கருப்புப் பணம் பற்றி தகவல் கொடுத்தால் ரூ.1 கோடி பரிசு: வருமான வரித்துறை அதிரடி

புது தில்லி:
கருப்புப் பணம் பற்றி பொதுமக்கள் தகவல் அளிக்க ஊக்குவிக்கும்
வகையில், மிகப்பெரிய பரிசுத் தொகையை வருமான வரித்துறை
அறிவித்துள்ளது.

அதாவது, பினாமி பணப்பரிமாற்றம், பினாமி சொத்துக்கள்,
பினாமி சொத்துக்கள் மூலமாக வருவாய் ஈட்டுதல், கருப்புப்
பணம் பதுக்கல் போன்றவை குறித்து தகவல் அளிக்கும்
பொதுமக்களுக்கு ரூ.1 கோடி வரை பரிசுத் தொகை வழங்கப்படும்
என்று வருமான வரித்துறை தனது அதிரடி அறிவிப்பை
வெளியிட்டுள்ளது.

'கருப்புப் பணம் பற்றி தகவல் அளிப்பவர்களுக்கான பரிசு திட்டம்
2018'ன் படி, கருப்புப் பணம் பதுக்கி வைத்திருப்பவர்கள் குறித்து
சரியான தகவலை அளித்து பொதுமக்கள் ரூ.1 கோடி வரை பரிசுத்
தொகை பெறும் வகையில் திருத்தம் மேற்கொள்ளப்பட்டுள்ளது.

கருப்புப் பணத்தை ஒழிக்க மத்திய அரசு கொண்டு வரும் பல்வேறு
திட்டங்களில் மிக முக்கியத்துவம் பெற்ற திட்டமாக இது அமையும்
என்று எதிர்பார்க்கப்படுகிறது.

இந்த திட்டத்தின் கீழ் தகவல் அளிக்கும் நபர்களின் விவரங்கள்
மிக பாதுகாப்பாக வைக்கப்படும். மேலும், பொது மக்கள்
அளிக்கும் தகவலின் அடிப்படையில், மிகப்பெரிய அளவில் கருப்புப்
பணம் பதுக்கி வைக்கப்பட்டிருப்பது கண்டுபிடிக்கப்பட்டால்,
தகவல் அளித்தவருக்கு ரூ.1 கோடி அளவுக்கு ரொக்கப் பரிசு
வழங்கப்படும் என்பது குறிப்பிடத்தக்கது.

மத்திய அரசு அறிவித்திருக்கும் இந்த பரிசுத் தொகை திட்டம்,
உடனடியாக அமலுக்கு வருகிறது. மேலும், இதுபற்றிய மேலதிகத்
தகவல்களுக்கு இந்திய வரித்துறை அலுவலகத்தையோ அல்லது
இணையதளத்தையோ நாடலாம்.

தகவல் அளித்தவரின் விவரம், அவருக்கு அளிக்கப்படும் பரிசுத்
தொகை என அனைத்துமே ரகசியமாக வைக்கப்படும். சட்ட
நடவடிக்கைகளின் போது, சட்டதிட்டங்களுக்கு உட்பட்டு,
தேவைப்பட்டால் நீதிமன்றத்தில் விவரம் அளிக்கப்படும்.

இந்தியர்கள் மட்டுமல்ல, வெளிநாட்டினரும், இந்த திட்டத்தின் கீழ்
கருப்புப் பணம் குறித்து தகவல் அளித்து பரிசுத் தொகையினைப்
பெறலாம்.

சிபிடிடீ, (CBDT)
நார்த் பிளாக்,
புது தில்லி என்ற முகவரியிலோ அல்லது
member.inv@incometax.gov.in என்ற மின்னஞ்சல் முகவரியிலோ
தகவல் தெரிவிக்கலாம் என்று அறிவிக்கப்பட்டுள்ளது.
-
---------------------------------
தினமணி