வெளிப்படாத மர்மமாக நீடிக்கிறது.

‘அம்பை எய்தவர் மீது நடவடிக்கை இன்றி, அம்பை
மட்டுமே தண்டிக்கும் நிலை’ நாட்டில் நிலவுவதை
ஆளுநர் உட்பட அனைவரும் அறிவர்.

பேராசிரியர் நிர்மலா தேவி கைது விவாகாரம் குறித்து
நக்கீரன் இதழ் திரட்டிய தகவல்கள் அடிப்படையில்
தொடர்ந்து செய்திக் கட்டுரைகளை வெளியீட்டு
வருகின்றது.

நக்கீரன் செய்திகள் காரணமாக யாராவது
அவமதிக்கப்பட்டிருந்தால், அவர்கள் சட்டரீதியான
நடவடிக்கைகளை மேற்கொண்டிருக்கலாம்.

அத்தகைய சட்ட நடவடிக்கையை மேற்கொள்வதற்கு
மாறாக அதிகாரத்தை தவறாகப் பயன்படுத்தி
அடக்குமுறை நடவடிக்கையில் ஈடுபடுவது
ஜனநாயகப்படு கொலையாகும்
இதனை அனுமதிக்கக்கூடாது.

நக்கீரன் கோபால் கைது மூலம் ஆளுநர் தனக்குரிய
அதிகாரத்தை மிக தவறான முறையில் பயன்
படுத்தியிருக்கிறார். அவரது உத்திரவை ஏற்று,
எடப்பாடி பழனிச்சாமி அரசு நக்கீரன் கோபாலை
கைது செய்திருக்கிறது.

காவல்துறையால் ‘வலைவீசி’ தேடப்பட்டு வரும்
பாஜக தேசிய செயலாளர் எச்.ராஜா ஆளுநர்
மாளிகையில் அவரை நேரில் சந்தித்து அரைமணி
நேரத்திற்கும் மேலாக உரையாடினார்.

இந்த சட்ட விரோதச் செயலை பலரும் கண்டித்தும்
அது குறித்து ஆளுநர் கவலைப்பட்டதாக தெரியவில்லை.
இது ஆளுநர் மாளிகை மரபுகளுக்கும், சட்ட
நடைமுறைக்கும் எதிரானதாகும்.

கைது செய்யப்பட்ட நக்கீரன் கோபாலை நேரில்
சந்தித்து விபரங்களை அறியச் சென்ற, மதிமுக பொதுச்
செயலாளர் வைகோவைத் தடுத்து, கைது செய்திருப்பது
தமிழ்நாட்டில் ‘மக்களாட்சி மாண்புக்கு’ ஏற்பட்ட
களங்கமாகும்.

காவல்துறையின் அத்துமீறல் எல்லைதாண்டிக் செல்வதை
இந்தியக் கம்யூனிஸ்ட் கட்சி வன்மையாகக் கண்டிக்கிறது.

நக்கீரன் கோபால் கைது செய்யப்பட்டுள்ளதை மிக
வன்மையாக கண்டிப்பதுடன் அவர் மீது போடப்பட்டுள்ள
வழக்குகளை திரும்ப பெற்று, உடனடியாக அவரை
நிபந்தனையின்றி விடுதலை செய்யுமாறு, இந்தியக்
கம்யூனிஸ்ட் கட்சியின் தமிழ்நாடு மாநிலக்குழு
வலியுறுத்திக் கேட்டுக் கொள்வதுடன்,

‘ஜனநாயக குரலை அடக்க நினைக்கும் ஆளுநர் மற்றும்
மாநில அரசின் செயலை ஊடகத் துறையினரும்,
ஜனநாயகத்தின் மீது நம்பிக்கையுள்ள அனைவரும்
ஒருங்கிணைந்து முறியடிக்க முன்வர வேண்டுமென
கேட்டுக் கொள்கிறோம்.

இவ்வாறு அவர் கூறியுள்ளார்.
-
-------------------------------------
தினமணி