முத்த போட்டோ; அடி, உதையுடன் வேலையும் போச்சு

தாகா:
வங்கதேசத்தில் கொட்டும் மழையில் முத்தமிட்டு கொண்ட
காதல் ஜோடியை படம் எடுத்த போட்டோகிராபருக்கு
அடி, உதை விழுந்தது. வேலையும் பறிபோனது.

சர்ச்சை பல்கலை

வங்கதேச தலைநகர் தாகாவில் உள்ள பல்கலைகழகம்
சர்ச்சைக்கு பெயர் போனது. சில மாதங்களாக
போராட்டங்களும், வன்முறை சம்பங்களும் அதிகளவில்
நடந்துள்ளன.
கைகளை கோர்த்து நின்ற மாணவர்கள் மீது தாக்குதலும்
நடத்தப்பட்டது.

தாகாவை சேர்ந்த போட்டோகிராபர் ஜிபான் அஹமது.
உள்ளூர் பத்திரிகையில் பணியாற்றி வந்தார்.
சில நாட்களுக்கு முன் பல்கலைக்கழகத்திற்கு சென்ற
ஜிபான் அஹமது, மாணவர்கள் மற்றும் ஆசிரியர்களை
படம் எடுக்க முயன்றார்.

அப்போது கனமழை பெய்தது. பல்கலை வளாகத்தில் இருந்த
ஒரு காதல் ஜோடி, கொட்டும் மழையை பொருட்படுத்தாமல்
முத்தமிட்டு கொண்டனர். இதை பார்த்த ஜிபான் அஹமது
மிகவும் உணர்ச்சி வசப்பட்டு அந்த காட்சியை படம் எடுத்து
விட்டார்.

ஆனால், படத்தை வெளியிட, அவர் பணியாற்றும்
பத்திரிகையின் ஆசிரியர் மறுத்து விட்டார். இந்த படம்
சர்ச்சைகளை ஏற்படுத்தும் என்று அவர் கூறிவிட்டார்.

பேஸ்புக்கில் வெளியானது

இதனால், ஜிபான் அஹமது அந்த படத்தை பேஸ்புக்கில்
வெளியிட்டார். அந்த படம் வேகமாக பரவியது.
சுயநலமில்லாத காதல் என்று கூறி பலரும் அந்த படத்திற்கு
ஆதரவு தெரிவித்தனர்.

ஆனால், உள்ளூர் கலாச்சார பாதுகாவலர்கள் என்று கூறி
கொள்பவர்கள், இந்த படத்திற்கு கடும் எதிர்ப்பு தெரிவித்தனர்.
' காதலர்களுக்கு தற்போது துணிச்சல் வந்து விட்டது.
முன்பெல்லாம் இது போன்ற விஷயங்கள் மறைவில் நடக்கும்.
இப்போது வெட்டவெளிச்சமாக நடத்துகின்றனர்' என்றும்
கண்டனம் தெரிவித்தனர்.

அடுத்த நாள் ஜிபான் அஹமதை, சக போட்டோகிராபர்கள்
தாக்கியுள்ளனர். அவரை பணியில் இருந்து நீக்கி உள்ளூர்
பத்திரிகை நிர்வாகம் உத்தரவு பிறப்பித்துள்ளது.
-
-------------------------------
தினமலர்

மகிழ்ச்சி.