காங்கயத்தில் ரூ. 2000 கள்ள நோட்டு தயாரித்த 3 பேர் கைது

**ayyasamy ram** · **ayyasamy ram** Mon 1 Oct 2018 - 8:12

புதிய இரண்டாயிரம் ரூபாய் கள்ள நோட்டுகளை
காங்கயத்தில் தயாரித்ததாக மூன்று பேர்
ஞாயிற்றுக்கிழமை கைது செய்யப்பட்டனர்.

திருப்பூர் மாவட்டத்தில் கள்ள நோட்டுகள் தயாரித்து
புழக்கத்தில் விடப்படுவதாக போலீஸாருக்கு ரகசியத்
தகவல் கிடைத்தது.

இதையடுத்து, போலீஸார் தீவிர கண்காணிப்பில்
ஈடுபட்டு வந்தனர்.

இந்நிலையில், திருப்பூரைச் சேர்ந்த பனியன் நிறுவனத்
தொழிலாளி சாமிநாதன் (45) என்பவரிடம் இருந்து
8 இரண்டாயிரம் ரூபாய் நகல் ( ஜெராக்ஸ்) நோட்டுகளை
காங்கயம், வீரணம்பாளையம் பகுதியைச் சேர்ந்த
சதீஷ் (31) மொத்தம் ரூ. 6 ஆயிரம் கொடுத்து
வாங்கியதாகக் கூறப்படுகிறது.

இவரிடம் இருந்து வெள்ளகோவில், வெங்கமேடு
பகுதியைச் சேர்ந்த ராஜ்குமார் (47) என்பவர்
8 இரண்டாயிரம் ரூபாய் நகல் நோட்டுகளை மொத்தம்
ரூ. 8 ஆயிரம் கொடுத்து வாங்கியுள்ளார்.

கள்ள நோட்டுகளை புழக்கத்தில் விடமுடியாமல்
தனது வீட்டிலேயே ராஜ்குமார் வைத்திருந்துள்ளார்.
இதனால், அவர்களுக்குள் பிரச்னை ஏற்பட்டது.
-
இது குறித்து காங்கயம் போலீஸாருக்கு தகவல் கிடைத்துள்ளது.
உடனே, போலீஸார் ஞாயிற்றுக்கிழமை காலை சதீஷை
செல்லிடப்பேசியில் தொடர்பு கொண்டு கள்ள நோட்டுகளை
தாங்கள் வாங்கிக் கொள்வதாகக் கூறி காங்கயம் பேருந்து
நிலையம் அருகே உள்ள ஒரு கடைக்கு வருமாறு கூறியுள்ளனர்.

அங்கு சதீஷ் தனது கூட்டாளிகளுடன் வந்துள்ளார். அப்போது,
அப்பகுதியில் மறைந்திருந்த போலீஸார் அவர்களை
சுற்றிவளைத்து கைது செய்தனர்.

அவர்களிடம் இருந்து 8 இரண்டாயிரம் ரூபாய் நோட்டுகளையும்,
கருவிகளையும் பறிமுதல் செய்தனர்.

இது தொடர்பாக காங்கயம் போலீஸார் வழக்குப் பதிவு செய்து
விசாரித்து வருகின்றனர்.
-
--------------------
தினமணி