பதவி விலகுகிறார் தலைமைப் பொருளாதார ஆலோசகர் அரவிந்த் சுப்ரமணியன்

-
அரவிந்த் சுப்ரமணியன், தலைமைப் பொருளாதார
ஆலோசகராக, கடந்த 2014-ஆம் ஆண்டு அக்டோபர் 16-
ஆம் தேதி பதவியேற்றார். அவரது 3 ஆண்டு பதவிக்
காலம், கடந்த ஆண்டுடன் நிறைவடைந்தது.

அதைத் தொடர்ந்து, அவரது பதவிக் காலம் ஓராண்டு
நீட்டிக்கப்பட்டது.

ஓரிரு மாதங்களில் ராஜிநாமா:

இதனிடையே, தலைமைப் பொருளாதார ஆலோசகர்
பதவியை ஓரிரு மாதங்களில் ராஜிநாமா செய்ய இருப்பதாக,
அரவிந்த் சுப்ரமணியன் தெரிவித்தார்.

காங்கிரஸ் விமர்சனம்:

இதனிடையே, அரவிந்த் சுப்ரமணின் பதவி விலகுவதாக
அறிவித்திருப்பதில் வியப்பேதும் இல்லை என்றும், பிரதமர்
மோடியின் தவறான பொருளாதார கொள்கைகளால்,
அதிருப்தியை அடைந்த பொருளாதார நிபுணர்கள் தங்களது
பதவியை ராஜிநாமா செய்து வருகின்றனர் என்றும் காங்கிரஸ்
செய்தித் தொடர்பாளர் ரண்தீப் சிங் சுர்ஜேவாலா கூறியுள்ளார்.

இதே காரணத்துக்காகத்தான், ரிசர்வ் வங்கியின் ஆளுநராக
இருந்த ரகுராம் ராஜன், நீதி ஆயோக்கின் துணைத் தலைவராக
இருந்த அரவிந்த் பனகாரியா ஆகியோரும் தங்கள் பதவியை
ராஜிநாமா செய்தனர் என்றும் அவர் கூறினார்.
-
-----------------------------------
தினமணி

இந்திய பண்பாட்டை பிரதிபலிப்பவரே பொருளாதார ஆலோசகராக வர வேண்டும்
-

மத்திய அரசின் தலைமை பொருளாதார ஆலோசகர்
அரவிந்த் சுப்பிரமணியன் பதவி விலகியுள்ள நிலையில்,
இந்திய பண்பாட்டை பிரதிபலிப்பவரே அடுத்து அந்தப்
பதவிக்கு வர வேண்டும் என்று ஆர்எஸ்எஸ் சார்பு
அமைப்பான சுதேசி ஜாக்ரண் மஞ்ச் தெரிவித்துள்ளது.

இந்தியாவின் உணர்வுகளை அரவிந்த் சுப்பிரமணியன்
உணரவில்லை என்றும், விவசாயிகளை அவர்
புறக்கணித்தார் என்றும் அந்த அமைப்பு குற்றம்
சாட்டியுள்ளது.

இதுதொடர்பாக, சுதேசி ஜாக்ரண் மஞ்ச் அமைப்பின்
இணை ஒருங்கிணைப்பாளர் அஷ்வினி மஹாஜன்
கூறியதாவது:

அரவிந்த் சுப்பிரமணியத்திடம் இந்தியாவைப் பற்றிய
புரிதல் இல்லை. வெளிநாட்டு நேரடி முதலீடு குறித்த
எண்ணம் மட்டுமே அவரிடம் நிறைந்திருந்தது.

நமது பொருளாதாரத்தின் முக்கிய அங்கமான
விவசாயத்தையும், விவசாயிகளையும் அவர்
புறக்கணித்துவிட்டார்.

நீதி ஆயோக் குழுவின் முன்னாள் தலைவர்
அரவிந்த் பனகரியாவைப் போலவே, வாஷிங்டன் நலன்
குறித்து பேசுபவராக சுப்பிரமணியன் இருந்தார்.
அவரது நோக்கம் மற்றும் செயல் என்ன என்பதை புரிந்து
கொள்ள முடியவில்லை.

ஆகவே, இந்திய பண்பாடு, நாட்டின் மதிப்பு, நமது மக்கள்
ஆகியோரை பிரதிபலிக்கும் ஒருவரே நமக்கு தேவை.
அதுபோன்ற நபரையே அடுத்த பொருளாதார
ஆலோசகராக அரசு நியமிக்க வேண்டும் என்றார் அவர்.

இதனிடையே, சுட்டுரையில் அஷ்வினி மஹாஜன்
வெளியிட்ட பதிவில், இந்திய தொழில் துறையினர்,
பணியாளர்கள் மற்றும் விவசாயிகள் மீது நம்பிக்கை
கொண்ட ஒருவரை பொருளாதார ஆலோசகராக
நியமிக்க வேண்டும் என்று பிரதமர் நரேந்திர மோடிக்கு
கோரிக்கை விடுத்துள்ளார்.
-

-----------------------------------
தினமணி