சோலார் மின்சாரத்தில் இயங்கும் ஆட்டோ கவனத்தை ஈர்க்கும் முன்னாள் எல்லை பாதுகாப்பு படை வீரர்

தேனி:
'ஜெட்' வேகத்தில் பெட்ரோல் விலை விண்ணை முட்டும்
அளவிற்கு ஏறிக்கொண்டே இருக்கும் வேலையில்,
'மாற்றுமுறை எரிசக்தி முறையில், சோலார் மின்சாரத்தின்
மூலம் இயங்கும் ஆட்டோவை தயாரித்து,
'மாற்றுமுறை எரிசக்தி' பயன்பாட்டில் முன்னோடியாகவும்,
எரிசக்தி சிக்கனத்தில் முன்னுாதரணமாகவும் திகழ்ந்து
வருகிறார் தேனியை சேர்ந்த முன்னாள் எல்லைப்
பாதுகாப்பு படை வீரர்.

தேனி அருகே காமயக் கவுண்டன்பட்டியை சேர்ந்தவர்
சுகுமாறன், 43. இவர் 1995 முதல் 2017 பிப்ரவரி வரை
நாட்டின் எல்லைப் பாதுகாப்புப் படையில் சி.என்.சி.,
ஆப்ரேட்டராக பணிபுரிந்து, விருப்ப ஓய்வு பெற்றவர்.

ஜம்மு காஸ்மீர் பகுதியில் பணியாற்றிய போது,
'தினமலர்' இணையத்தில் காந்திகிராம பல்கலையின்,
கிராமிய எரிசக்தி மையத்தில் 'சூர்யமித்ரா' திட்டத்தில்
சோலார் தகடுகள், மற்றும் சோலார் அமைப்புக்கள்
செயல்படும் விதம் குறித்து பயிற்சி வழங்குவதை
பார்த்துள்ளார்.

பின், காந்திகிராமம் பல்கலையில் பயிற்சி பெற்று
ரூ.1.50 லட்சம் செலவில், சோலார் ஆட்டோவை
உருவாக்கியுள்ளார்.

உருவாக்கம்

அவர் கூறியதாவது: எங்கள் வீட்டின் 500 அடி கிணற்றில்
உள்ள நீரை, 5 குதிரைத் திறன் சக்தி கொண்ட மோட்டாரை,
சூரிய ஒளி தகடுகளை பயன்படுத்தி நீரை எடுத்தேன்.

அப்போது, சோலார் ஆட்டோவை உருவாக்கும் எண்ணம்
வந்தது. அதன்பின், 250 வாட்ஸ் கொண்ட 2 சோலார்
தகடுகளை பயன்படுத்தி, 500 வாட்ஸ் மின்சாரம் எடுத்தேன்.

அதனை (டி.சி.,) நேரடி மின்சாரமாக மாற்றி, 48 வாட்ஸ்
மின்சாரமாக தனித்தனியாக பிரித்து 4 பேட்டரிகளில்
சேகரித்தேன். அந்த மின்சாரம் மூலம் இயங்கும் மோட்டார்
அமைத்து, சக்கரங்கள் இயங்கக்கூடிய ஒருங்கிணைந்த
'சாப்டு'களையும், பிரேக், ஸ்பீடா மீட்டர் உள்ளிட்டவைகளை
உருவாக்கினேன்.

சீதோஷண நிலைக்கு ஏற்ற 'சோலார் பேனல்'கள்
பயன்படுத்தியதால் தடையின்றி சூரிய ஒளியால் கிடைக்கும்
மின்சாரம் பேட்டரியில் கிடைக்கிறது.

ஒரு மணி நேரத்திற்கு 30 கி.மீ., வேகத்திலும், நீண்ட நேரம்
பயணிக்க முடியும். தற்போது தினசரி ரூ.300 வருமானம்
ஈட்டுவதுடன் வீட்டு வேலைகளுக்கும் ஆட்டோவில் சென்று
வருகிறேன்.

பெட்ரோல், டீசலை அதிக விலை கொடுத்து வாங்கி
வேதனைப்படும் மக்கள், மாற்றுமுறை எரிசக்தி
பயன்பாட்டிற்கு மாற வேண்டும் என்பதே என்னுடைய
விருப்பம், என்றார்.

மாற்று வழி

நாகர்கோவிலை சேர்ந்த அன்வர்சதாத் கூறியதாவது:

மாற்றுத்திறனாளியான நான், மாற்றுத்திறனாளிகள்
பயன்படுத்தும் கார், மூன்று சக்கர, டூவீலர்களை
வாகனங்களை தயாரித்து, மாற்றுத்திறனாளிகள்,
கால்களை இழந்தவர்களுக்கு வழங்கி வருகிறேன்.

சுகுமாறனின் வீட்டிற்கு சென்று அவரின் தொழில்
நுட்பத்தை கேட்டறிந்தேன். வரும் காலத்தில் மாற்று
முறை எரிசக்தி பயன்பாடு தவிர்க்க முடியாத
அம்சமாகிவிட்டது.

கால் இல்லாதவர்கள் ஓட்டும் கார்களை உருவாக்க
உள்ளேன், என்றார்.
-
---------------------------------
தினமலர்

சூரியனில் இருந்து மின்சாரம் எடுத்தால் சூரிய பகவான் கோபப்படுவார் என்று ஒரு செய்தி படித்தேன்