`அமெரிக்காவுக்கு வருத்தம்; தமிழர்களுக்கு மெளனம்' - மோடியை விமர்சிக்கும் குஜராத் எம்.எல்.ஏ

-
பிரதமர் மோடி, கிரிக்கெட் வீரர்களுக்கு ஃபிட்னஸ் சேலஞ்ச்
கொடுப்பாரே தவிர, சாமான்ய மனிதர்களின் குரல்களைக்
கேட்க மாட்டார்' என குஜராத் காங்கிரஸ் எம்.எல்.ஏ
அல்பேஷ் தாகூர் கூறியுள்ளார்.
-
தூத்துக்குடி ஸ்டெர்லைட் கலவரத்தின்போது நிகழ்ந்த துப்பாக்கிச்
சூட்டுக்கு பலியானவர்களின் எண்ணிக்கை தினமும் அதிகரித்துக்
கொண்டே செல்கிறது. இதுவரை 13 பேர் பலியாகியுள்ள போதிலும்,
பலருக்கு மோசமான காயங்கள் ஏற்பட்டுள்ளன. பொதுமக்கள் -
போலீஸார் இடையே தொடர் மோதல்கள் நிலவிவருவதால்,
நிலைமையை கட்டுக்குள் கொண்டுவர முடியாமல் மாவட்ட
நிர்வாகமும் மாநில அரசும் தவித்துவருகின்றன. காவல்துறையினர்
விதிகளைப் பின்பற்றாமல், கண்மூடித்தனமாக துப்பாக்கிச்சூடு
நடத்தியுள்ளனர் என அரசியல் கட்சித் தலைவர்களும் பொதுமக்களும்
குற்றம் சாட்டியுள்ளனர்.

இச்சம்பவத்துக்கு, அகில இந்திய அளவில் கண்டனங்கள்
எழுந்துள்ளன.

காங்கிரஸ் தலைவர் ராகுல்காந்தி, மேற்குவங்க முதல்வர்
மம்தா பானர்ஜி எனப் பலரும் மத்திய, மாநில அரசுகளைச் சாடி
வருகின்றனர்.

இந்த நிலையில், குஜராத் ராதான்பூர் காங்கிரஸ்
எம்.எல்.ஏ., அல்பேஷ் தாகூர், தூத்துக்குடி சம்பவத்துக்குக் கண்டனம்
தெரிவித்துள்ளார். இதுகுறித்து ட்விட்டரில் கருத்து தெரிவித்துள்ள
அவர், ``அமெரிக்காவில் நடைபெறும் துப்பாக்கிச் சூட்டுக்கு பிரதமர்
மோடி வருத்தம் தெரிவிக்கிறார்.

ஆனால் தமிழ்நாட்டின் தூத்துக்குடியில், போலீஸால் 13 இந்தியர்கள்
சுட்டுக்கொல்லப்பட்டுள்ளனர். அவர்களுக்கு இரங்கல் தெரிவிக்காமல்
பிரதமர் மோடி மௌனம் காத்துவருகிறார்.

விராட் கோலி போன்ற கிரிக்கெட் வீரர்கள் மற்றும் செலிபிரிட்டிகளுக்கு
மோடி பதில் சொல்வாரே தவிர, சாமான்ய மக்களின் குரல்களை அவர்
கேட்கக்கூட மாட்டார்" எனப் பதிவிட்டுள்ளார்.
-
-----------------------------
-விகடன்