இந்திய மீது பாக்., ராணுவம் தாக்குதல்

ஜம்மு : இந்தியா - பாகிஸ்தான் எல்லையில் பாதுகாப்பில் இருந்த வீரர்கள் மீது பாகிஸ்தான் படை வீரர்கள் துப்பாக்கியால் சுட்டனர். ஆனால் இந்திய வீரர்கள் சாதுர்யமாக தற்காத்து கொண்டதால் அதிர்ஷ்டவசமாக யாரும் பலியாகவில்லை. இருப்பினும் ஏற்பட்ட சேதம் குறித்து அதிகாரப்பூர்வ தகவல்கள் எதுவும் வெளியாகவில்லை. ஜம்மு காஷ்மீர் ஒட்டிய இந்திய - பாகிஸ்தான் எல்லை பகுதியில் சமீப காலமாக ஊடுருவல் இந்திய வீரர்களுக்கு பெரும் சவாலாக இருந்தது. இந்தியாவிற்குள் நுழைய முயன்ற பயங்கரவாதிகள் சுட்டு வீழ்த்தப்பட்டனர்.

எல்லையோர பாதுகாப்பு படையினர் ஆங்காங்கே செக்போஸ்ட் அமைத்து பாதுகாப்பு பணியில் ஈடுபட்டு வருகின்றனர். நேற்று இரவில் கந்தரால் எல்லை சம்பாவிற்குட்பட்ட ராம்கார் பகுதியில் ரோந்து பணியில் இருந்த இந்திய வீரர்கள் மீது பாகிஸ்தான் ராணுவத்தினர் துப்பாக்கி சூடு நடத்தினர், இதனையடுத்து இந்திய வீரர்களும் திருப்பி சுட்டனர். இதில் யாரும் காயமுற்றதாகவோ, மற்றும் ஏற்பட்ட சேதம் குறித்தோ அதிகாரப்பூர்வ தகவல் இல்லை. இரவு நேரத்தில் நடந்த சம்பவம் உயர் அதிகாரிகளுக்கு தெரிவிக்கப்பட்டது.

இந்த சம்பவம் குறித்து எல்லையோர காவல் படை ஐ. ஜி., ஏ.கே., சரோலியா கூறியதாவது; பாதுகாப்பில் இருந்த வீரர்கள் மீது சுடப்பட்டதாக தகவல் கிடைத்ததும். இந்தப்பகுதி முழுவதும் ரெட் அலர்ட் செய்யப்பட்டுள்ளது. மேலும் ரோந்து பணிகள் தீவிரப்படுத்த உத்தரவிடப்பட்டுள்ளது. பாதுகாப்பு படை வீரர்களை பழிவாங்கும் நோக்கில் இந்த தாக்குதல் நடந்துள்ளது. என்றார்.

எத்தனை முறை மீறல்கள் : கடந்த ஞாயிற்றுக்கிழமை போபியா , லாண்டி , பகுதிகளில் இது போன்ற சம்பவம் நடந்தது. இதற்கு இந்தியா கண்டனத்தை தெரிவித்திருந்தது. சனிக்கிழைமை பூஞ்ச் மாவட்டம் கராந்தி பகுதியில் நடந்த சண்டையில் ஒருவர் கொல்லப்பட்டார் . இருவர் காயமுற்றனர். சர்வதேச எல்லைப்பகுதியில் பாகிஸ்தான் இந்த வாரத்தில் இது போன்ற போர் நிறுத்த ஒப்பந்தத்தை மீறிய சம்பவம் 5 முறை நடந்துள்ளது. நடப்பு ஆண்டில் பாகிஸ்தான் 28 முறை போர் நிறுத்த ஒப்பந்தத்தை மீறியுள்ளது. கடந்த 4 ஆண்டுகளில் பாகிஸ்தான் மொத்தம் 129 முறை இது போன்ற வரம்பு மீறலில் ஈடுபட்டுள்ளது. வான்வழியாக 43 முறை அத்துமீறல் நடத்தியுள்ளது என புள்ளி விவரம் தெரிவிக்கிறது.

ஏற்கனவே உள்நாட்டு பயங்கரவாதிகளினால் அல்லல்பட்டு வரும் பாகிஸ்தான் இந்தியாவிடம் அவ்வப்போது வாலை ஆட்டிக்காட்டிக்கொள்கிறது.