விருதுகளை தவறவிட்டது ஏன்? பள்ளி கல்வித்துறை விசாரணை

தேசிய அளவிலான விருதுகளில், தமிழகத்துக்கு ஒதுக்கப்பட்ட,
ஐந்து விருதுகளை பெற முடியாமல் போனது குறித்து,
பள்ளி கல்வித் துறை அதிகாரிகள் விசாரணையை துவங்கியுள்ளனர்.

விருதுகளை தவறவிட்டது ஏன்? பள்ளி கல்வித்துறை விசாரணை

இந்த ஆண்டுக்கான ஆசிரியர் தினம், செப்., 5ல் கொண்டாடப்பட்டது.
இதையொட்டி, மத்திய அரசின் சார்பில், தேசிய விருதுகள்
அறிவிக்கப்பட்டன. தமிழகத்தில், கோவை மாவட்டத்தைச் சேர்ந்த,
ஊராட்சி பள்ளி ஆசிரியை சதி என்பவர் மட்டும், தேசிய விருதுக்கு
தேர்வு பெற்றார்.

தமிழகத்துக்கு, ஆறு விருதுகள் ஒதுக்கப்பட்டிருந்த நிலையில்,
ஒருவர் மட்டுமே விருது பெற்றது, பள்ளி கல்வித்துறை வட்டாரத்தில்,
அதிர்ச்சியை ஏற்படுத்தி உள்ளது. கடந்த ஆண்டுகளில், 23 பேருக்கு,
விருதுகள் வழங்கப்பட்ட நிலையில்,
இந்த ஆண்டு, ஆறு விருதாக, மத்திய அரசு குறைத்தது.

'விருதுகளின் எண்ணிக்கையை குறைத்தது தவறு; கூடுதலாக வழங்க
வேண்டும்' என, ஆசிரியர்கள் கோரிக்கை விடுத்தனர். இதுகுறித்து,
மத்திய அரசுக்கு கடிதம் எழுதுவதாக, அமைச்சர் செங்கோட்டையனும்
கூறினார்.

ஆனால், ஒதுக்கப்பட்ட ஆறு விருதுகளிலும், ஐந்து விருதுகளை,
தமிழக பள்ளி கல்வி தவற விட்டு உள்ளது.

ஐந்து விருதுகளை பெறுவதற்கு கூட, தமிழகத்தில் தகுதியான
ஆசிரியர்கள் இல்லையா அல்லது விண்ணப்பிக்கவில்லையா;
விண்ணப்பித்தும் கிடைக்கவில்லையா என, ஆசிரியர்கள் குழப்பம்
அடைந்துள்ளனர்.

ஒவ்வொரு ஆண்டும், தமிழக அரசு பரிந்துரைக்கும் நபர்களுக்கு,
மத்திய அரசின் விருதுகள் வழங்கப்படும். இந்த முறை, விருதுக்கு
தகுதியானவர்கள், மத்திய அரசுக்கு நேரடியாக, 'ஆன்லைனில்'
விண்ணப்பிக்க அறிவுறுத்தப்பட்டனர்.

அவற்றில் இருந்து, சிறந்த ஆசிரியர்களின் பரிந்துரை பட்டியலை,
தமிழக அரசு அனுப்பியது.

இதன்படி, மாநிலம் முழுவதும், 150க்கும் மேற்பட்டவர்கள்,
தேசிய விருதுக்கு விண்ணப்பித்திருந்தனர். அவர்களில், 90 பேரை,
மாவட்ட கலெக்டர்கள் தலைமையிலான குழு, மாநில கமிட்டிக்கு
பரிந்துரைத்தது.

இவர்களில், ஆறு பேரை மட்டும், மத்திய அரசுக்கு, தமிழக அரசு
பரிந்துரைத்தது. ஆனால், அவர்களில் ஒருவர் மட்டுமே, விருதுக்கு
தேர்வு செய்யப்பட்டார்.

இந்த விவகாரம், தமிழக பள்ளி கல்வி துறையில், அதிர்ச்சியை
உருவாக்கியுள்ளது. பரிந்துரைக்கப்பட்டவர்களுக்கு விருது
கிடைக்காதது ஏன்; ஆறு விருதுகள் வழங்கப்படும் என அறிவித்தும்,
ஒரு விருது மட்டுமே வழங்கப்பட்டது ஏன் என, பள்ளி கல்வி
அதிகாரிகள் விசாரணை நடத்தி வருகின்றனர்.
-
-------------------------
- நமது நிருபர் -
தினமலர்