டீசல் விலை உயர்வு எதிரொலி: லாரி வாடகை 25 சதவீதம் உயர்வு

டீசல் விலை தொடர்ந்து உயர்ந்து வருவதைத்
தொடர்ந்து, லாரி வாடகை 22 முதல் 25 சதவீதம் வரை
உயர்த்தப்பட்டுள்ளது.

பெட்ரோல், டீசல் விலை முன் எப்போதும் இல்லாத
அளவுக்கு தொடர்ந்து உயர்ந்து வருகிறது. அந்தவகையில்,
முக்கிய நகரங்களில் பெட்ரோல் லிட்டர் ரூ.86-க்கு
அதிகமாக விற்பனை செய்யப்படுகிறது.

மேலும் டீசல் விலையும் வரலாறு காணாத வகையில்
உயர்ந்துள்ளது. டீசல் லிட்டருக்கு ரூ.79 முதல் ரூ.81 வரை
விற்கப்படுகிறது.

இதனிடையே தமிழ்நாடு லாரி சரக்கு புக்கிங் ஏஜென்டுகள்
சம்மேளனம், லாரி சரக்கு கட்டண வாடகையை 22 சதவீதம்
முதல் 25 சதவீதம் வரை அதிகரிப்பதாக கடந்த சில
நாள்களுக்கு முன்பு அறிவித்திருந்தது.

இந்த நிலையில், கட்டண உயர்வு திங்கள்கிழமை (செப்.24)
முதல் அமலுக்கு வந்தது. ஒரு பக்கம் வியாபாரிகள் தரப்பில்
எதிர்ப்பு இருந்த போதிலும், கட்டண உயர்வு அமலுக்கு
வந்துள்ளது.

இதுதொடர்பாக, தமிழ்நாடு லாரி புக்கிங் ஏஜென்டுகள்
சம்மேளனத்தின் மாநிலத் தலைவர் ராஜவடிவேல் கூறியது:

டீசல் விலை வரலாறு காணாத வகையில் உயர்ந்திருப்பதால்
சரக்கு லாரி தொழில் பல்வேறு இன்னல்களுக்கு
ஆளாகியுள்ளது. இதன் காரணமாக சரக்கு லாரி வாடகை
கட்டணம் 22 முதல் 25 சதவீதம் வரை உயர்த்தப்பட்டுள்ளது.

அதன்படி, இதுவரையில் சேலத்தில் இருந்து சென்னைக்கு
சரக்கு எடுத்துச் செல்ல ரூ.8,500 லாரி வாடகை
நிர்ணயிக்கப்பட்டிருந்தது. இந்த நிலையில், தற்போது அந்த
தொகை ரூ.10,000 என உயர்த்தப்பட்டுள்ளது.

சேலத்தில் இருந்து திருச்சி, கோவைக்கு ரூ.6 ஆயிரத்தில்
இருந்து ரூ.7,500 ஆகவும் வாடகை உயர்த்தப்பட்டுள்ளது.

அதேபோல, வட மாநிலங்களுக்கான சரக்கு வாடகை
கட்டணம் ரூ.8 ஆயிரத்தில் இருந்து ரூ.25 ஆயிரமாக
உயர்த்தப்பட்டுள்ளது.

தில்லிக்கு ரூ.1.15 லட்சமாக இருந்த கட்டணம் தற்போது
ரூ.1.40 லட்சமாக உயர்த்தப்பட்டுள்ளது என்றார்.

இதனிடையே சரக்கு லாரி வாடகை கட்டண உயர்வால்
அத்தியாவசியப் பொருள்களின் விலையும் கணிசமாக
உயரக்கூடும் சூழல் ஏற்பட்டுள்ளது.
-
---------------------------------
தினமணி