மகளேயானாலும் சல்யூட் அடிக்கணும்!

ஐதராபாத்:
சொந்த மகள் என்றாலும், ஐ.பி.எஸ்., பட்டம் பெற்ற
உயர் அதிகாரி என்பதால், 'சல்யூட்' அடிக்க வேண்டிய
கட்டாயத்திற்கு ஆளானார் துணை போலீஸ் கமிஷனர்
ஒருவர்.

அடுத்த ஆண்டு ஓய்வு பெறுகிறார்

தெலுங்கானா மாநிலம், ஐதராபாத்தில் மல்காஜ்கிரி
என்ற பகுதியில் துணை போலீஸ் கமிஷனராக பணியாற்றி
வருபவர் உமாமகேஸ்வரா சர்மா.

இவர் சப் - இன்ஸ்பெக்டராக போலீஸ் பணியில் சேர்ந்தவர்.
30 ஆண்டுகளாக பணியில் உள்ளார். சில ஆண்டுகளுக்கு
முன் ஐ.பி.எஸ்., பதவி உயர்வு கிடைத்தது. தற்போது
துணை கமிஷனராக பணியாற்றி வருகிறார்.
அடுத்த ஆண்டு பணி ஓய்வு பெற உள்ளார்.

இவரது மகள் சிந்து சர்மா. 2014ம் ஆண்டு ஐ.பி.எஸ்., பணியில்
சேர்ந்தார். தற்போது தெலுங்கானா மாநிலம், ஜக்தியால்
மாவட்ட எஸ்.பி.,யாக பணியாற்றி வருகிறார்.

ஐ தராபாத்தின் புறநகர் பகுதியில் நேற்று( செப்., 2) ஆளும்
கட்சியான தெலுங்கானா ராஷ்டிரிய சமிதியின் பொது
கூட்டம் நடந்தது. இதில் பாதுகாப்பு பணியில் தந்தையும்,
மகளும் ஈடுபட்டனர்.

ஒரு கட்டத்தில் இருவரும் ஒருவரை ஒருவர் நேரில் சந்திக்க
வேண்டிய சூழ்நிலை ஏற்பட்டது. சொந்த மகள் என்றாலும்,
உயர் அதிகாரி என்பதால், சல்யூட் அடிக்க வேண்டிய
கட்டாயம் ஏற்பட்டது உமா மகேஸ்வரா சர்மாவுக்கு.
அவரும் கம்பீரமாக சல்யூட் அடித்தார்.

இதை பார்த்த அனைவரும் அதிசயத்து போயினர். இது குறித்து
உமா மகேஸ்வரா சர்மா கூறுகையில், 'பணியில் இருக்கும் போது
நாங்கள் இருவரும் நேருக்கு நேர் சந்தித்தது இதுவே முதல் முறை.

மகளுடன் சேர்ந்த பணியாற்ற மிகவும் ஆர்வத்துடன்
இருந்தேன். அவர் எனக்கு உயர் அதிகாரி. எனவே, நேரில்
பார்த்த போது சல்யூட் அடித்தேன். எனினும், வீட்டில் தந்தை,
மகள் போலவே இருப்போம்' என்றார்.

சிந்து சர்மா கூறுகையில்,' பொது கூட்டத்தில் பெண்கள்
பாதுகாப்பு பணிக்காக வந்தேன். தந்தையுடன் பணியாற்றியதால்
மிகவும் சந்தோஷப்பட்டேன். இது மிகவும் நல்ல தருணம்' என்றார்.
-
----------------------------
தினமலர்

நெகிழ்ச்சியான தருணம்