தமிழகத்தில் 25 புதிய துணை மின் நிலையங்கள்: முதல்வர் பழனிசாமி அறிவிப்பு

தமிழகத்தில் புதிதாக 25 துணை மின் நிலையங்கள் அமைக்கப்படும்
என்று முதல்வர் எடப்பாடி கே.பழனிசாமி அறிவித்தார்.

சட்டப் பேரவையில் விதி 110-இன் கீழ் அவர் செவ்வாய்க்கிழமை
படித்தளித்த அறிக்கை:

திருநெல்வேலி மாவட்டம் ஆரல்வாய்மொழி பகுதியில் காற்றாலை
மற்றும் சூரிய சக்தி மூலம் உற்பத்தியாகும் மின்சாரத்தை வெளிக்
கொணர்வதற்காக சமூகரங்கபுரத்தில் ஒரு புதிய 400 கிலோ
வோல்ட் துணை மின் நிலையம் ரூ.600 கோடியில் அமைக்கப்படும்.

கடலூர் மாவட்டம் நெய்வேலி, சிவகங்கை மாவட்டம் கோந்தகை,
கோவை பரலி ஆகிய இடங்களில் புதிய 400 கிலோ வோல்ட் துணை
மின் நிலையங்கள் ரூ.1,669 கோடி மதிப்பில் அமைக்கப்படும்.

உடன்குடி ஒன்றாவது அலகில் இருந்து உற்பத்தியாகும் மின்சாரத்தை
வெளியேற்றவும், இந்த் பாரத் அனல் மின் நிலையத்தில் இருந்து
உற்பத்தியாகும் மின்சாரத்தை வெளியேற்றவும், புதிய காற்றாலை
மற்றும் சூரிய சக்தி மூலம் உற்பத்தியாகும் மின்சாரத்தை வெளிக்
கொணரவும் தூத்துக்குடி மாவட்டம் ஒட்டப்பிடாரத்தில்
ரூ.1,039 கோடியில் புதிய 400 கிலோ வோல்ட் துணை மின் நிலையம்
அமைக்கப்படும்.

சென்னை-மதுரை: மதுரை மாவட்டம் கே.புதூர், திருநெல்வேலி
மாவட்டம் ராஜகோபாலபுரம், திருப்பூர் மாவட்டம் கலிவேலம்பட்டி,
சேலம் மாவட்டம் எடப்பாடி என மொத்தம் நான்கு இடங்களில்
230 கிலோ வோல்ட் துணை மின் நிலையங்கள் அமைக்கப்படும்.

சென்னை மாநகரத்தின் மின் கட்டமைப்பை மேம்படுத்த சென்னை
மாவட்டத்தில் கே.கே.நகர் மற்றும் கணேஷ் நகர், திருவள்ளூர்
மாவட்டம் ஆவடி, எண்ணூர், காஞ்சிபுரம் மாவட்டம் மறைமலைநகர்,
பல்லாவரம் ஆகிய ஆறு இடங்களில் 230 கிலோ வோல்ட் துணை மின்
நிலையங்கள் அமைக்கப்படும்.

திருவண்ணாமலை மாவட்டம் காரப்பட்டு, காஞ்சிபுரம் மாவட்டம்
இந்தளுர், நாகை மாவட்டம் ஆச்சாள்புரம், வேலூர் மாவட்டம்
மேல்பாடி, தஞ்சாவூர் மாவட்டம் பாபநாசம், தருமபுரி மாவட்டம்
இலக்கியம்பட்டி, திருப்பூர் மாவட்டம் பனப்பாளையம், கோவை
மாவட்டம் சின்னத்தடாகம், மதுரை மாவட்டம் தானியமங்கலம்,
மாணிக்கம்பட்டி ஆகிய இடங்களில் 110 கிலோ வோல்ட் துணை
மின் நிலையங்கள் அமைக்கப்படும்.

சூரிய மின்சக்தித் திட்டம்: தமிழகத்திலுள்ள பல்வேறு
நீர்த் தேக்கங்களில் நீர் ஆவியாவதைத் தடுக்கவும், சூரிய சக்தி
கட்டாய கொள்முதல் அளவை அதிகரிக்கவும் முதல் முறையாக
250 மெகாவாட் மிதக்கும் சூரியசக்தி மின் நிலையங்கள் சாத்தியக்
கூறின் அடிப்படையில் அமைக்கப்படும்.

65 ஆண்டுகளுக்கும் மேலாக உள்ள மோயாறு புனல் மின்
நிலையத்தின் ஆயுள் காலத்தை மேலும் 25 ஆண்டுகள் நீட்டிக்கச்
செய்யவும், நிறுவு திறனை மேலும் அதிகரிக்கவும் நவீனமயமாக்கும்
பணிகள் மேற்கொள்ளப்படும்.

புதிய எரிசக்திக் கொள்கை: வரும் 2023-ஆம் ஆண்டு சூரிய
எரிசக்தியில் 8,884 மெகாவாட் திறனை அடைவதற்கு ஏதுவாக,
சூரிய எரிசக்திக் கொள்கை 2012 வகுக்கப்பட்டது.

இந்தக் கொள்கையானது மாற்றியமைக்கப்படும். இதன் மூலம்
சூரிய எரிசக்திக் கொள்கை, தமிழ்நாடு தொலைநோக்குப் பார்வை,
தேசிய சூரிய இயக்கம் ஆகியவற்றின் நோக்கங்கள்
ஒருங்கிணைக்கப்படும்.

தொலைநோக்குப் பார்வை 2023 ஆவணத்தின்படி, உயர்ந்த
பொருளாதார, சமூக குறிக்கோளை நிறைவேற்றும் வகையில்,
புதிய எரிசக்திக் கொள்கை உருவாக்கப்படும்.
-
---------------------------
தினமணி

வீடுகளில் சூரிய ஒளி மின்சாரத்தை தயாரிக்க போதிய அளவு
செயலாக்க திட்டங்கள் குறைவு. பலர் வீட்டு மொட்டைமாடிகள்
மொட்டையாக இருக்கின்றது. விழிப்புணர்ச்சியை உண்டாக்க மின்துறை
செயல்படவேண்டும்.

ரமணியன்.