கீழணையில் உபரி நீர் வெளியேற்றம் நிறுத்தம், 8 டி.எம்.சி., தண்ணீர் வீணாக கடலில் கலந்தது

காட்டுமன்னார்கோவில்: தஞ்சை மாவட்டம், கீழணையில்
இருந்து கொள்ளிடம் ஆற்றில் கடந்த 6 நாட்களாக
வெளியேற்றப்பட்ட உபரி நீர் நேற்று மாலை நிறுத்தப்பட்டது.

கர்நாடகத்தில் பெய்த தொடர் மழை காரணமாக காவிரியில்
உபரி நீர் திறக்கப்பட்டதை தொடர்ந்து, மேட்டூர் அணைக்கு
தண்ணீர் வந்தது. கடந்த 19ம் தேதி மேட்டூரில் இருந்து
பாசனத்திற்கு தண்ணீர் திறக்கப்பட்டது.

தொடர்ந்து கர்நாடகத்தில் இருந்து உபரி நீர் திறக்கப்பட்டதால்
மேட்டூர் அணையின் நீர் மட்டம் முழு கொள்ளளவான 120 அடி
(93 டி.எம்.சி.,) தேக்கப்பட்டபின், அங்கிருந்து உபரி நீர்
வெளியேற்றப்பட்டது.

அந்த தண்ணீர் முக்கொம்பு, கல்லணை வந்தது. கல்லணையில்
இருந்து கீழணைக்கு தண்ணீர் திறக்கப்பட்ட நிலையில்,
முக்கொம்பில் இருந்தும் கொள்ளிடத்திற்கு திறக்கப்பட்டது.

இதனால் ஒரே சமயத்தில் 45 ஆயிரம் கன அடியாக உயர்ந்தது.
26ம் தேதி இரவு 7:00 மணிக்கு தண்ணீர் வந்து சேர்ந்த ஒரு மணி
நேரத்தில் கீழணை நிரம்பியது.

இதனால், வேறு வழியின்றி கொள்ளிடம் ஆற்றில் உபரி நீர்
வெளியேற்றப்பட்டு, கடலுக்கு அனுப்பப்பட்டது. முதலில்
5000 கன அடியாக வெளியேற்றப்பட்ட தண்ணீர் அளவு
அடுத்தடுத்து அதிகரித்து 28ம் தேதி வரை 35 ஆயிரம் கன
அடியாக அதிகரித்தது.

பின் தண்ணீர் வரத்து குறைந்ததால், படிப்படியாக தண்ணீர்
வெளியேற்றம் குறைக்கப்பட்டது. 28ம் தேதி 12 ஆயிரமும்,
படிப்படியாக 9,000, 6,000 என இறுதியாக நேற்று மாலை
2000 ஆயிரம் கன அடி நீர் வெளியேற்றப்பட்டது.

இதனால் கொள்ளிடம் ஆற்றில் கடந்த 6 நாட்களாக
இருகரையும் தண்ணீர் கரைபுரண்டு ஓடுகிறது. இந்நிலையில்
மேட்டூரிலிருந்து தண்ணீர் வரத்து நின்று போனதால் நேற்று
மாலையுடன் கீழணையில் இருந்து கொள்ளிடம் ஆற்றில்
வெளியேற்றப்பட்ட உபரி நீர் முற்றிலும் நிறுத்தப்பட்டது.

கடந்த மாதம் 26ம் தேதி இரவு முதல் நேற்று வரை கீழணையில்
இருந்து கொள்ளிடம் வழியாக கடலுக்கு வெளியேற்றப்பட்ட
உபரி நீரின் அளவு 8 டி.எம்.சி., இருக்கும் என அதிகாரிகள்
தெரிவித்தனர்.
-
------------------------------
தினமலர்