ஓய்வுக்குப் பின் விவசாயத்தில் ஈடுபட்டுள்ள நீதிபதி:

**ayyasamy ram** · **ayyasamy ram** Tue Aug 07, 2018 11:57 am

சென்னை உயர் நீதிமன்ற நீதிபதியாகப் பணியாற்றிய
ஏ.செல்வம் தனது ஓய்வுக்குப்பின் ஷார்ட்ஸ், டி சர்ட்
அணிந்து கொண்டு தனது கிராமத்தில் விவசாயத்தில்
ஈடுபட்டுவருவது அனைவரையும் கவனத்தையும் ஈர்த்து
பாராட்டையும் பெற்றுள்ளது.

சென்னை உயர் மன்ற நீதிபதியாக இருந்தவர் ஏ.செல்வம்.
உயர் நீதிமன்றத்தில் கடந்த 12 ஆண்டுகள் நீதிபதியாகப்
பணியாற்றி கடந்த ஏப்ரல் 4-ம் தேதி ஓய்வு பெற்றார்.
-
புலங்குறிச்சியில் விவசாயத்தில் ஆர்வமாக ஈடுபட்டிருந்த
ஓய்வுபெற்ற நீதிபதியிடம் 'தி இந்து' (ஆங்கிலம்) சார்பில்
தொடர்பு கொண்டு பேசினோம்.

அப்போது அவர் கூறியதாவது:

''நான் விவசாய குடும்பத்தைச் சேர்ந்தவன். அதிலும் ஏழை
குடும்பத்தைச் சேர்ந்தவன். என் தந்தை, என் தாத்தா என
அனைவரும் பாரம்பரியாக விவசாயம் செய்து வந்தனர்.

மிகவும் ஏழ்மையான குடும்பத்தில் பிறந்ததால், மிகவும்
கஷ்டப்பட்டுதான் பள்ளிப்படிப்பை முடித்தேன்.
நல்ல உடைகள்கூட என்னிடம் கிடையாது.

கலை கல்லூரியில் பட்டப்படிப்பு படிக்க நான் செல்லும்போது, எ
னக்கு உடுத்திக்கொள்ள பேன்ட் இல்லை, காலில் அணியச்
செருப்பு இல்லை. இல்லை என்பதைக் காட்டிலும் வாங்குவதற்கு
வசதி இல்லை.

அதனால், வேட்டி அணிந்து கொண்டுதான் கல்லூரி சென்று
படித்தேன். நான் சட்டக்கல்லூரிக்கு சென்றபோதுதான் காலில்
செருப்பும், உடுத்திக்கொள்ள பேன்ட்டும் வாங்கிக்கொள்ள
முடிந்தது. ஆதலால், விவசாயம் என்பதும், வறுமை என்பதும்
எனக்குப் புதிதானது அல்ல.

நீதிபதி பதிவியில் இருந்து ஓய்வு பெற்றபின், நான் எந்தவிதமான
அரசு சலுகைகளையும் அனுபவிக்கவில்லை, கார், வீட்டைக் கூட
உடனே திருப்பி அளித்துவிட்டேன்.

சுதந்திரமாக, சுத்தமான காற்றை சுவாசித்து, எனது சொந்த
கிராமத்தில், மகிழ்ச்சியாக விவசாயம் செய்து வருகிறேன்.
அதிலும் எந்தவிதமான ரசாயன உரங்களைப் பயன்படுத்தி
விவசாயம் செய்யாமல், இயற்கை முறை விவசாயத்தைச்
செய்து வருகிறேன். நெல், பழங்கள், காய்கறிகளைப் பயிர்
செய்திருக்கிறேன்.''

இவ்வாறு செல்வம் தெரிவித்தார்.
-
---------------------------
தி இந்து