இந்தியாவின் முதல் 14 வழி விரைவுச் சாலை பிரதமர் மோடி நாட்டுக்கு அர்ப்பணித்தார்

-
புதுடெல்லி,

இந்தியாவின் முதல் 14 வழிச்சாலையை பிரதமர் மோடி நேற்று
திறந்து வைத்து நாட்டுக்கு அர்ப்பணித்தார்.

14 வழிச்சாலை

டெல்லியில் இருந்து உத்தரபிரதேச மாநிலம் மீரட் வரையிலான
149 கிலோ மீட்டர் தூரத்துக்கு ரூ.11 ஆயிரம் கோடி செலவில்
அதிநவீன வசதிகளுடன் கூடிய கிழக்கு விரைவுச் சாலை
அமைக்கப்படுகிறது.

இதற்கான அடிக்கல்லை கடந்த 2015–ம் ஆண்டு நவம்பர் 5–ந்தேதி
பிரதமர் மோடி நாட்டினார். இந்த 149 கி.மீ. நீள சாலையில் டெல்லியில்
இருந்து 27.74 கி.மீ. தூரத்துக்கு 14 வழிச்சாலையாகவும், அதன்பிறகு
மீதம் உள்ள தூரம் 6 வழிச்சாலையாகவும் இருக்கும்.

இதில் முதல் கட்டமாக ரூ.842 கோடி செலவில் 9 கிலோ மீட்டர்
நீளத்துக்கு 14 வழிச்சாலை அமைக்கப்பட்டு உள்ளது.

இந்த சாலையில் சூரிய ஒளி மூலம் இயங்கும் மின்விளக்குகள்
அமைக்கப்பட்டு உள்ளன. சாலையின் இரு புறமும் ஒவ்வொரு
500 மீட்டர் தொலைவுக்கும் மழை நீர் சேகரிப்பு வசதி
ஏற்படுத்தப்பட்டு இருக்கிறது.

நாட்டுக்கு அர்ப்பணித்தார்

உத்தரபிரதேச மாநிலம் பக்பத் என்ற இடத்தில் நேற்று நடைபெற்ற
விழாவில் பிரதமர் மோடி கலந்து கொண்டு இந்த சாலையை
திறந்து வைத்து நாட்டுக்கு அர்ப்பணித்தார்.

அப்போது அவர் பேசுகையில் கூறியதாவது:–

இந்தியாவில் அடிப்படை கட்டுமான வசதிகளை மேம்படுத்துவதில்
மத்திய அரசு மிகுந்த ஆர்வம் காட்டுகிறது. முந்தைய காங்கிரஸ்
ஆட்சி காலத்தில் ஒரு நாளைக்கு 12 கி.மீ. நெடுஞ்சாலை
அமைக்கப்பட்டது. ஆனால் தற்போது ஒரு நாளைக்கு 27 கி.மீ.
நீளத்துக்கு சாலை அமைக்கப்படுகிறது.

ரூ.3 லட்சம் கோடி செலவில் 28 ஆயிரம் கி.மீ. நீள நெடுஞ்சாலை
அமைக்கப்படுகிறது. டெல்லி–மீரட் இடையேயான இந்த விரைவுச்
சாலையின் கட்டுமான பணிகள் விரைவில் முடிவடையும் என்றும்,
இதன்மூலம் டெல்லியில் போக்குவரத்து நெரிசல் வெகுவாக
குறையும் என்றும் நம்புகிறேன்.

மத்திய அரசு உறுதி

காங்கிரஸ் கட்சி, முக்கிய பிரச்சினைகளையெல்லாம்
அரசியலாக்கி 70 ஆண்டுகளாக மக்களுக்கு துரோகம் செய்து
வந்துள்ளது.

கரும்பு விவசாயிகளின் பிரச்சினைகளை மத்திய அரசு அறிந்து
இருக்கிறது. கரும்புக்கு உரிய விலை கிடைப்பதற்கான
நடவடிக்கைகளை அரசு எடுத்து வருகிறது. விவசாயிகள் பிரச்சினை
தொடர்பாக எதிர்க்கட்சிகள் வதந்திகளை பரப்பி வருகின்றன.

மக்கள் அதை நம்பக்கூடாது. பெண்களின் வாழ்க்கையை
மேம்படுத்துவதற்கான பல்வே நலத்திட்டங்களை மத்திய அரசு
செயல்படுத்தி வருகிறது.

தலித் மக்களின் நலன்களை பாதுகாப்பதில் மத்திய அரசு
உறுதியாக இருக்கிறது. அவர்களுக்கு எதிராக நடைபெறும்
தாக்குதல்கள் பற்றி விசாரிக்க தனிக்கோர்ட்டுகள்
அமைக்கப்பட்டு உள்ளன.

இவ்வாறு பிரதமர் மோடி கூறினார்.

நிதின் கட்காரி

விழாவில் சாலை போக்குவரத்து மற்றும் நெடுஞ்சாலை துறை
மந்திரி நிதின் கட்காரி பேசுகையில், இந்த நவீன விரைவுச்
சாலையின் மூலம் டெல்லி–மீரட் இடையேயான பயண நேரம்
வெகுவாக குறையும் என்றும், டெல்லியில் மாசு 27 சதவீதமும்,
போக்குவரத்து நெரிசல் 41 சதவீதமும் குறையும் என்றும் கூறினார்.

விழாவில் உத்தரபிரதேச கவர்னர் ராம்நாயக், முதல்–மந்திரி
யோகி ஆதித்யநாத், அரியானா முதல்–மந்திரி மனோகர்லால்
கட்டார் ஆகியோர் கலந்து கொண்டனர்
-
---------------------------------
தினத்தந்தி