அரசியலுக்கு விஷால் அச்சாரம் - மக்கள் நல இயக்கம் துவக்கம்

மக்கள் நல இயக்கம் என்று நடிகர் விஷால் தனது ரசிகர்
மன்றத்துக்கு பெயர் சூட்டி, கொடியையும் அறிமுகப்படுத்தியுள்ளார்.

நடிகர் விஷால் அண்மைக்காலமாக அரசியலில் ஆர்வம் காட்டி
வருகிறார். கடந்த முறை ஆர்.கே நகர் இடைத்தேர்தலின் போது
சுயேட்சையாக வேட்பு மனு தாக்கல் செய்து பெரும் பரபரப்பை
ஏற்படுத்தினார்.

ஆனால், அவர் முன்மொழிந்த 10 பேரில் 2 பேர் நம்பகத்தன்மை
இல்லை என்று கூறியதால் அவரது வேட்பு மனு தள்ளுபடி
செய்யப்பட்டது. ஆனால், தொடர்ந்து மக்களுக்கு நான் சேவை
செய்வேன் என்று கூறி விட்டு சினிமா பக்கம் கவனம் செலுத்தினார்.

இந்நிலையில், இன்று சென்னை கலைவாணர் அரங்கில் நடிகர்
விஷால், ‘மக்கள் நல இயக்கம்’ என்று தனது புதிய அமைப்பை
அறிவித்தார். மேலும், புதிய கொடியையும் அறிமுகப்படுத்தினார்.
அந்த கொடியில், ‘அணி சேர்வோம், அன்பை விதைப்போம்’
என்ற வாசகம் இடம் பெற்றுள்ளது.

பின்னர் அமைப்பின் பெயர் அறிமுக விழாவில் அவர்
பேசியதாவது: ‘மக்கள் பிரச்னையை நேரில் சந்தித்து தீர்த்து
வைப்பதே அரசியல். நிஜ வாழ்வில் நல்லது செய்ய விரும்பும்
அனைவரும் அரசியல்வாதிகளே.

என்னுடைய சொத்து எனது ரசிகர்களும் தன்னம்பிக்கையும் தான்.
எனக்கு ஒரே ஒரு கார் உள்ளது. அது மட்டுமே எனது சொத்து.
மற்றபடி சொத்து என்று சொல்லிக்கொள்வதற்கு ஒன்றும் இல்லை.
நாட்டில் நடக்கும் பிரச்னை கண்டும் காணாததுமாக இருப்பவர்கள்
பிணத்திற்கு சமம்’

இவ்வாறு அவர் தெரிவித்தார்.
-
--------------------
தமிழ் சமயம்