அரசு அலுவலகங்களில் மின் கட்டண நிலுவை ரூ.1,500 கோடி: அமைச்சர் பி.தங்கமணி

அரசு அலுவலகங்களில் ரூ.1,500 கோடி அளவுக்கு
மின் கட்டணம் நிலுவையில் உள்ளதாக மின்சாரம்,
மதுவிலக்கு மற்றும் ஆயத் தீர்வைத்துறை அமைச்சர்
பி.தங்கமணி தெரிவித்தார்.

நாமக்கல் மாவட்ட காவல் துறை சார்பில், நாமக்கல்
அனைத்து மகளிர் காவல் நிலைய வளாகத்தில்
அமைக்கப்பட்டுள்ள போட்டித் தேர்வுகளுக்கான
நூலகத்தை சனிக்கிழமை திறந்து வைத்த அவர்,
பின்னர் செய்தியாளர்களுக்கு அளித்த பேட்டி:

இதுவரை அரசு அலுவலகங்கள் செலுத்த வேண்டிய
மின் கட்டண நிலுவை ரூ.1,500 கோடி. இதில் அதிக
அளவாக ரூ.900 கோடி தமிழ்நாடு குடிநீர் வாரியம்
செலுத்த வேண்டியுள்ளது.

அரசு அலுவலகங்களில் நிலுவையில் உள்ள
மின் கட்டணத்தை வசூல் செய்ய பேச்சு வார்த்தை
நடைபெற்று வருகிறது. சிறிது சிறிதாக நிலுவை
தொகையைச் செலுத்தி விடுகிறோம் எனத்
தெரிவித்துள்ளனர்.

தற்போது மின்சாரக் கட்டணம் செலுத்துவதற்காக
தமிழகத்தில் புதிய செல்லிடப்பேசி செயலி
துவக்கப்பட்டுள்ளது. இதற்கு மக்களிடையே நல்ல
வரவேற்பு உள்ளது.

நாமக்கல் மாவட்டத்தில் மோகனூர் புதிய வருவாய்
வட்டம் அறிவிக்கப்பட்டு, அங்கு வட்டாட்சியர்
அலுவலகம் அமைக்கப்பட்டுள்ளது. விரைவில் இந்த
அலுவலகம் திறக்கப்படும்.

தமிழ்நாட்டில் மின்சாரம் இல்லாத கிராமங்களே
இல்லை என்ற நிலை உருவாக்கப்பட்டுள்ளது.
மலைக் கிராமங்களில் உச்ச நீதிமன்றத் தடையால்
மின்கம்பங்கள் அமைக்க முடியாத நிலை உள்ளது.

இதுபோன்று மலைக் கிராமங்களில் உள்ள
5,100 வீடுகளுக்கு மின்சார வசதி அளிக்க வேண்டியுள்ளது.

கடந்த ஒரு மாதத்தில் உச்ச நீதிமன்ற அனுமதி பெற்று
சுமார் 1,000 வீடுகளுக்கு மின் வசதி அளிக்கப்பட்டுள்ளது.
இன்னும் 4,000 வீடுகளுக்கு மின் இணைப்பு வழங்க,
உச்ச நீதிமன்றத்தில் அனுமதி பெற முயற்சி செய்து
வருகிறோம்.

இந்த வீடுகளில் தற்போது சோலார் மூலம் விளக்குகள்
எரிந்து கொண்டிருக்கின்றன என்றார்.
-
----------------------------
தினமணி