மேக்கேதாட்டுவில் அணை கட்ட தமிழ்நாட்டின் ஒப்புதல் தேவையில்லை: கர்நாடக அமைச்சர்

காவிரி நதியின் குறுக்கே மேக்கேதாட்டுவில் கர்நாடகம்
அணை கட்டுவதற்கு தமிழ்நாடு அரசிடம் ஒப்புதல் பெறத்
தேவையில்லை என்று அந்த மாநில நீர்வளத் துறை
அமைச்சர் டி.கே.சிவகுமார் தெரிவித்துள்ளார்.

முன்னதாக, தமிழகத்தின் ஒப்புதல் இல்லாமல் காவிரியின்
குறுக்கே மேக்கேதாட்டுவில் கர்நாடகம் அணை கட்ட
அனுமதி வழங்கக் கூடாது என்று வலியுறுத்தி பிரதமர்
நரேந்திர மோடிக்கு முதல்வர் எடப்பாடி கே.பழனிசாமி
செவ்வாய்க்கிழமை கடிதம் எழுதினார்.

இதற்கு அடுத்த நாளிலேயே தமிழகத்தின் அனுமதி
தேவையில்லை என்று கர்நாடக அமைச்சர் கூறியுள்ளது
பரபரப்பை ஏற்படுத்தியுள்ளது.

தில்லியில் புதன்கிழமை செய்தியாளர்களைச் சந்தித்த
டி.கே.சிவகுமார் இது தொடர்பாக மேலும் கூறியதாவது:

காவிரியின் குறுக்கே மேக்கேதாட்டுவில் அணை கட்டிக்
கொள்ள அண்டை மாநிலத்திடம் கர்நாடகம் ஒப்புதல்
பெறத் தேவையில்லை. அதே நேரத்தில் இந்த அணைத்
திட்டத்தை செயல்படுத்த அண்டை மாநிலத்துடன்
சச்சரவில் ஈடுபடவும் நாங்கள் விரும்பவில்லை.

தமிழகத்துடன் நல்லுறவைப் பேண கர்நாடகம் விரும்புகிறது.
இந்த விஷயத்தில் அவர்கள் எழுப்பும் கவலைகளை விவாதிக்க
தயாராகவே இருக்கிறோம். இது தொடர்பாக கர்நாடக முதல்வர்
குமாரசாமி, தமிழக முதல்வருடன் பேசியுள்ளார்.

தமிழக நீர்வளத்துறை அமைச்சருடன் பேச நானும் விருப்பம்
தெரிவித்துள்ளேன். காவிரி நதி நீர் தீர்ப்பாயம், உச்ச
நீதிமன்றத்தின் உத்தரவுகளை கர்நாடகம் மீறாது.

மேக்கேதாட்டு அணையால், தமிழ்நாட்டுக்கு அளிக்க ஒப்புக்
கொள்ளப்பட்டுள்ள நீரின் அளவு குறையாது என்றார் அவர்.

முன்னதாக, இது தொடர்பாக பிரதமருக்கு தமிழக முதல்வர்
எழுதிய கடிதத்தில், காவிரியின் குறுக்கே மேக்கேதாட்டுவில்
ரூ.5,912 கோடி மதிப்பில் சிறிய அணை, குடிநீர் திட்டப் பணி
மற்றும் 400 மெகாவாட் மின் திறன் உற்பத்தித் திட்டம்
ஆகியவற்றுக்கான சாத்தியக்கூறு அறிக்கைக்கு ஒப்புதல்
வழங்க வேண்டுமென மத்திய நீர் வள ஆணையத்தை கர்நாடக
அரசு அணுகியுள்ளது

ஒருதலைப்பட்சமான செயல். கர்நாடகத்தின் இந்தச் செயலானது,
காவிரி நடுவர் மன்றத்தின் இறுதி உத்தரவுக்கும், உச்ச நீதிமன்ற
உத்தரவுக்கும் முற்றிலும் எதிரானதாகும். காவிரி வடிநிலப்
பகுதிகளைச் சேர்ந்த மாநிலங்கள் ஏதேனும் புதிய திட்டத்தை
முன்மொழிவதற்கு முன்பாக அது தொடர்புடைய
மாநிலங்களுடன் திட்டங்களைப் பகிர்ந்து கொண்டு ஒப்புதல்
பெற வேண்டுமென மத்திய அரசு வழிகாட்டுதல் வழங்கியுள்ளது.

கர்நாடகத்தின் செயல்பாடு இந்த வழிகாட்டுதலையும் மீறும்
வகையில் உள்ளது' என்று கூறியிருந்தார்.
-
---------------------------
தினமணி