தமிழகத்துக்கு 2 மூத்த குடிமக்கள் தேசிய விருது: வெங்கய்ய நாயுடு வழங்கினார்

தமிழகத்தைச் சேர்ந்த இரண்டு மூத்த குடிமக்களுக்கு
தேசிய விருதுகளை குடியரசுத் துணைத் தலைவர்
வெங்கய்ய நாயுடு வழங்கி கௌரவித்தார்.

முதியோர் தினத்தையொட்டி, மத்திய சமூக நீதி மற்றும்
அதிகாரமளித்தல் துறை சார்பில்
வயோஸ்ரேஷ்ட சம்மான்-2018 என்ற பெயரில் மூத்த
குடிமக்களுக்கான தேசிய விருது ஆண்டு தோறும்
வழங்கப்பட்டு வருகிறது.

இந்நிலையில், தில்லி விஞ்ஞான் பவனில் திங்கள்கிழமை
நடைபெற்ற நிகழ்ச்சியில் குடியரசு துணைத் தலைவர்
எம். வெங்கய்ய நாயுடு சிறப்பு விருந்தினராக பங்கேற்று,
நாட்டில் சிறப்பாக செயலாற்றிய மூத்த குடிமக்களுக்கு
விருதுகளை வழங்கி கெளரவித்தார்.

மொத்தம் 13 பேருக்கு இந்த விருதுகள் வழங்கப்பட்டன.
இதில் தமிழ்நாட்டிற்கு 2 விருது, கர்நாடத்துக்கு 3 விருது,
ஹரியாணா, உத்தரப்பிரதேசம், மணிப்பூர், சத்தீஸ்கர்
ஆகியவற்றுக்கு தலா ஒன்று உள்பட
பல்வேறு மாநிலங்களுக்கு விருதுகள் வழங்கப்பட்டன.

தமிழகத்தில் சென்னை பத்மா சேஷாத்திரி பால பவன்
பள்ளி நிறுவனர் ஒய்.ஜி. ராஜலக்ஷ்மி பார்த்தசாரதிக்கு (93)
மூத்த குடி மக்களுக்கான விருது வழங்கப்பட்டது.

மேலும், மூத்த குடிமக்களுக்கு சிறப்பான சேவை
செய்ததற்காக மதுரை மாவட்டத்துக்கும் விருது
வழங்கப்பட்டது. 2017-18-ஆம் ஆண்டில் மதுரை மாவட்ட
ஆட்சியராக வீர ராகவ ராவ் இருந்தார்.

அப்போது அவர் மூத்த குடிமக்களுக்கு சிறப்பான சேவை
ஆற்றியதற்காக இந்த விருது வழங்கப்பட்டது. தற்போது
ராமநாதபுரம் ஆட்சியராக உள்ள அவர், இந்த விருதைப்
பெற்றுக் கொண்டார்.

மேலும், மருத்துவத் துறையில் 50 ஆயிரத்துக்கும் அதிகமான
இதய அறுவை சிகிச்சை செய்துள்ள எய்ம்ஸ் மருத்துவமனையின்
முன்னாள் இயக்குநர் டாக்டர் பி. வேணுகோபால் (76),
உத்தரப்பிரதேச மாநிலம் பக்பாத் கிராமத்தில் 300-க்கும்
அதிகமான ஆண், பெண்களுக்கு துப்பாக்கிச் சுடும் பயிற்சி
அளித்த ராஜ்பால் சிங் (70) உள்ளிட்ட பலருக்கு
மூத்த குடிமக்கள் விருது வழங்கப்பட்டது.

நிகழ்ச்சிக்கு மத்திய சமூக நீதி மற்றும் அதிகாரமளித்தல்
துறை அமைச்சர் தாவர்சந்த் கெலாட் தலைமை தாங்கினார்.

அத்துறையின் இணையமைச்சர்கள் ராம்தாஸ் அத்வாலே,
கிருஷ்ண பால் குர்ஜார், விஜய் சம்ப்லா, செயலர் நீலம் சவ்னே,
இணைச் செயலர் சுரேந்தர சிங் உள்ளிட்ட பலர் நிகழ்ச்சியில்
பங்கேற்றனர்.
-
-------------------------------
தினமணி