கிருஷ்ணகிரி அருகே 300 ஆண்டு பழமை வாய்ந்த பாறை ஓவியங்கள் கண்டுபிடிப்பு

கிருஷ்ணகிரி, ஜூன் 25: கிருஷ்ணகிரி அருகே 300 ஆண்டு பழமை வாய்ந்த பாறை ஓவியங்கள் கண்டுபிடிக்கப்பட்டுள்ளது. இதுகுறித்து கிருஷ்ணகிரி அரசு அருங்காட்சியக காப்பாட்சியர் கோவிந்தராஜ் கூறியதாவது: கோயில்களுக்கு தானம் அளிக்கும்போது, எந்த கோயிலுக்கு தானம் அளிக்கப்பட்டது என்பதை உணர்த்தும் வகையில் அடையாளங்கள் காட்டுவது வழக்கமாகும். சிவன் கோயில் என்றால் திரிசூலமும், பெருமாள் கோயில் என்றால் சங்கு, சக்கரம் அல்லது வாமனர் உருவமும், சமணர் பள்ளி என்றால் முக்குடையும் இடம் பெற்றிருக்கும். பல இடங்களில் தானம் அளிக்கப்பட்ட விவரம் இல்லாமல் அடையாளங்கள் மட்டும் பொறிக்கப்பட்டிருக்கும். இந்த அடையாளங்களை கொண்டு அக்காலத்தில் கோயில் இருந்ததை தெரிந்து கொள்ளலாம். அதன்படி, கிருஷ்ணகிரி மாவட்டத்தில் சில தடயங்கள் கிடைத்துள்ளன.
கிருஷ்ணகிரி அருகே அக்ரஹாரம் தோட்டிகுண்டு என்னுமிடத்தில் உள்ள பாறையில், சுமார் 200 ஆண்டு பழமையான வாமனர் கோட்டுருவம் காணப்படுகிறது. அங்கு பெருமாள் கோயில் ஒன்றும் உள்ளது. வாமனர் தலைக்கு மேல் குடை காணப்படுகிறது. தலைக்கு மேல் இருபுறமும் சூரிய, சந்திரர்கள் உள்ளனர். ஒரு கையில் கெண்டியை வைத்தவாறு சுமார் 2 அடி உயரத்தில் இந்த உருவம் உளியினால் வரையப்பட்டுள்ளது. இது சில மாதங்களுக்கு முன்பு கண்டறிப்பட்டது. இதேபோல், கல்லுக்குறிக்கி மலையில் அமைந்துள்ள பாதையில், தரையிலேயே அமைந்துள்ள சிறு பாறையில் சூலம் வரையப்பட்டுள்ளதை கிருஷ்ணகிரி தொடக்கப்பள்ளி ஆசிரியர்கள் அடங்கிய வரலாறு, பண்பாட்டு தேடல் மற்றும் ஆவணப்படுத்துதல் குழு அண்மையில் கண்டறிந்துள்ளது. இதனை நானும், தொல்லியல் ஆய்வாளர் சுகவன முருகன் ஆகியோர் ஆய்வு செய்தோம்.
இது சுமார் 300 ஆண்டு பழமையானதாகும். திரிசூலத்திற்கு மேல் இருபுறமும் சூரிய, சந்திரர்கள் காட்டப்பட்டுள்ளனர். கீழே ஒரு கட்டாரி என்னும் குறுவாள் காட்டப்பட்டுள்ளது. இது அருகில் உள்ள சிவன் கோயிலுக்கு தானமளித்து, அந்த தானம் சூரிய, சந்திரர் உள்ளவரை காப்பாற்றப்பட வேண்டும் என்பதையும், அடியில் உள்ள வாள் இந்த தானத்தை ஒரு முக்கிய படைவீரன் அல்லது படைத்தலைவன் வழங்கியுள்ளான் என்பதையும் குறிக்கிறது. சூலத்தின் மேல் நாகா எழுத்தில் தா என எழுதப்பட்டுள்ளது. அருகில் உள்ள கால பைரவர் கோயிலுக்கு அளித்த தானத்தை இங்கு பொறித்து வைத்துள்ளனர். இந்த இரண்டு பாறை கீறல்களும், தானம் குறித்த எந்த விவரத்தையும் குறிக்காமல் வெறும் அடையாளங்களை மட்டும் நிலையான பாறைகளில் காட்டியுள்ளனர். இவற்றை கொண்டு அருகில் உள்ள கோயில்களை அடையாளம் காண முடிகிறது. இந்த ஆய்வின்போது அருங்காட்சியக பணியாளர்கள் கிருஷ்ணன், செல்வகுமார் மற்றும் ஆசிரியர்கள் தமிழ்செல்வன், ரவி, டேவிஸ் ஆகியோர் உடனிருந்தனர். இவ்வாறு காப்பாட்சியர் கோவிந்தராஜ் கூறினார்.
நன்றி
தினகரன்