எழுத்துச் சுதந்திரத்தை மதிக்க வேண்டும்: மலையாள மீஷா' நாவலுக்கு தடை விதிக்க உச்ச நீதிமன்றம் மறுப்பு

-

ஹிந்து பெண்கள் கோயிலுக்கு செல்வதை தரக்குறைவாக
விமர்சிக்கும் வகையில் மலையாள எழுத்தாளர் எஸ்.ஹரீஷ்
எழுதியுள்ளதாகக் கூறி, அவரது மீஷா' நாவலுக்கு தடை
விதிக்க கோரிய மனுவை உச்ச நீதிமன்றம் புதன்கிழமை
தள்ளுபடி செய்தது.

உச்ச நீதிமன்ற தலைமை நீதிபதி தீபக் மிஸ்ரா, நீதிபதிகள்
ஏ.எம்.கான்வில்கர், டி.ஒய்.சந்திரசூட் ஆகியோர் அடங்கிய
அமர்வு இதுதொடர்பான மனுவை விசாரித்தது.

அப்போது நீதிபதிகள் கூறுகையில், ஒரு புத்தகத்தை
முழுமையாக படிக்க வேண்டும். அங்கொன்றும்,
இங்கொன்றுமாக படிக்கக் கூடாது. ஒரு புத்தகத்தை
பகுதியளவு படித்துவிட்டு கருத்து கூறுவதை, சென்சார்
தொடர்பான சட்ட வரையறைக்குள் கொண்டுவர முடியாது.

ஓவியர் ஒருவர் தனது விருப்பம்போல வண்ணங்களை
தீட்டுவது போன்று, எழுத்தாளரும் வார்த்தைகளை கொண்டு
எதார்த்தமாக எழுதுவதற்கு அனுமதிக்கப்பட வேண்டும்.

எழுத்தாளருடைய கைத்திறனுக்கு மதிப்பளிக்கப்பட
வேண்டும்'' என்று தெரிவித்தனர்.

முன்னதாக, மலையாள எழுத்தாளர் ஹரீஷ், மீஷா' என்ற
தலைப்பில் எழுதியுள்ள புத்தகத்தில் குறிப்பிட்ட சில ப
குதிகளை நீக்க வேண்டும் என வலியுறுத்தி, தில்லியை
சேர்ந்த ராதாகிருஷ்ணன் என்பவர் வழக்கு தொடுத்திருந்தார்.

அந்த வழக்கை உச்ச நீதிமன்றம் கடந்த மாதம் 2-ஆம் தேதி
விசாரித்தபோது, புத்தகத்தை தடை செய்யும் கலாசாரம்
என்பது சுதந்திரமான எண்ண வெளிப்பாடுகளுக்கு தடை
விதிப்பதாக மாறிவிடும்.

இந்திய தண்டனையியல் சட்டப்பிரிவு 292-ஐ மீறாத நிலையில்,
எந்தவொரு புத்தகத்தையும் தடை செய்ய முடியாது'' எனக்
கூறியிருந்தது.

மனுதாரர் தனது மனுவில், பிராமணர்கள் கோயிலில் பூஜை
செய்வதை ஜாதீய கண்ணோட்டத்துடன் அணுகும்படியாகவும்,
பெண்கள் கோயிலுக்கு செல்வதை தரக்குறைவாக
விமர்சிக்கும் வகையிலும் நாவலில் விமர்சனங்கள் இடம்
பெற்றுள்ளன.

அந்த நாவல் வெளியிடுவதை தடுக்கவோ, இணையதளத்தில்
விற்பனை செய்வதை தடை செய்யவோ, கேரள அரசு எந்தவித
நடவடிக்கையும் எடுக்கவில்லை'' என்று புகார் கூறியிருந்தார்.

இதுகுறித்து நீதிபதிகள் குறிப்பிடுகையில், இதுபோன்ற
விமர்சனங்களுக்கு மனுதாரர் தேவையற்ற முக்கியத்துவம்
கொடுத்து வருகிறார். இன்றைய இணைய உலகில்
இதையெல்லாம் பிரச்னையாக்க வேண்டியதில்லை.
அதெல்லாம் எளிதில் மறக்கப்படும்'' என்று கூறியிருந்தனர்.

மலையாள வாரப்பத்திரிகை ஒன்றில், மீஷா நாவல்
தொடர்கதையாக வெளியிடப்பட்டது என்பதும், மக்களின்
பலத்த எதிர்ப்புக்களால் அந்தத் தொடர் நிறுத்தப்பட்டது
என்பதும் குறிப்பிடத்தக்கது.
-
----------------------
தினமணி